130
Ximotemachica ipan Toteco para amechmanahuis
1 TOTECO, quema nimopantía ipan se hueyi taohuijcayot,
na nimitztzajtzilía para techtitanili motapalehuil.
2 Toteco, techtacaquili quema nimitznojnotza.
Xijchihuili cuenta cati nimitztajtanía huan techpalehui.
3 TOTECO, sinta tiquelnamiquisquía nochi totajtacolhua,
amo aqui huelisquía moquetzas moixpa.
4 Pero ta nelía titetapojpolhuía,
para nochi masehualme ma mitztepanitaca.
5 Na nimochiya ipan ta, TOTECO, para techpalehuis,
Quena, ica nochi noyolo nimotemachía ipan nopa cati techtajtolcahuilijtoc ipan mocamanal.
6 Ipan noalma senquisa nitachixtoc para ta, TOTECO, xitequiti.
Nitachixtoc para techpalehuis,
quej nopa tamocuitahuiani quichiyaj ma tanesi.
Quena, más nitachixtoc huan amo quej tamocuitahuiani cati tahuel quinequij ma tanesi.
7 Nochi anisraelitame, ximotemachica ipan TOTECO,
pampa san yaya quipiya hueyi iyolo huan san yaya temaquixtía talojtzitzi.
8 Yaya quinmaquixtis israelitame ten nochi inintajtacolhua.