27
पावल रोमय् वंगु
1 जिमित लःजहाजं इटालियाय् छ्वयेगु क्वःछी धुंकाः पावल व मेपिं कुनातःपिन्त युलियस धाःम्ह जुजु अगस्तसया महांतय् कप्तानयागु ल्हातय् लःल्हाना बिल।
2 अले जिपिं एशियाय् थी थी थासय् जुयाः वनेत्यंगु एड्रामिटेनोसयागु लःजहाजय् च्वनावना। जिपिं नाप माकेडोनियाय् च्वंगु थेसलोनिके शहरं वःम्ह अरिस्तार्खस धाःम्ह मनू नं दु।
3 कन्हय् खुन्हु जिपिं सीदोन धयागु लःजहाज दिकेगु थासय् थ्यन। युलियसं पावलयात दया यानाः वया पासापिन्थाय् माःगु यायेत छ्वया बिल।
4 जिपिं अनं वनाबलय् अःखतं फय् संगुलिं फय् छले यायेत साइप्रसया उत्तर पाखें वना।
5 जिपिं किलिकिया व पामफिलियायागु समुद्र जुयाः लुकियाय् लाःगु माइरा धाःगु शहरय् थ्यंकः वया।
6 अन इटालियाय् वनेत्यंगु मेगु लःजहाज छगः लुइकाः कप्तानं जिमित उकी हे तल। व लःजहाज अलेक्जेन्ड्रियां वःगु खः।
7 जिपिं तःन्हु तक बुलुहुँ न्ह्यज्यां तसकं दुःख फयाः क्नीडस धाःगु शहरयागु लिक्क थ्यंकः वया। अनं नं जिमित फसं मछ्वःगुलिं क्रेट टापुया उत्तर पाखें वना।
8 जिपिं तसकं थाकुक सिथं सिथं सुन्दर बन्दर धाःगु थासय् थ्यंकः वया। थनं लासिया धाःगु शहर सत्ति।
9 थुकथं जिमिसं तःन्हु हे सितिं छ्वया। ग्वःफय् वइगु ई जूगुलिं समुद्रं जुइगु तसकं ग्यानपुइ यः। प्रायश्चितया दिं नं फुइधुंकल। उकिं पावलं थथे धकाः धाल --
10 “स्वयादिसँ, जिं स्वयेबलय् ला आः नं झीपिं थनं लःजहाजय् च्वना वन धाःसा जहाज व मालसामान जक नाश जुइगु मखु, झीपिं नापं सी फु।”
11 पावलं धाःगु खँ मन्यंसे कप्तानं जहाज चले याइम्ह व जहाजया थुवालं धाःगु खँ न्यन।
12 चिकुलाबलय् च्वनेत थ्व जहाज दिकेगु थाय् पाय्छि मजूगुलिं अप्वःसिनं वनाः फतिंफतले फोनिक्सय् थ्यंकेगु मतिइ तःगु खः। थ्व क्रेट टापुयागु छगू लःजहाज दिकेगु थाय् खः। थ्व दच्छिन-पच्छिम व उत्तर-पच्छिम स्वः।
ग्वःफय् वःगु
13 दच्छिन पाखें फय् संगुलिं सकसिनं आः ला वने जी धकाः मतिइ तल। अले इमिसं नँयागु काकःचा च्वय् सालाः लःजहाजयात क्रेट टापुयागु सिथं सिथं न्ह्याकल।
14 तर भचा लं हे टापुपाखें उत्तर पुर्बय् नं तसकं ग्वःफय् वल।
15 लःजहाजयात ग्वःफसं त्वपुल, जिमिसं छुं हे याये मफुत। अले यग्गु थजु धकाः जिमिसं लःजहाजयात अथें त्वःता बिया।
16 क्लौडा धाःगु छगू टापुइ थ्यंकाः ग्वःफय्यात भचा पन। अथेजूसां जिमित लःजहाजया ल्युने चिनातःगु नांचा बचय् यायेत तसकं थाकुल।
17 बल्ल बल्लं थ्व नांचायात लःजहाजय् सालाः न्याक्क चिना बिया। लिबियायागु समुद्रया फिसलय् जहाज भास्से जुइ धकाः ग्यानाः जहाज चलेयाइपिन्सं पाल क्वकया बिल। अले लःजहाजयात फसं घ्वाना यंकल।
18 ग्वःफय् तसकं हे वःगुलिं कन्हय् खुन्हु इमिसं जहाजय् च्वंगु मालसामान वांछ्वया बिल।
19 हानं कंस खुन्हु इमिसं जहाज चलय् यायेत माःगु सामान नं वांछ्वया बिल।
20 तःन्हु तक ला जिमिसं नगु व सूर्य तकं स्वये मखन। अले हानं ग्वःफय् मदिक्क वया तुं च्वंगुलिं जिमिसं ला म्वाइ हे मखुत धकाः धाये धुनागु।
21 तःन्हु निसें नये तकं मखंनाः पावलं दनाः थथे धाल -- “छिकपिन्सं जिं धयागु खँ न्यनाः क्रेटं मवःगु जूसा थथे दुःख नं फये माली मखुगु, अले मालसामान नं नाश जुइ मखुगु।
22 अय्नं छिकपिं ग्यानादी म्वाः। सुं नं सी मखु। लःजहाज जक स्यनी।
23 जिं आराधना यानाच्वनाम्ह जिम्ह परमेश्वरया छम्ह स्वर्गदूतं म्हिगः चान्हय् वयाः जितः थथे धाल --
24 ‘ग्याये मते पावल, छ कैसरया न्ह्यःने वने हे माः। अय्जूगुलिं परमेश्वरं छ नाप दुपिं सकसितं बचय् यानादी।’
25 थथे छिकपिं ग्यानादी मते, छाय्धाःसा परमेश्वरं जितः गथे धयादिल अथे हे जुइ धकाः जिं स्यू।
26 अय्नं छुं टापुइ झीगु जहाज न्या हे न्याइ।”
27 झिंप्यन्हु दय्काः जिमिगु लःजहाज एड्रियास धाःगु समुद्रय् लाः वल। बाचा इलय् जहाज चलय् याइपिन्सं गुगुं टापुइ लाः वःगु मतिइ तल।
28 अथेजूगुलिं इमिसं लः गुलि तःजाः दाना स्वल। अन लः स्विखुगू मिटर तःजाः। भचा उखे वनाः दाना स्वःबलय् नीन्हय्गू मिटर ति जक तःजाः।
29 अले गनं ल्वहँतय् न्याः वनी धकाः ग्यानाः इमिसं प्यंगू नँयागु काकःचा ल्यूनें क्वफाना छ्वल। अले गुबलय् सुथ जुइ धकाः पियाच्वन।
30 जहाज चलय् याइपिन्सं चिचाग्वःगु नांचा लखय् क्वछ्वयाः न्ह्यःनेयागु नँयागु काकःचा क्वफायेगु त्वहः तयाः बिस्युं वनेत स्वल।
31 थ्व खँ सियाः पावलं कप्तान व सिपाइँतय्त धाल -- “थुपिं बिस्युं वन धाःसा छिकपिं सुं नं म्वाइ मखु।”
32 अले सिपाइँतय्सं नांचा थाकातःगु खिपः चाना बिल। नांचा चुइके यन।
33 सुथ जुइ थें च्वंकाः पावलं इमित नयेनी यायेत धाल -- “छिकपिन्सं छुं हे मनःगु झिंप्यन्हु मछिं दये धुंकल।
34 अय्जूगुलिं छिकपिन्सं छुं नयेनी यानादिसँ। म्वायेत ला नये हे माः। छिकपिनिगु सँ छपु तकं छुं जुइ मखु धकाः ला जिं धाये हे धुन।”
35 थुलि धयाः पावलं मरि कयाः फुक्कसिया न्ह्यःने परमेश्वरयात सुभाय् बियाः कुचा कुचा यानाः नल।
36 अले फुक्कसिनं लय्तातां नल।
37 जिपिं फुक्क यानाः निसः व न्हयेखुम्ह (२७६) दु।
38 गाक्क नये धुंकाः इमिसं ल्यंगु छ्व जहाजयात याउँसे च्वंकेत समुद्रय् वांछ्वया बिल।
लःजहाज स्यंगु
39 सुथ जुइ धुंकाः नं इमिसं व थाय्यात म्हसीके मफुत। अय्नं इमिसं समुद्रयागु सि खनाः उखे हे जहाज यंकेगु मतिइ तल।
40 उकिं इमिसं काकःचायात लखय् वांछ्वया बिल, जहाजयागु चतं नं फ्यन, अले जहाजयात फसं सिथय् यंकेमा धकाः पाल नं ब्वय्कल।
41 जहाज हुत्तिना वनाः न्ह्यःने बँय् भास्से जूवन, अले लः द्वंब्वलं जहाजयागु ल्यूनेयागु ब्व स्यंकल।
42 अले ज्वना हःपिं लाल कयाः बिस्युं वनी धकाः ग्यानाः सिपाइँतय्सं इमित स्याना छ्वयेगु मतिइ तल।
43 तर कप्तानं पावलयात बचय् यायेगु मतिइ तयाः सिपाइँतय्त अथे याके मब्यू, बरु फुपिं लाल कयाः समुद्र सिथय् हुँ।
44 अले मेपिं जक सिँपौ व जहाजयागु स्यंगु कुचाय् च्वनाः हुँ धकाः धाल। थुकथं जिपिं फुक्कं बचय् जुयाः वने फत।