15
Nopa masehualme cati itztotij ipan itepe tatzejtzeloltic Toteco Dios
1 TOTECO, ¿ajquiya huelis calaquis ipan mochaj campa ta timocahua ipan motepe cati tatzejtzeloltic?
¿Ajquiya huelis itztos nepa para tijmocuitahuis?
2 San calaquis ya cati amo aqui huelis quitelhuis ica yon se tamanti cati amo cuali.
Quena, san yaya cati quichihua cati cuali.
Huelis yas san cati quiijtohua cati melahuac ica nochi iyolo,
3 huan amo tetaijilhuía.
Itztoti nepa cati amo quimahuispolohua cati itztoc icalnechca,
huan cati amo quinequi quinyolcocos sequinoc.
4 Nepa calaquis cati quihuejcamajcahua nochi cati fiero,
huan quinicnelía cati mitztepanitaj huan quiimacasij mitzixpanose.
TOTECO, ipan mochaj itztose cati quitamichihuaj cati mocajtoque quichihuase masque nelohui huan quincocohua para quichihuase.
5 Nepa calaquise cati tainamaj pilquentzi itanca quema tetanejtíaj tomi,
huan amo quinistacahuíaj cati amo taixpanotoque,
masque sequinoc quintencahuilíaj tomi para ma istacatica.
Quena, inijuanti cati quichihuaj ni cuali tamanti amo aqui hueli quintanis,
pampa ta tiquinmocuitahuis.