132
Netatajtili para Toteco ma quitiochihua nopa tiopamit
1 TOTECO, xiquelnamiqui David huan quenicatza taijyohui.
2 Xiquelnamiqui quenicatza David tatestigojquetzqui ica ta, TOTECO,
cati tiiTeco Jacob, Cati Tijpiya Nochi Chicahualisti.
3 Quiijto:
“Amo nicalaquis nocalijtic,
yon amo nimotecas ipan notapech para nicochis.
4 Amo niixijcopis, yon amo nicochis yon se talojtzi,
5 hasta nijpantis se lugar campa huelis nijchihuas ichaj TOTECO para ipan ma itzto,
yaya cati iTeco Jacob, Cati Quipiya Nochi Chicahualisti.”
6 Tijcajque camanaltij ipan tali Efrata para iCaxa TOTECO eltoya nopona,
huan teipa tijpantijque huejca ten altepeme ipan cuatitamit.
7 Huajca ama ma tiyaca ipan itiopa Toteco.
Ma tiyaca timotancuaquetzatij iixpa para tijhueyichihuase.
8 TOTECO, ximotanana huan xicalaqui ipan nopa tiopamit campa eltoc moCaxa,
cati quiixnextía mochicahualis.
9 Nopa totajtzitzi cati tiquintapejpenijtoc ma moquentica iniyoyo chipahuac cati quinixnextía para tatzejtzeloltique,
huan nochi masehualme cati tiquiniyocatalijtoc ma tzajtzica ica paquilisti.
10 NoTeco, pampa tiquicnelía motequipanojca David,
amo ximoicancuepa ten nopa tanahuatijquet cati ta tijtapejpeni,
para quinnahuatis momasehualhua.
11 Pampa ta, TOTECO, tijtajtolcahuili David,
huan amo quema tiquelcahua tijtamichihuas cati tijtajtolcahua tijchihuas.
Huan ta tiquilhui para teipa tiquintalis iixhuihua ipan isiyaj para tanahuatise.
12 Huan sinta iixhuihua quichihuase cati quiijtohua nopa camanal sencahuali cati tijchijqui ica David huan sinta quitepanitase motajtol,
huajca inijuanti nojquiya mosehuise ipan isiyaj para tanahuatise para nochipa.
13 Pampa ta TOTECO, tijtapejpenijtoc altepet Jerusalén para tiitztos nopona.
14 Tiquijto:
“Ya ni elis nochaj campa niitztos para nochipa.
Nopona nimocahuas pampa ya nopa cati nijnequi.
15 Nijtiochihuas miyac ni altepet huan niquintamacas imasehualhua cati teicneltzitzi.
16 Niquinmaquixtis itotajtzitzi ten nochi cati quinequij quincocose,
huan itatzejtzeloltica masehualhua tzajtzise ica paquilisti.
17 Nopa chicahualisti cati David quipixqui sempa nijchihuas para monextis ipan icone,
huan yaya cati nicaltijtoc para nijtequimacas quej tanahuatijquet elis quej se taahuili para imasehualhua.
18 Icualancaitacahua niquintahuisos ipan se hueyi pinahualisti,
pero yaya cati tanahuatijquet tanahuatis cuali huan monextis nochi ihueyitilis.”