85
Netatajtili para Toteco ma quintasojta nopa israelitame
1 TOTECO, ta techtitanilijtoc miyac tatiochihualisti cati cuajcualtzitzi ipan ni tali,
pampa sempa tiquinhualicac nica iixhuihua Jacob cati itztoyaj ipan sequinoc talme.
2 Tiquinquixtili inintaixpanolhua nochi momasehualhua.
Quena, tijtalpacho nochi inintajtacolhua.
3 Timoyoltali ica tojuanti huan ayecmo tahuel ticualantoc.
4 NoTeco Dios, ta cati titemaquixtía,
ama xijchihua para sempa ma timitzicnelica para ayecmo quema techajsis mohueyi cualancayo.
5 ¿O huelis tijsenhuiquilis ticualantos ica tojuanti para nochipa?
¿O huelis tijhueyilis mohueyi cualancayo para nochi xihuit?
6 Toteco Dios, sempa techtanana,
huan tojuanti timomasehualhua sempa timopaquilismacase ipan ta.
7 TOTECO, technextili mohueyi taicnelilis,
huan techmaquixti.
8 Na nijtacaquilijtoc nochi cati quiijtohua TOTECO Dios,
pampa yaya quincamanalhuis itatzejtzeloltica masehualhua cati quintapejpenijtoc.
Huan cati quiijtos quinmacas tasehuilisti ipan iniyolo,
para inijuanti ma ayecmo mocuepaca ipan nopa ojti ten huihuiyot campa nemiyayaj ipan tajtacoli.
9 Melahuac Toteco Dios itztoc nechca para quinmaquixtis masehualme cati quitepanitaj huan quiimacasij quiixpanose.
Se tonali ihueyitilis Toteco quitemitis total.
10 Campa hueli oncas taicnelijcayot huan cati melahuac.
Campa hueli nochi quimatise para quichihuase nochi cati xitahuac huan quej nopa oncas tasehuilisti campa hueli.
11 Cati melahuac elis campa hueli ipan taltipacti,
huan yaya cati senquisa xitahuac hualtachixtos ten nepa ilhuicac huan paquis ica cati quiitas.
12 Quena, TOTECO quititanis itatiochihual ipan ni total,
huan nochi cati tijtocase temacas itajca.
13 Campa hueli campa yas Toteco oncas cati melahuac,
huan nochipa iojhui elis xitahuac.