71
Netatajtili ten se huehue tacat cati itztoc xitahuac iixpa Toteco
1 ¡TOTECO, na san ipan ta nimotemachijtoc!
¡Amo quema techpinahualti!
2 ¡Techmanahui ten nocualancaitacahua,
pampa ta tixitahuac!
¡Techchololti inimaco!
Ximohuijtzoma quentzi para techtacaquilis huan techmaquixti.
3 Nochipa san nimotatijtoc huan nimotemachijtoc ipan ta para amo nechajsise nocualancaitacahua.
Nijmati para ta titanahuatijtoc ma nechmaquixtica pampa san ipan ta huelis nimomanahuis.
4 NoTeco Dios, techmanahui inimaco ni mosisinijca tacame huan temictiani.
5 TOTECO, ta cati titoTeco, san ipan ta nimotatzquilijtoc,
huan san ipan ta nimotemachijtoc hasta ten quema niconetzi.
Huan quej nopa nitelpocatixqui.
6 Ta nochipa tiitztoc nohuaya hasta quema noja niitztoya iijtico nonana.
Quena, ten iijtico nonana ta techquixti huan nochipa techpalehuijtoc.
¡Yeca tahuel nijnequi nimitzpaquilismacas para nochipa!
7 Miyac san nechtachilíaj pampa quiitaj quenicatza techmocuitahuía.
8 Semilhuit nimitzpaquilismacas huan nimitzhueyimatis por nochi cati techchihuilijtoc.
9 Amo techtahuelcahua ama quema ya nihuehuentzi huan ayecmo nijpiya fuerza.
10 Pampa nocualancaitacahua nechejelnamiquij,
huan san sejco mosentilijque inihuaya sequinoc cati quinequij nechmictise.
11 Huan quiijtohuaj:
“¡Ma tijtepotztocaca para tiquitzquise pampa iDios ya quitahuelcajtoc,
huan amo aqui huelis quimanahuis!”
12 ¡Toteco Dios, amo ximohuejcachihua ten na!
¡NoTeco, xihuala nimantzi techpalehuiqui!
13 Xiquinpinahualti huan xiquintzontamilti nopa nocualancaitacahua cati quinequij nechchihuilise cati fiero.
Quena, ma ayecmo quimatica taya quichihuase.
14 Pero na más nimotemachis ipan ta para techpalehuis.
Huan noja más nimitzpaquilismacas.
15 Nochi masehualme niquinilhuis para san ta ticuali huan niquinpohuilis quenicatza techmanahuijtoc,
huan techmocuitahuijtoc mojmosta.
Amo hueli nijpohuas quesqui huelta techmanahuijtoc ica cati amo cuali pampa tahuel miyac.
16 Nochi tonali ninejnemi ica nopa chicahualisti cati techmaca, TOTECO, ta cati tinoDios.
Huan nochi masehualme niquinilhuía para san ta tixitahuac huan ticuali.
17 ¡Toteco Dios, ta techpalehuijtoc hasta quema noja nieliyaya niconetzi!
Hasta ama noja niquinpohuilijtinemi sequinoc ten nopa huejhueyi tamanti cati tijchijtoc.
18 ¡Toteco Dios, ama quema ya nihuehuentzi huan nitzonchipahuac,
amo techtahuelcahua!
Noja techmaca nemilisti para niquinpohuilis ten mohueyi chicahualis ni masehualme cati itztoque ama huan cati teipa tacatise.
19 Toteco Dios, mochicahualis huan cati xitahuac tijchihua onajsi hasta ilhuicac.
Ta tijchijtoc huejhueyi tamanti.
Amo onca seyoc Dios quej ta.
20 Ta techcahuilijtoc ma nijpano huejhueyi taohuijcayot huan tequipacholi.
Pero nijmati para teipa, sempa techtananas ten campa nopa ostot,
huan tijchihuas ma nimoyolcui.
Huan sempa nijpiyas nemilisti.
21 Huan huajca achi más techhueyitalis huan sempa techyoltalis.
22 Huan na nimitzpaquilismacas ica tatzotzonali ten arpa huan guitarra.
NoTeco Dios, nihuicas tiohuicat cati tepohuilía para tijchihua nochi cati tiquijtohua.
Ta titoTeco tiisraelitame huan titatzejtzeloltic huan nelía titemachti.
23 Ica paquilisti nitzajtzis huan nihuicas para niteilhuis quenicatza techmaquixtijtoc.
24 Semilhuit nitepohuilis para ta tijchihua cati xitahuac,
pampa nochi cati quinequiyayaj nechmictise tiquinpinahualti huan tiquinechcapantali.