58
Se netatajtili para Toteco ma quintatzacuilti cati amo tatepanitaj
1 ¡Amojuanti anmasehualme cati anquipiyaj tequiticayot para antetajtolsencahuaj!
¿Nelía xitahuac anquintajtolsencahuaj?
2 ¡Amo! San anmoilhuíaj cati fiero huelis anquichihuase.
Anquichijtoque para noja más ma onca tatehuilisti ipan amotal.
3 Nopa masehualme cati amo quitepanitaj Toteco pejque moiyocacahuaj hasta quema tacatque.
Huan ipa istacatij hasta quema pejque huelij camanaltij.
4 Inijuanti tencocoque quej cohuame cati temictíaj ica inintencococa.
Huan itztoque quej nopa cohuame cati momatij quicaquij inintoscac inintecohua,
pero ayecmo quinequij quinneltocase.
5 Monacastzacuaj huan ayecmo quichihuilíaj cuenta,
masque inintecohua quintatzotzonilíaj cuajcualtzi para ma quinneltocaca.
Huan nimantzi tetzacaníaj.
Quej nopa itztoque ni fiero masehualme.
6 NoTeco Dios, xiquintamiltili ininchicahualis.
Quena, xiquinquixtili ininchicahualis nopa masehualme cati mosisiníaj,
quej tiquinquixtilisquía inintancoch huan inintacuayo nopa tecuanime.
7 Ma ixpolihuica quej ixpolihui nopa at cati toyahui ipan huactoc tali.
Huan nopa teposti cati quipixtoque inimaco para ica tatehuíaj,
ma eli quej amo teno ipati.
8 Ma elica quej nopa tenaquisti cati atiya quema noja nentinemi.
O ma elica quej se pilconetzi cati tacatqui mictoc huan cati amo quema quiitac tatanexti.
9 Toteco Dios quinixpolihuiltis cati huehuentzitzi huan cati telpocame.
Quintzontamiltis nelnimantzi quej se chachapali cati nimantzi totoniya ica nopa tit cati lementoc ica huitzcuahuit.
10 Pero cati itztoque xitahuaque iixpa Toteco,
paquise quema quiitase para Toteco ya momacuectoc ica nopa masehualme cati amo teno quitepanitaj,
huan moicxipajpacase ica inieso nopa masehualme.
11 Huan huajca nochi masehualme quiijtose:
“Nelía quiselíaj se cuali taxtahuili nopa masehualme cati itztoque xitahuaque,
pampa melahuac itztoc se Dios cati tetajtolsencahua xitahuac ipan ni taltipacti.”