74
Ma tijtemoca Toteco quema tocualancaitacahua techtatzacuiltíaj
1 Toteco Dios, ¿para ten techtahuelcajtoc para nochipa?
¿Para ten tahuel ticualani ica tojuanti cati tiitztoque quej timopilborregojhua?
2 Xiquelnamiqui para tojuanti timomasehualhua cati timocohui huejcajquiya quema titetequipanohuayayaj san tapic.
Quena, techtapejpeni para techchihuas timoaxcahua.
Nojquiya tijtapejpeni nopa altepet Jerusalén para tijchihuas quej elisquía mochaj ipan ni taltipacti.
3 Xihuala xiquitaqui quenicatza quitamisosolojtoque nopa altepet,
huan xijtachili quenicatza tocualancaitacahua quisosolojtoque motiopa.
4 Nopona tzajtzique mocualancaitacahua ica paquilisti quema tasosolojque.
Teipa san techhuetzquilijque huan quinquetzque ininteteyohua para quinextise ya techtantoyaj.
5 Hualajque ica inihachas huan huejhueyi martillos hasta nesiyaya quej cuajcuahuini tatajco cuatitamit.
6 Huan ama ica ininteposhua quitapanque huan quisosolojtoque nochi tamanti cati ica tayejyecchijtoyaj motiopa.
7 Quena, motiopa quitatijque,
huan quimahuispolojque moyoyoncal cati quihuicayaya motoca,
huan quitahuisojque talchi.
8 Huan quiijtojque ipan iniyolo:
“Ma tijtamisosoloca nochi cati onca ipan ni tali.”
Huan yajque campa hueli huan quitatijque nochi israelita tiopame,
campa timosentiliyayaj para timitzhueyichihuase, Toteco Dios.
9 Ayecmo onca yon se tamanti cati quinextía para timomasehualhua.
Ayecmo onca tajtolpanextiani.
Ayecmo aqui huelis techilhuis hasta quema tamis nochi ya ni.
10 Toteco Dios, ¿hasta quema tamis mitzmahuispolohuaj mocualancaitacahua?
¿Amo quema tiquintatzacuiltis?
11 ¿Para ten tihuejcahua para techpalehuis?
¿Para ten amo tijnextía mohueyi chicahualis huan techpalehuía?
12 Hasta ten huejcajquiya Toteco Dios eliyaya notanahuatijca.
Yaya nechpalehuijtoc ipan ni taltipacti huan campa hueli campa niyajtoc.
13 Ica mochicahualis tijxelo hueyi at.
Huan tiquintzontamilti huejhueyi tapiyalme cati temajmatijque cati itztoyaj ipan at.
14 Tijtzonxamani nopa hueyi tapiyali cati itoca Leviatán,
huan inacayo tiquinmacac ma quicuaca nopa tecuanime cati itztoyaj ipan huactoc tali.
15 Tijchijqui ma meya at ipan huejhueyi amelme huan para hueyame ma quipiyaca at.
Nojquiya tiquinhuatzqui hueyame cati amo quema huactoyaj.
16 Ta moaxca tonali huan yohuali.
Ta tijchijchijqui metzti huan tonati.
17 Ta tijtamachijqui hasta canque tamis taltipacti.
Nojquiya ta tijchihua ma tatotoniya huan ma taseseya.
18 TOTECO, xiquita quenicatza mitzmahuispolohuaj mocualancaitacahua,
huan quenicatza mitztaijilhuíaj nopa masehualme cati mohueyimatij.
19 ¡TOTECO, amo techtahuelcahua!
Xijmanahui mopaloma imaco nopa cuatojti.
Quena, xiquinmanahui momasehualhua inimaco nopa masehualme cati itztoque quej tecuanime.
20 ¡Xiquelnamiqui nopa camanal sencahuali cati tijchijtoc ica tojuanti!
Pampa ni tali temitoc ica tzintayohuilot huan ica masehualme cati mosisiníaj.
21 Amo xijcahua para talojtzitzi ma techmahuispoloca tojuanti cati tijpanotoque miyac taohuijcayot.
Xiquinpalehui cati teicneltzitzi huan amo teno quipiyaj para huelis mitzpaquilismacase.
22 Toteco Dios, ximotanana huan ximomanahui ica cati quiijtohuaj mocualancaitacahua.
Xiquelnamiqui nochi nopa camanali cati ica mitztaijilhuijtoque nochi se tonal.
23 Amo xiquelcahua quenicatza mitztelchijtoque mocualancaitacahua,
pampa inijuanti noja más mitztaijilhuíaj.