8
Yesu mtambika wetu mkomi
1 Topi, chilongu chitawukili chitudeta ndi achi, yufwi tuva na mtambika mkomi wa ndambu ayi, mweni kayikala liwoku lya mlilu wa chigoda cha wutwa wa Mkomi kumbindi kwa Chapanga.
2 Mweni akutawula ngimbaniku ya mtambika mkomi pala pang'alili munu, ndi mulibudi lya nakaka lyajengili mundu ha ila Bambu.
3 Kila mtambika mkomi kashawuliwa kumtawulila Chapanga ndawulilu na litambiku, topi mtambika wetu mkomi akudayiliwa ghavi na chindu cha kutawula.
4 Leki mweni angavelili wa apa pamlima nakamu angavelili ha mtambika, nongwa kuvavelili vatambika vamonga vakutawula litambiku ngimu wuvadayila Malawu.
5 Veni utambika wawu wuvelili chilangushilu awu lisisi lya fila fya kumbindi kwa Chapanga. Nongwa Musa pavelili samba ajengi libudi, Chapanga amuwombilili kucha, “Ugoli kila chindu ndambu wundikulangushili pawuveyi kula kuchidunda.”
6 Lakini ponopa Yesu kagayiliwa ngimbaniku ya utambika yivelili nyanyi pitu yawu, topi kava mjovesha wa lilaghanu linofu livelili nyanyi munu, milandu minofu Chapanga yajangili kugola.
7 Leki lila lilaghanu lya kwaa lingavelihela livifyu, tungavelili ha na natilu ya kuva na lya pili.
8 Lakini Chapanga avawonili vanavifyu padetili,
Bambu akudeta, “Majuva vakwisa,
dagoli lilaghanu lya shonu na vandu va Isilaeli na vandu va Yuda.
9 Lilaghanu ali dalivi ha kucha lililaghanu lila limikili na vavaha vawu,
mumajuva vala ndavakamulili kwa liwoku lyangu na kuvalongosha kufuma Misili.
Vaveli vakumbikana ha kwa lililaghanu lyangu.
Na nenga ndivayihola ha.
10 Ali ndi lilaghanu dagoli na vandu va Isilaeli,
majuva vesava,
damiki Malawu vangu mumahala vawu,
na kusiyandika mundima shawu.
Dandivi Bambu Chapanga wawu,
na veni davavi vandu vangu.
11 Kwahela mundu damuwuli mwanamlima yumonga,
awu yadayila kumuwombela mlongu waki,
‘Umumanyi Bambu.’
Nongwa vosi davamanyi nenga
kukandila mundu yangajila kujakwa na yajakwili.
12 Dandivapomeli vifyu shawu,
na dandisiholi ha sambi shawu.”
13 Kwa kudeta mulilaghanu lya shonu, Chapanga kasakasha lila lya kwaa na chochosi chisakalili na chikulukulu samba chiwuka.