140
Toteco techmanahui inimaco amo cuajcualme
1 TOTECO, techmanahui inimaco nopa taixpanoca masehualme.
Techmocuitahui para tatehuijca tacame amo huelis nechcocose.
2 Inijuanti nochi se tonal quisencahuaj quenicatza quichihuase tamanti cati amo cuali.
Talojtzitzi quinequij quipehualtise cualanti.
3 Inincamanal tecocohua quej itencococa se cohuat o se colot.
4 TOTECO, techmocuitahui para amo nihuetzis inimaco masehualme cati amo cuajcualme,
huan cati tetaijilhuíaj,
pampa inijuanti moilhuijtoque quenicatza nechhuihuiitase.
5 Nopa masehualme cati mohueyimatij quitalijtoque se taquetzti para ma nimasi.
Quitalijtoque se lazo para ica nechcuapilose para nimohuisos ajacatipa.
Nechchiyaj ica se matat para nechmasiltise.
6 Na nimitzilhuijtoc, TOTECO, para ta tinoDios.
Techtacaquili quema nimitztzajtzilía.
7 Ta tiTOTECO Dios, tinotemaquixtijca,
ta tijpiya nochi chicahualisti para techmaquixtis.
Ta techmocuitahuía quema onca tatehuilisti.
8 TOTECO, amo xiquincahua ma tatanica nopa masehualme cati amo mitztepanitaj.
Amo xiquinpalehui para quisas cuali cati quinequij quichihuase para ma amo mohueyimatica.
9 Xijchihua para nochi tamanti cati moilhuijtoque quichihuase ma huetzi ininpani.
Ma tzontamica senquisa quej quisencajtoyaj nechtzontamiltise na.
10 Ipan inintzonteco ma huetzi ticoli,
o xiquinmajcahua ipan tit,
o ipan ostot cati tahuel huejcata campa ayecmo huelise quisase.
11 Amo xiquincahuili ma tatanica ipan total nopa masehualme cati quinpactía istacatise.
Más cuali nimantzi xiquintatzacuilti.
12 Pero na cuali nijmati para ta, TOTECO,
tiquinpalehuis nopa teicneltzitzi cati inijuanti quintepotztocatinemij.
Ta tiquinpalehuis cati teicneltzitzi para ma quisa cuali para inijuanti quej quinamiqui.
13 Huan masehualme cati itztoque xitahuaque mitztascamatise,
pampa quimatij para temachti itztotij moixpa.