36
Inintajtacol masehualme huan iteicnelilis TOTECO
1 Nijpixtoc ipan noyolo cati nijnequi niteyolmelahuas ten inintajtacol amo cuajcualme.
Amo cuajcualme quielcahuaj Toteco Dios huan amo quiimacasij.
2 Mohueyimatij ica iniselti hasta moilhuíaj para yaya amo quichihuilía cuenta nochi cati fiero quichijtinemij,
huan yeca amo quintatzacuiltis.
3 Quisa inincamaco senquisa cati fiero huan cati amo melahuac.
Quipolojtoque inintalnamiquilis,
huan ayecmo quichihuaj cati cuali.
4 Quema motecaj ipan inintapech para cochise,
san moilhuíaj taya tajtacoli quichihuase.
Moneltatzquilijtoque ipan iniojhui cati fiero huan san cati amo cuali quinequij.
5 TOTECO, motasojtacayo quinajsi nochi masehualme huan onajsi hasta ilhuicac huan hasta campa mixti.
Nelía titemachti.
6 Tiitztoc tahuel tixitahuac huan amo quema timopata.
Tiitztoc temachti quej nopa huejhueyi tepeme campa tahuel tahuejcapa.
Nelxitahuac titetajtolsencahua,
huan amo hueli tijmachilíaj motalnamiquilis,
pampa eltoc quej nopa hueyi at cati tahuel huejcata.
¡TOTECO! Ta san se tiquinmocuitahuía quej masehualme huan tecuanime.
7 Toteco Dios, nelía cuajcualtzi moteicnelilis cati amo quema techcahua.
Yeca masehualme cati quipiyaj tanahuatili huan cati teicneltzitzi monechcahuíaj campa ta para xiquinmanahui.
Quena, mochihuaj quej pilpiyotzitzi cati calaquij ieltapaltzala ininana.
8 Masehualme cati mitztemohuaj ixhuij cuali ica nopa tatiochihualisti cati tiquinmaca nepa mochaj.
Eltoc quej se hueyi tacualisti cati techtencahuilía toixpa.
Techcahuilía ma tiatica ipan nopa atajti cati temaca ajhuiyac at.
Quena, nochi cati tijtajtaníaj techmaca.
9 Pampa ta techmaca nemilisti nochi cati tiitztoque,
huan pampa techmaca taahuili, tojuanti tihuelij titachiyaj.
10 Nimitztajtanía para mojmosta techicneli tojuanti cati timitzixmatij.
Nochipa techchihuilía cati xitahuac nochi tojuanti cati ipan toyolo tijnequij tijchihuase cati cuali.
11 Amo xijcahua para ma moquejquetzaca nopani inijuanti cati mohueyimatij.
Yon amo xiquincahuili ma nechquixtica amo cuajcualme.
12 Se tonali niquijtos:
“¡Xiquitaca quenicatza ama huetztoque nochi tajtacolchijca masehualme cati mosisiníaj!
Toteco Dios quintahuisojtoc para ayecmo huelise motananase.”