146
San ma timotemachica ipan Toteco
1 Na nijhueyimatis TOTECO ica nochi noyolo.
2 Nochi tonali ipan nonemilis nijpaquilismacas TOTECO.
Nihuicas tiohuicat para noTeco Dios hasta nimiquis.
3 Amo ximotemachica ipan huejhueyi tacame cati quipiyaj tequiticayot,
yon ipan se ten hueli tacat pampa yon se masehuali amo huelis mitzmaquixtis.
4 Pampa se tonali miquise nochi masehualme huan mocuepase tali.
Quena, tamis iniijyoyo huan ininemilis,
huan ica se talojtzi tamis nochi cati moilhuijtoyaj quichihuase.
5 Pero nelía paqui nopa masehuali cati quipixtoc quej itapalehuijca yaya cati iTeco Jacob,
huan san ipan TOTECO iDios motemachía para quimocuitahuis.
6 Yaya cati quichijchijqui ilhuicacti,
taltipacti, hueyi at huan nochi cati itztoque nopona.
Yaya cati quichihua nochi cati quitajtolcajtoc para quichihuas.
7 TOTECO quinchihuilía cati xitahuac nochi teicneltzitzi cati sequinoc quintaijyohuiltíaj.
Huan quintamaca cati mayanaj.
Quinchihua ma yaca majcajtoque cati tzactoque masque amo teno quichijtoque.
8 TOTECO quintachiyaltía popoyotzitzi.
Quintanana cati nechca itztoque para huetzise.
Huan quinicnelía cati monejnemiltíaj xitahuac iixpa.
9 TOTECO quinmocuitahuía nopa seyoc tali ehuani.
Yaya quinmocuitahuía cati icnotzitzi huan cati sihuame icnotzitzi.
Pero yaya quisosolohua cati quisencahuaj masehualme cati amo quitepanitaj.
10 TOTECO tanahuatis para nochipa.
Amojuanti ipan altepet Jerusalén,
amoTeco Dios elis nopa Tanahuatijquet,
cati quinnahuatis nochi masehualme cati tacactiyase para nochipa.
¡Paquilisti!