16
तिमोथी, पावल व सिलास नाप वंगु
1 पावलपिं हानं डर्बी जुयाः लुस्त्राय् वन। अन तिमोथी धाःम्ह छम्ह चेला दु। वया मां विश्वासी यहूदी जूसां वया बौ ग्रीक खः।
2 थ्व हे तिमोथीयात लुस्त्राय् व आइकोनियनय् च्वंपिं दाजुकिजापिन्सं तसकं भिं धकाः धाइगु खः।
3 पावलं वयात थः नाप ब्वना यंके मास्ति वय्कल। अन च्वंपिं फुक्क यहूदीतय्सं तिमोथीया बौ ग्रीक खः धकाः स्यू, अले हानं तिमोथीयात आः तक म्हय् चिं मतय्कुनि धकाः नं स्यू। अय्जूगुलिं यहूदीतय् नायःतय्सं यानाः पावलं तिमोथीयात म्हय् चिं तय्कल।
4 अले इपिं शहर शहरय् वनाः अन च्वंपिं विश्वासीतय्त यरूशलेमय् प्रेरितत व थकालिपिन्सं क्वःछिगु पालन या धकाः स्यनेकने याना जुल।
5 थुकिं यानाः मण्डलीइ च्वंपिनिगु विश्वास यक्व हे बल्लाना वल। अले हानं न्हियान्हिथं विश्वासीत यक्व दयावल।
त्रोआसय् पावलं दर्शन खंगु
6 इमित पवित्र आत्मां एशियाय् प्रभुयागु खँ न्यंक वने मते धकाः पनादीगुलिं इपिं फ्रिगिया व गलातिया देश जुया वन।
7 माइसिया देशय् थ्यंकाः इमिसं बिथिनिया देशय् वनेत स्वल। येशूयागु आत्मां इमित उखे नं छ्वया मदी।
8 थथेजूगुलिं इपिं माइसिया पुलाः त्रोआस पाखे स्वयाः क्वहां वन।
9 अबलय् पावलं छन्हु चान्हय् थज्याःगु दर्शन खन। माकेडोनियाय् च्वंम्ह छम्ह मनुखं दनाः वयात बिन्ति यानाः थथे धयाच्वन -- “माकेडोनियाय् झायाः जिमित ग्वाहालि यानादिसँ।”
10 पावलं थथे दर्शन खंगुलिं जिमिसं याकनं हे उखे वनेगु क्वःछिना। परमेश्वरं हे जिमित प्रभुयागु भिंगु खँ इमित न्यंकेत सःतादीगु खः धकाः जिमिसं सिल।
लिडियां विश्वास याःगु
11 जिपिं लःजहाजय् च्वनाः त्रोआसं तप्यंक हे सामोथ्राकेपाखे वना। अनं कन्हय् खुन्हु हे नियापोलिसय् वना।
12 अनं जिपिं न्यासि वनाः फिलिप्पिइ थ्यंकः वया। थ्व फिलिप्पी शहर माकेडोनिया जिल्लाया मुख्यगु शहर खः। थ्व शहरयात रोमीतय्सं थःगु ल्हातय् कयातःगु खः। थन जिपिं छुं न्हि तक हे च्वना।
13 छन्हु विश्रामबार खुन्हु जिपिं शहरयागु ध्वाखां पिने खुसि सिथय् पाखे प्रार्थना यायेगु थाय् दइ धकाः मतिइ तयाः वना। अले अन मुंवःपिं मिसात नाप नं खँ ल्हाना।
14 थिआटीराय् च्वंम्ह रंग छिनातःगु थिकेगु कापः मिया जुइम्ह लिडिया नां दुम्ह मिसां नं जिमिगु खँ बांलाक न्यन। थ्व मिसां परमेश्वरयात मानय् याः। पावलं धाःगु खँ थुइमा धकाः प्रभुं वयागु नुगः चाय्कादिल।
15 व व वया छेँय् च्वंपिन्सं बप्तिस्मा काये धुंकाः वं जिमित थथे धकाः बिन्ति यात -- “जिं प्रभुयात दुनुगलंनिसें विश्वास याः धकाः छिकपिन्सं ताय्कादियागु खःसा जिगु छेँय् च्वं झासँ।” वं थथे कर याःगुलिं जिपिं वयागु छेँय् वना।
पावलपिन्त झ्यालखानाय् कुंगु
16 छन्हु प्रार्थना यायेगु थासय् वना च्वनाबलय् मभिंम्ह आत्मायागु शक्तिं ल्हाः स्वइम्ह छम्ह दासीयात जिमिसं नाप लात। वं व ज्या यानाः वया मालिकयात यक्व धिबा कमय् याना बी धुंकल।
17 पावल व जिमिगु ल्यू ल्यू वयाः वं थथे धाल -- “थुपिं दकलय् तःधंम्ह परमेश्वरया मनूत खः। थुमिसं मुक्तियागु लँ क्यना बी।”
18 तःन्हु तक हे व थथे हाला जूगुलिं पावलं हीमी चायाः वयाथाय् स्वयाः मभिंम्ह आत्मायात थथे धाल -- “येशू ख्रीष्टया नामं जिं छन्त हक्के, वयात त्वःता ब्यु।” थथे धायेवं हे व मभिंम्ह आत्मां वयात त्वःता वन।
19 व दासीया मालिकतय्सं थथे थःपिनिगु धिबा कमय् यायेगु लँ मदय्का ब्यूगुलिं पावल व सिलासयात ज्वनाः लुत्तु लुयाः हाकिमतय्थाय् यंकल।
20 अन हये धुंकाः इमिसं धाल -- “थुपिं यहूदीत खः। थुमिसं झीगु शहरय् खलबल यानाच्वन।
21 थुमिसं झी रोमीतय्सं मानय् याये मज्यूगु थितिकुति स्यनाच्वन।”
22 अले मनूतय्गु हुलं नं इमित हय्क्का वल। हाकिमतय्सं पावल व सिलासयात लं त्वःकाः दायेत आज्ञा बिल।
23 थथे दाये फक्व दाये धुंकाः इमित झ्यालखानाय् कुना बिल। अले झ्यालखानाया हाकिमयात बांलाक पाः तया तयेत उजं बिया थकल।
24 थथे उजं दयेवं झ्यालखानाया हाकिमं इमिगु तुतिइ न्यवः न्ह्याकाः कुना बिल।
25 चान्हय् पावल व सिलासं प्रार्थना यायां परमेश्वरयागु म्ये हालाच्वंगु अन च्वंपिं कैदीतय्सं न्यनाच्वन।
26 अबलय् हे लाक्क तसकं भ्वखाय् ब्वल। झ्यालखानायागु जग हे लिगिलिगि सन। फुक्क खापा चाला वन, अले कैदीतय्त न्ह्याकातःगु न्यवः ब्यना वन।
27 झ्यालखानाया हाकिमया झसंक न्ह्यलं चाल। वं खापा दक्व चालाच्वंगु खन। अले “फुक्क कैदीत बिस्युं वन जुइ” धकाः मतिइ तयाः तरवार लिकयाः गः कियाः सीत स्वल।
28 थ्व खनाः पावल तसकं चिल्लाय् दनाः हाल -- “अथे यानादी मते, जिपिं फुक्कं थन हे दु।”
29 थ्व न्यनाः व हाकिम मत ज्वनाः झ्यालखानाय् दुने ब्वाँय् वन। अले थरथर खाखां पावल व सिलासया तुतिइ भ्वसू वन।
30 पावल व सिलासयात पिने ब्वना यंकाः वं थथे धकाः न्यन -- “छु याःसा जिगु उद्धार जुइ?”
31 इमिसं धाल -- “प्रभु येशूयात विश्वास यानादिसँ, अले छि व छिगु छेँय् च्वंपिं फुक्कं बचय् जुइ।”
32 अले इमिसं हाकिमयात व वया छेँय् च्वंपिन्त परमेश्वरयागु वचन न्यंकल।
33 चान्हय् हे वं पिने यंकाः इमिगु घाः सिला बिल। वं व वया छेँय् च्वंपिन्सं उबलय् हे बप्तिस्मा काल।
34 अनंलि वं इमित छेँय् यनाः नकेत्वंकेगु यात। थथे परमेश्वरयात विश्वास याःगुलिं व व वया छेँय् च्वंपिं फुक्कं तसकं लय्ताल।
35 कन्हय् खुन्हु हाकिमतय्सं सिपाइँतय्त थथे धाय्के छ्वया हल -- “व मनूतय्त त्वःता छ्व।”
36 अले झ्यालखानाया हाकिमं पावलयात थ्व खँ कन -- “हाकिमतय्सं छिकपिन्त त्वःता छ्व धकाः धाय्के हल। आः छिकपिं याउँक झासँ।”
37 थ्व न्यनाः पावलं धाल -- “इमिसं जिमित छुं दोष मक्यंकं फुक्कसिया न्ह्यःने न्यनेनिने हे मयासे दाल। जिपिं रोमीत खः। अज्ज ला इमिसं जिमित झ्यालखानाय् कुन। आः धाःसा सुतुक्क त्वःता छ्वयेत्यन ला? जिपिं वने मखु। इमिसं हे वयाः जिमित त्वःते माः।”
38 सिपाइँतय्सं वनाः हाकिमतय्त थ्व खँ न्यंकल। इपिं रोमीत खः धयागु न्यनाः हाकिमत ग्यात।
39 इमिसं वयाः पावल व सिलासयाके माफी फ्वन। अले इमित झ्यालखानां पित हयाः शहर त्वःता झासँ धकाः धाल।
40 झ्यालखानां पिहां वयाः इपिं लिडियायागु छेँय् वन। दाजुकिजापिन्त नाप लानाः साहस बियाः इपिं अनं वन।