Ivangeli
LikaMatewu
1
Usendo LukaJesu Khristu
1 Umbhalo wosendo lukaJesu Khristu indodana kaDavida, indodana ka-Abhrahama:
2 U-Abhrahama wayenguyise ka-Isaka,
u-Isaka uyise kaJakhobe,
uJakhobe uyise kaJuda labafowabo,
3 uJuda uyise kaPherezi loZera, unina owayenguThamari,
uPherezi uyise kaHezironi,
uHezironi uyise kaRamu,
4 uRamu uyise ka-Aminadabi,
u-Aminadabi uyise kaNashoni,
uNahishoni uyise kaSalimoni,
5 uSalimoni uyise kaBhowazi, unina owayenguRahabi,
uBhowazi uyise ka-Obhedi, unina owayenguRuthe,
u-Obhedi uyise kaJese,
6 uJese uyise wenkosi uDavida.
UDavida wayenguyise kaSolomoni, unina owayeke waba ngumka-Uriya,
7 uSolomoni uyise kaRehobhowami,
uRehobhowami uyise ka-Abhija,
u-Abhija uyise ka-Asa,
8 u-Asa uyise kaJehoshafathi,
uJehoshafathi uyise kaJehoramu,
uJehoramu uyise ka-Uziya,
9 u-Uziya uyise kaJothamu,
uJothamu uyise ka-Ahazi,
u-Ahazi uyise kaHezekhiya,
10 uHezekhiya uyise kaManase,
uManase uyise ka-Amoni,
u-Amoni uyise kaJosiya,
11 uJosiya owayenguyise kaJekhoniya labafowabo ngesikhathi bethunjwe eBhabhiloni.
12 Emva kokuthunjwa eBhabhiloni:
uJekhoniya wayenguyise kaSheyalithiyeli,
uSheyalithiyeli uyise kaZerubhabheli,
13 uZerubhabheli uyise ka-Abhiyudi,
u-Abhiyudi uyise ka-Eliyakhimu,
u-Eliyakhimu uyise ka-Azori,
14 u-Azori uyise kaZadokhi,
uZadokhi uyise ka-Akhimu,
u-Akhimu uyise ka-Elihudi,
15 u-Elihudi uyise ka-Eliyazari,
u-Eliyazari uyise kaMathani,
uMathani uyise kaJakhobe,
16 uJakhobe uyise kaJosefa, umkaMariya, owazala uJesu obizwa ngokuthi nguKhristu.
17 Ngokunjalo-ke, kwakulezizukulwane ezilitshumi lane sezizonke kusukela ku-Abhrahama kusiya kuDavida, ezilitshumi lane kusukela kuDavida kusiya ekuthunjweni yiBhabhiloni njalo ezilitshumi lane kusukela ekuthunjweni kusiya kuKhristu.
Ukuzalwa KukaJesu Khristu
18 UJesu Khristu wazalwa kanje: Unina uMariya wayethembise ukuthi uzakwendela kuJosefa kodwa kwathi bengakahlangani wabonakala esezithwele kwenziwe ngoMoya oNgcwele.
19 Ngoba umkakhe uJosefa wayeyindoda elungileyo emthethweni, njalo engafuni ukumyangisa ebantwini, wacabanga ukumala ngasese.
20 Uthe esekucabangile lokhu, kwafika kuye ingilosi yeNkosi ephutsheni yathi, “Josefa ndodana kaDavida, ungesabi ukuthatha uMariya ukuba abe ngumkakho ngoba lokhu akhulelwe ngakho kuvela kuMoya oNgcwele.
21 Uzabeletha indodana ozayetha ibizo uthi nguJesu ngoba uzasindisa abantu bakhe ezonweni zabo.”
22 Konke lokhu kwenzakala ukuze kugcwaliseke okwatshiwo yiNkosi ngomphrofethi ukuthi:
23 “Intombi egcweleyo izakhulelwa izale indodana, bayibize ngokuthi ngu-Emanuweli” (okutsho ukuthi, “uNkulunkulu ulathi”).
24 UJosefa esevukile ebuthongweni wenza lokho ingilosi yeNkosi eyayimlaye khona, wamthatha uMariya waba ngumkakhe.
25 Kodwa kazange embathe laye waze wabeletha indodana. Wayetha ibizo wathi nguJesu.