10
पत्रुस व कर्नेलियस
1 कैसरियाय् कर्नेलियस नां दुम्ह छम्ह मनू दु। व इटालिया धाःगु पल्टनयाम्ह छम्ह कप्तान खः।
2 व छम्ह धर्मीम्ह मनू खः। व व वया जहानपिं फुक्कसिनं परमेश्वरयात मानय् याः। वं फ्वंवःपिन्त नुगः मस्यासे ब्यू। अले परमेश्वरयात न्ह्याबलें प्रार्थना नं याः।
3 छन्हु न्हिनय् तीन बजे परमेश्वरया छम्ह दूतं दर्शन बियाः वयात -- “कर्नेलियस” धकाः सःतूगु वं बांलाक हे ताल।
4 वं स्वःगु स्वलं तुं यानाः ग्याग्यां धाल -- “प्रभु, छु याये माल, धयादिसँ?”
अले दूतं वयात धाल -- “छं मेपिन्त याःगु ग्वाहालि व प्रार्थना खनाः परमेश्वर तसकं लय्तायादिल।
5 आः छं मनूतय्त योप्पाय् छ्वयाः सिमोन धाःम्ह पत्रुसयात सःतके छ्व।
6 व मनू सिमोन धाःम्ह छेंगूया ज्या याइम्हय्सिगु समुद्र सिथय् च्वंगु छेँय् च्वनाच्वंगु दु।”
7 स्वर्गदूत वने धुंकाः वं निम्ह च्यःतय्त व थःगु पल्टनयाम्ह छम्ह धर्मीम्ह सिपाइँयात सःताः
8 जूगु खँ फुक्कं कनाः योप्पाय् छ्वल।
9 कन्हय् खुन्हु न्हिनय् सःतःवंपिं शहरया लिक्क थ्यन। अबलय् हे पत्रुस कःसिइ प्रार्थना याः वन।
10 तसकं नये पित्याःगुलिं वं नयेगु मतिइ तल। नयेगु ज्वरय् याना च्वंबलय् हे पत्रुसं दर्शन खन।
11 स्वर्ग चालाः अनं छकू तःधंगु देलासा थेंज्याःगु प्यखें कुन्चाय् ज्वनाः पृथ्वीइ कुतुं वयाच्वंगु खन।
12 उकी तःता मछियापिं पशु, पंक्षित व घिस्रय् जुया जुइपिं जन्तुत दु।
13 अले “दँ पत्रुस, थुमित स्यानाः न” धकाः धयाहःगु सः ताल।
14 वं धाल -- “अथे जुइ मखु, प्रभु। जिं ला गुबलें हे शुद्ध मजूगु व नये मज्यूगु मनयानि।”
15 हानं सः वल -- “परमेश्वरं शुद्ध याना तःगुयात छं शुद्ध मजू धकाः धाये मते।”
16 थथे स्वकः तक जुल। अले व फुक्क हानं स्वर्गय् तुं थत यंकल।
17 थथे पत्रुसं थःम्हं खंगु दर्शनयागु अर्थ छु जुइ धकाः मतिइ तया च्वंबलय् लाक्क हे कर्नेलियसं छ्वया हःपिं मनूत सिमोनयागु छेँ लुइकाः लुखाय् दनाः
18 सःताः “सिमोन धाःम्ह पत्रुस थन च्वनाच्वंगु दु ला” धकाः न्यन।
19 थ्व दर्शनयागु अर्थ छु जुइ धकाः मतिइ तया च्वंबलय् पवित्र आत्मां पत्रुसयात धयादिल -- “कुने स्वम्ह मनूतय्सं छन्त माः वयाच्वंगु दु।
20 याकनं क्वहां हुँ, अले इपिं नाप छुं संका मयासे सुमुक हुँ। जिं हे इमित छंथाय् छ्वया हयागु खः।”
21 अले पत्रुसं कुहां वनाः इमित धाल -- “छिमिसं माला च्वंम्ह मनू जि हे खः। छिपिं थन छाय् वयागु?”
22 इमिसं धाल -- “कर्नेलियस धाःम्ह परमेश्वरयात मानय् याइम्ह व भिंम्ह छम्ह कप्तान दु। वय्कःयात यहूदीतय्सं नं मानय् याः। पवित्रम्ह स्वर्गदूतं दर्शन बियाः छितः सःताः छिगु खँ न्यँ धकाः वय्कःयात धयादीगुलिं जिपिं वयागु खः।”
23 अले वं इमित दुने यंकाः उखुन्हु अन हे बाय् तल।
पत्रुस कर्नेलियसयात नाप लाः वंगु
कन्हय् खुन्हु पत्रुस इपिं नाप वन। योप्पाय् च्वंपिं गुम्हं गुम्हं विश्वासीतय्त नं वं ब्वना यंकल।
24 इपिं कंस खुन्हु कैसरियाय् थ्यन। कर्नेलियस, वया पासापिं व थःथितिपिं फुक्क मुंकाः पत्रुसपिनिगु लँ स्वयाच्वन।
25 पत्रुस दुहां वने त्यंबलय् कर्नेलियसं लुखाय् वयाः वयागु तुति भागि यात।
26 अय्नं पत्रुसं वयात थनाः धाल -- “दनादिसँ, जि नं ला छम्ह मनू हे खः नि।”
27 थथे व कर्नेलियस नाप खँ ल्हाल्हां दुने वन। दुने वं यक्व मनूत मुनाच्वंगु खन।
28 अले वं इमित धाल -- “छम्ह यहूदी जुयाः मेपिन्थाय् वनाः इपिं नाप संगत याये मज्यू धयागु खँ ला छिकपिन्सं सि हे स्यू। अय्नं परमेश्वरं जितः सुं मनूयात शुद्ध मजू व थीमज्यूपिं धाये मते धकाः धयादिल।
29 अय्जूगुलिं हे जि छिकपिन्सं सःतके हःबलय् म्हां मधासे वया। आः छिकपिन्सं जितः छाय् सःता दियागु खः, धयादिसँ।”
30 अले कर्नेलियसं धाल -- “थनिं प्यन्हु दत, न्हिनेसिया तीन बजे ति जि छेँय् प्रार्थना याना च्वनाबलय् त्वइसे च्वंगु वसः पुनातःम्ह छम्ह स्वर्गदूतं जिगु न्ह्यःने दं वयाः
31 थथे धाल -- ‘कर्नेलियस, छं याःगु प्रार्थना व मेपिन्त ग्वाहालि यानाजूगु परमेश्वरयात तसकं यल।
32 अय्जूगुलिं योप्पाय् छं मनूतय्त सिमोन धाःम्ह पत्रुसयात सःतके छ्व। व मनू सिमोन धाःम्ह छेंगूया ज्या याइम्हय्सिगु समुद्र सिथय् च्वंगु छेँय् च्वनाच्वंगु दु।’
33 अले जिं उघ्रिमय् हे छिथाय् मनूत छ्वया हया। छि झायादीगु तसकं हे बांलात। परमेश्वरया न्ह्यःने प्रभुं छितः धयादीगु खँ न्यनेत जिपिं थथे मुनाच्वनागु दु।”
पत्रुसं नवाःगु
34 अले पत्रुसं धाल -- “धात्थें खः खनि, परमेश्वरं सुयातं ख्वाः स्वयाः ज्या यानामदी।
35 वय्कःयात मानय् यानाः भिंगु भिंगु ज्या यानाजूपिं न्ह्याम्हय्सितं वय्कलं यय्कादी।
36 परमेश्वरं येशू ख्रीष्टयापाखें इस्राएलीतय्त शान्ति बीगु भिंगु खँ न्यंकादिल। थ्व हे येशू ख्रीष्ट फुक्कसियां प्रभु खः।
37 थ्व हे भिंगु खँ यूहन्नां बप्तिस्मायागु खँ न्यंका जूगु लिपा गालीलंनिसें यहूदिया तकं न्यनावंगु दु धकाः छिकपिन्सं सि हे स्यू।
38 अले हानं गथे परमेश्वरं थ्व हे नासरतयाम्ह येशूयात पवित्र आत्मां जाय्काः यक्व शक्ति बियादिल। अले येशूं फुक्कसितं भिंकाः शैतानं दुःखकष्ट बिया तःपिन्त लाय्कादिल। छाय्धाःसा परमेश्वर वय्कः नाप दीगु खः धकाः छिकपिन्सं नं स्यू।
39 “वय्कलं थथे यरूशलेम शहरय् व यहूदियाय् यानादीगु फुक्क ज्याखँया साक्षी जिपिं हे खः। इमिसं वय्कःयात क्रूसय् यख्खानाः स्यात।
40 अय्नं परमेश्वरं वय्कःयात सी धुंकूसां स्वन्हु दुखुन्हु म्वाकादिल अले क्यनादिल।
41 वय्कः फुक्क मनूतय्थाय् झाया मदी। परमेश्वरं जिमित थुकियागु साक्षी बीत ल्यया तःगुलिं जिमिथाय् झाल। अले जिमिसं वय्कः नाप नयेत्वने याना।
42 व हे येशूं जिमित थ्व भिंगु खँ न्यंका जुइत व परमेश्वरं वय्कःयात हे सीपिनि व म्वाःपिनि न्यायाधीश यानादीगु दु धकाः न्यंका जुइत उजं बियादिल।
43 न्हापायापिं अगमवक्तातय्सं नं येशूयात विश्वास याःपिं मनूतय्गु पाप वय्कःयागु नामं जक क्षमा जुइ फु धकाः धया वंगु दु।”
यहूदीमखुपिं नं पवित्र आत्मां जाःगु
44 थथे पत्रुसं नवाना च्वंबलय् हे न्यना च्वंपिं मनूतय्के पवित्र आत्मा झाल।
45 थथे यहूदीमखुपिन्त नं पवित्र आत्मां जाय्कादीगु खनाः पत्रुस नाप वःपिं यहूदी विश्वासीत अजूचाल,
46 छाय्धाःसा इपिं थी थी भासं नवानाः परमेश्वरयात तःधंका च्वंगु इमिसं ताल। अले पत्रुसं धाल --
47 “झीत थें थुमित नं पवित्र आत्मां जाय्कादी धुंकल। आः सुनां थुमित बप्तिस्मा बी मते धकाः पने फइ?”
48 थुलि धयाः वं इमित येशू ख्रीष्टयागु नामं बप्तिस्मा काये माः धकाः उजं बिल। अले इमिसं वयात छुं ई तक इपिं नापं च्वनादिसँ धकाः बिन्ति यात।