115
Toteco huan teteyome
1 ¡TOTECO, amo techhueyitali tojuanti!
¡Ximohueyitali ta!
Xijchihua para nochi ma mitzpaquilismacaca pampa ta tahuel titetasojta huan tijchihua cati nelía melahuac.
2 Amo xiquincahuili para nopa masehualme ipan sequinoc talme ma quiijtoca:
“¿Canque itztoc ininDios?”
3 Ta toTeco Dios, tiitztoc nepa ilhuicac,
huan nochi cati tijnequi tijchihuas, ta tijchihua.
4 Pero nopa masehualme quinitaj quej inintecohua nopa teteyome cati quinchijchijtoque ica oro huan plata.
5 Quipiyaj inincamac, pero amo camanaltij.
Quipiyaj iniixteyolhua, pero amo tachiyaj.
6 Quipiyaj ininacas, pero amo tacaquij.
Quipiyaj iniyacatzol, pero amo taijyotilanaj.
7 Quipiyaj inimax, pero amo hueli quiitzquíaj yon se tamanti.
Quipiyaj inimetz, pero amo nejnemij.
Amo huelij camanaltij.
8 Huan nochi masehualme cati quinchijchijtoque nopa teteyome nelía huihuitique quej nopa teteyome,
huan nojquiya san se huihuitique cati quinhueyichihuaj.
9 ¡Anisraelitame, ximotemachica ipan TOTECO,
pampa san yaya amechpalehuía huan amechmanahuía
ten nochi tamanti cati amo cuali!
10 Antotajtzitzi cati aniixhuihua Aarón huan aniaxcahua TOTECO,
ximotemachica ipan ya,
pampa san yaya amechpalehuía huan amechmanahuía ten nochi tamanti cati amo cuali.
11 Nochi amojuanti cati anquiimacasij huan anquitepanitaj TOTECO ximotemachica ipan ya,
pampa san yaya amechpalehuía huan amechmanahuía ten nochi tamanti cati amo cuali.
12 TOTECO talojtzitzi techelnamiqui huan yeca temachti techtiochihuas.
Techtiochihuas tiiisraelita masehualhua.
Quintiochihuas nopa totajtzitzi cati iixhuihua Aarón.
13 Quena, Toteco quintiochihuas nochi cati quiimacasij huan quitepanitaj.
Quintiochihuas cati huejhueyi huan cati pilquentzitzi.
14 Tahuel miyac TOTECO ma amechtiochihua amojuanti huan amoconehua.
15 Quena, TOTECO cati quichijqui ilhuicacti huan taltipacti,
yaya cati amechtiochihuas.
16 Nochi ilhuicacti iaxca TOTECO,
pero ni taltipacti quinmacatoc masehualme.
17 Cati mictoque amo huicaj huan quihueyimatij TOTECO.
Inijuanti ayecmo hueli moliníaj.
18 Pero tojuanti, quena, tojuanti tijhueyimatise TOTECO ama huan para nochipa.
¡Xijhueyimatica TOTECO!
¡Paquilisti!