33
Se huicat para quihueyichihuase TOTECO
1 Xihuicaca ica paquilisti para TOTECO amojuanti cati anitztoque xitahuac iixpa.
Nelía cuajcualtzi para nochi tojuanti cati tijchijtinemij cati cuali ma tijhueyichihuaca.
2 Xitatzotzonaca ica arpa para xijhueyichihuaca, TOTECO.
Xihuicaca iixpa huan xijpaquilismacaca ica tatzotzonali cati nesi quej guitarra.
3 Xijsencahuaca se huicat cati yancuic,
huan xijhuicatica TOTECO.
Xitatzotzonaca cuali,
huan xitzajtzica ica paquilisti.
4 Pampa nelía xitahuac nochi cati quiijtohua TOTECO.
Nochi cati quichihua tenextilía para temachti.
5 TOTECO quipactía nochi cati xitahuac huan cati melahuac.
Nochi cati itztoque ipan taltipacti quiselíaj itaicnelilis TOTECO.
6 TOTECO tanahuati ma onca ilhuicacti huan mochijqui.
San camanaltic huan mochijqui metzti, tonati huan nochi sitalime.
7 Yaya quisejcotili nochi at cati eltoc ipan hueyi at.
Quiajojqui nopa at campa más tahuejcata.
8 Nochi antaltipac ehuani xijhueyitepanitaca TOTECO.
Quena, nochi cati anitztoque ipan ni taltipacti xiquimacasica.
9 Pampa nochi cati yaya quiijto,
ya nopa mochijqui.
Huan cati yaya tanahuati ma eli,
ya nopa monexti.
10 TOTECO quinsosolhuilía inintalnamiquilis masehualme ipan campa hueli talme para amo ma quichihuaca cati fiero moilhuijtoque.
San tailpitzas huan quincuapolos talme para amo huelise quichihuase cati fiero quisencajtoque quichihuase.
11 Pero cati TOTECO moilhuijtoc quichihuas amo quema mopatas.
Cati ya quinequi,
ya nopa elis para nochipa.
12 Paquij masehualme ipan nopa tali cati motemachíaj ipan TOTECO.
Quena, nelía paquij nopa masehualme cati TOTECO quintapejpenijtoc para iaxcahua.
13 TOTECO cati itztoc nepa ilhuicac techhualtachilijtoc nochi timasehualme.
14 Hasta nepa ipan ilhuicac TOTECO techtachilijtoc cati tiitztoque ipan ni taltipacti.
15 Yaya TOTECO cati quichijchijqui toyolo nochi titaltipac ehuani huan quitachilía nochi cati tijchijtinemij.
16 Se hueyi tanahuatijquet amo tatani pampa quinpiya miyac isoldados.
Yon se soldado cati motemaca amo tatani pampa quipiya miyac fuerza.
17 Amo ximotemachi ipan se cahuayo para mitzmanahuis masque nelía tetic.
San ica ifuerza amo hueli temanahuía.
18 Pero TOTECO, quena, yaya nochipa techtachilijtoc tojuanti cati tiquimacasij tiquixpanose.
Techmocuitahuía cati timochiyaj ipan itaicnelilis.
19 Techmanahuía quema tiitztoque nechca miquilisti.
Huan techtamacas quema oncas mayanti para noja ma tiitztoca.
20 Tojuanti ipan toyolo timotemachíaj ipan TOTECO.
Yaya techpalehuía huan techmanahuía ten cati amo cuali.
21 Yeca ma tiyolpaquica ipan TOTECO,
pampa timoneltemachijtoque ipan yaya cati nelía tatzejtzeloltic.
22 TOTECO, xijpiya moyolo ica tojuanti,
pampa san ipan ta timochiyaj.