4
U-Israyeli Kakabuyeli KuNkulunkulu
1 Zwanini ilizwi leli lina mankomokazi aseBhashani phezu kweNtaba iSamariya,
lina besifazane elincindezela abayanga lichoboze abaswelayo
beselisithi kubomkenu, “Siletheleni okunathwayo!”
2 UThixo Wobukhosi usefunge ngobungcwele bakhe wathi:
“Isikhathi sizafika impela
lapho elizathathwa khona ngewuka,
owokucina wenu ngewuka yenhlanzi.
3 Lizaphuma ngamunye
ngezikhala emdulini liqonde nta phandle,
njalo lizalahlelwa ngaphandle ngokuya eHamoni,”
kutsho uThixo.
4 “Hambani eBhetheli liyekwenza isono;
hambani eGiligali liyekwenza isono ngokudlulayo.
Lethani imihlatshelo yenu nsuku zonke ekuseni
lokwetshumi kwenu minyaka yonke emithathu.
5 Tshisani isinkwa esilemvubelo njengomnikelo wokubonga
lintele ngeminikelo yenu yokuzithandela
lizikhukhumeze ngayo, lina bako-Israyeli,
ngoba lokhu yikho elithanda ukukwenza,”
kutsho uThixo Wobukhosi.
6 “Ngalilethela indlala emadolobheni wonke
lokusweleka kokudla emadolobheni wonke,
kodwa kalibuyelanga kimi,”
kutsho uThixo.
7 “Ngagodla izulu futhi
kusasele inyanga ezintathu ukuba kuvunwe.
Izulu ngalinisa kwelinye idolobho
kodwa ngaligodla kwelinye.
Enye insimu yaba lezulu,
enye kayaze yaba lalo njalo yoma qha.
8 Abantu babhadazela besuka kwelinye idolobho besiya kwelinye befuna amanzi
kodwa kabawatholanga anele ukuba bakholwe,
ikanti kalibuyelanga kimi,”
kutsho uThixo.
9 “Ezikhathini ezinengi ngahlasela izivande zenu lezivini zenu,
ngizihlasela ngesona langengumane.
Izintethe zadla imikhiwa yenu lezihlahla zenu zama-oliva,
kodwa kalibuyelanga kimi,”
kutsho uThixo.
10 “Ngathumela izifo phakathi kwenu
njengengakwenza kweleGibhithe.
Ngabulala izinsizwa zenu ngenkemba
ndawonye lamabhiza enu athunjwayo.
Ngavimbanisa amakhala enu ngomnuko wezihonqo zenu,
kodwa kalibuyelanga kimi,”
kutsho uThixo.
11 “Ngachitha abanye benu
njengalokhu ngachitha iSodoma leGomora.
Lalinjengesikhuni esitshayo esihluthunwe emlilweni,
kodwa kalibuyelanga kimi,”
kutsho uThixo.
12 “Ngakho-ke engizakwenza kuwe Israyeli yilokhu,
njalo njengoba lokhu ngizakwenza kuwe,
zilungisele ukuhlangana loNkulunkulu wakho, wena Israyeli.”
13 Yena obumba izintaba,
udala umoya,
aveze lemicabango yakhe ebantwini,
yena oguqula ukusa kube ngumnyama,
anyathele lezindawo eziphakemeyo zomhlaba,
uThixo uNkulunkulu uSomandla yilo ibizo lakhe.