26
Nopa nemilisti cati tahuel tapajpacti
1 TOTECO, techtajtolsencahua.
Xiteyolmelahua para amo teno cati fiero nijchijtoc.
Nimotemachijtoc san ipan ta huan amo quema nimoilhuijtoc nimitzcahuas.
2 Techyoltachili, TOTECO,
huan techyejyeco.
Xijtachili cuali noyolo huan notalnamiquilis cati más noyolijtic eltoc.
3 Pampa na nijpatiita motaicnelilis, huan nochipa nijtoquilía mocamanal cati melahuac.
4 Amo quema ninejnentoc inihuaya masehualme cati tacajcayahuaj,
yon amo nimohuicatoc inihuaya cati quipiyaj ome inixayac.
5 Nijcualancaita inintasentilis amo cuajcualme.
Amo quema nimosentilijtoc inihuaya cati fiero quichihuaj.
6 Tapajpacti nomax ten nochi tajtacoli,
huan san quej nopa nimonechcahuis motaixpa, TOTECO.
7 Nepa nihuicas huicat para nimitzhueyitalis huan niteyolmelahuas nochi cati cuajcualtzi cati ta tijchijtoc.
8 Tahuel niquicnelía mochaj campa tiitztoc, TOTECO,
campa monextía motatanex.
9 Amo techchihuili quej tiquinchihuilía tajtacolchihuani huan temictiani.
10 Inijuanti quisencahuaj quenicatza huelis tetacuijcuilise.
Quipiyaj inimax temitoc ica tomi cati ichtaca tainantoque.
11 Pero na ninemi xitahuac.
Xijpiya hueyi moyolo ica na,
huan techmaquixti.
12 TOTECO, nimitzhueyichihua miyacapa.
Ica ta, cuali niijcatoc,
huan amo techcahuilijtoc ma nihuetzi.