UHabhakhukhi
1
1 Isiphrofethi esemukelwa nguHabhakhukhi umphrofethi.
Insolo KaHabhakhukhi
2 Koze kube nini, awu Thixo, ngicela usizo,
kodwa ungalaleli na?
Loba ngimemezela kuwe ngisithi, “Udlakela!”
kodwa ungangihlengi na?
3 Kungani ungitshengisa okungasimfanelo na?
Kungani ubekezelela okungalunganga na?
Ukuchitheka lodlakela kuphambi kwami; kulokulwa,
lengxabano yandile.
4 Ngakho umthetho usuthundubezekile,
lokulunga akusabi khona.
Ababi baminyezela abalungileyo
ukuze ukulunga konakaliswe.
Impendulo KaThixo
5 “Khangelani ezizweni libone
njalo limangale kakhulu.
Ngoba ensukwini zenu
ngizakwenza into elingasoze liyikholwe,
lanxa lingabe litsheliwe.
6 Sengivusa amaKhaladiya,
lesiya isizwe esilesihluku lamawala,
esitshaya sibhuqe umhlaba wonke,
sithumba izindawo zokuhlala ezingasizo zaso.
7 Bayisizwe esesabekayo lesitshayisa uvalo;
bangumthetho bona ngokwabo
njalo baziphakamisa udumo lwabo.
8 Amabhiza abo alesiqubu esedlula esamahlosi,
ayesabeka kulezimpisi kusihlwa.
Amabhiza abo empi amatha ephulukundlela,
abagadi bawo amabhiza bavela khatshana.
Bandiza njengamanqe ehwitha ukudla,
9 bonke beza belande udlakela.
Amaxuku abo aqhubekela phambili njengomoya wasenkangala
abuthe abathunjiweyo njengenhlabathi.
10 Baklolodela amakhosi,
bahleke ababusi usulu.
Wonke amadolobho avikelweyo bayawahleka;
bakha amadundulu ngenhlabathi bawathumbe lawo madolobho.
11 Emva kwalokho badlula ngesiqubu njengomoya baqhubeke,
abantu abalecala abamandla abo angunkulunkulu wabo.”
Insolo Yesibili KaHabhakhukhi
12 Awu Thixo, kawuveli phakade na?
Nkulunkulu wami, Ngcwele wami, kasiyikufa.
Awu Thixo, ubabekile ukuba bahlulele.
Awu Dwala, ubamisile ukuba bajezise.
13 Amehlo akho ahlanzeke kakhulu ukuba akhangele okubi;
awungeke ubekezelele okungalunganga.
Pho kungani ubekezelela abachithayo na?
Uthulelani lapho ababi
beqeda labo abalunge kakhulu kulabo na?
14 Wenze abantu bafana lenhlanzi olwandle,
njengezidalwa zasolwandle ezingelambusi.
15 Isitha esibi siyazikhupha zonke ngewuka,
siyazibamba ngembule laso,
sizibuthele embuleni laso elidonswayo;
ngalokho siyajabula sithokoze.
16 Ngakho-ke senzela imbule laso umhlatshelo,
sitshisele imbule laso elidonswayo
impepha ngoba ngenxa yembule laso
sithe pekle phakathi kwenotho,
sizitika ngokudla okumnandi.
17 Kuzamele siqhubeke sithulula umambule waso,
sitshabalalisa izizwe kungekho sihawu na?