9
Jesús quichicajqui se popoyotzi
1 Jesús nejnemiyaya ipan ojti, huan quiitac se tacat cati eliyaya popoyotzi hasta quema tacatqui.
2 Huan tiimomachtijcahua tijtatzintoquilijque:
―Tamachtijquet, ¿ajquiya itajtacol para elqui popoyotzi ne tacat? ¿Eltoya itajtacol inana o itata o san ya itajtacol?
3 Huan Jesús techilhui:
―Amo tacatqui popoyotzi pampa ya itajtacol, yon pampa itajtacol inana, yon itata. Tacatqui quej nopa para monextis ipan ya cati Toteco ica ihueyi chicahualis hueli quichihua.
4 Monequi nijchihuas nopa tequit cati Toteco nechtitantoc ma nijchihua amantzi quema noja tonaya huan onca tonali, pampa san quentzi polihui para tayohuiyas huan ayecmo aqui huelis tequitis.
5 Ama quema noja niitztoc ipan ni taltipacti, niitztoc itaahuil ni taltipacti huan niquintaahuilijtos masehualme ipan inintalnamiquilis.
6 Huan quema quiijtojtoya ni camanali, Jesús chajchac huan quichijqui soquit ica ichajchac huan quitalili nopa soquit ipan iixteyol nopa tacat cati popoyotzi.
7 Huan quiilhui:
―Xiya, ximoixteyolpajpacati ipan nopa ameli cati itoca Siloé. (Siloé quinequi quiijtos: ‘Tatitanili’.)
Huajca nopa popoyotzi yajqui moixteyolpajpacato huan quema tacuepili, cuali hueliyaya tachiya.
8 Huajca nochi icalnechcahua huan nochi cati quiixmatiyayaj quema noja itztoya popoyotzi moilhuijque:
―¿Amo yaya ni tacat cati mosehuiyaya ojtipa huan motaejehuiyaya?
9 Huan sequij quiijtojque:
―Quena, yaya.
Sequinoc quiijtojque:
―Amo ya, pero elisnequi quej ya.
Pero nopa tacat iselti quiijto:
―Quena, na cati achtohuiya nieltoya nipopoyotzi.
10 Huajca quitatzintoquilijque:
―¿Quenicatza huelqui titachixqui?
11 Huan quinnanquili:
―Se tacat cati itoca Jesús quichijqui soquit, huan nechtalili ipan noixteyol huan nechilhui ma niya nimoixteyolpajpacati ipan nopa ameli cati itoca Siloé. Huajca niyajqui huan nimoixteyolpajpajqui huan huajca huelqui nitachixqui.
12 Huan quitatzintoquilijque:
―¿Canque itztoc nopa tacat Jesús?
Huan nopa tacat cati eltoya popoyotzi quinilhui:
―Amo nijmati.
Nopa fariseos quitatzintoquilijque nopa tacat cati Jesús quitachiyalti
13 Huan quihuicaque nopa tacat cati eltoya popoyotzi iniixpa nopa fariseos.
14 Huan eltoya sábado nopa tonali quema tiisraelitame timosiyajquetzaj quema Jesús quichijqui soquit huan quichicajqui nopa tacat, huan nopa fariseos moilhuijque eliyaya se tequit.
15 Huajca inijuanti nojquiya quitatzintoquilijque quenicatza huelqui tachiya. Huan quinilhui:
―Nechtalili soquit ipan noixteyol huan nimoixteyolpajpacato, huan huajca nitachixtehua.
16 Huajca sequij ten nopa fariseos quiijtojque para Toteco amo quititantoya nopa tacat cati quichijqui ya ni pampa tequitic ipan sábado quema monequi timosiyajquetzase. Pero sequinoc moilhuiyayaj para se taixpanoquet amo hueltosquía quichijtosquía se hueyi tanextili quej ni. Huajca motajcoxelojque.
17 Huan sempa nopa fariseos quitatzintoquilijque nopa tacat cati mochicajtoya:
―¿Taya tiquijtohua ta ten yaya cati mitztachiyalti?
Huan nopa tacat quiijto:
―Yaya se tajtolpanextijquet.
18 Nopa israelita tayacanani amo quineltocayayaj sinta nelía nopa tacat eliyaya cati achtohuiya eltoya popoyotzi huan cati ama hueli tachiya, huajca quinnotzque inana huan itata.
19 Huan nojquiya quintatzintoquilijque:
―¿Nelía, ni amotelpoca? ¿Nelía tacatqui popoyotzi? Huajca, ¿quenicatza hueli tachiya ama?
20 Huan inana huan itata quinnanquilijque:
―Tojuanti tiquixmatij ni totelpoca huan tijmatij tacatqui popoyotzi.
21 Pero amo tijmatij quenicatza hueli tachiya ama, yon amo tijmatij ajquiya quichicajqui iixteyol. Xijtatzintoquilica ya, pampa ya motacachijtoc huan yaya huelis amechilhuis quenicatza elqui.
22 Inana huan itata quiijtojque ya ni pampa quinimacasiyayaj nopa tayacanani ten israelitame cati ya teyolmelajtoyaj sinta se masehuali quiijtosquía para Jesús eltoya nopa Cristo cati Toteco quiijto para quititanisquía, huajca ayecmo quicahuilisquíaj ma calaqui ipan tiopamit.
23 Huajca inana huan itata quiijtojque:
―Xijtatzintoquilica ya, pampa ya motacachijtoc.
24 Huajca ica ompa quinotzque nopa tacat cati achtohuiya eltoya popoyotzi huan quiilhuijque:
―Xijhueyichihua Toteco Dios huan techilhui yaya mitzchicajqui, huan amo Jesús, pampa tojuanti tijmatij ni Jesús se tajtacolchijquet.
25 Huajca nopa tacat quinnanquili:
―Amo nijmati sinta yaya se tajtacolchijquet o amo. San ya ni cati nijmati. Achtohuiya niitztoya nipopoyotzi huan ama hueli nitachiya.
26 Yeca inijuanti sempa quitatzintoquilijque:
―¿Taya mitzchihuili? ¿Quenicatza mitztachiyalti?
27 Huan nopa tacat quinilhui:
―Ya nimechilhui huan amo antechcajque. ¿Para ten anquinequij ma nimechilhui sempa? ¿Huelis anquinequij anquitoquilise nojquiya?
28 Huan nopa tayacanani quiajhuaque nopa tacat cati achtohuiya eltoya popoyotzi huan quiilhuijque:
―Ta tijtoquilía Jesús, pero tojuanti tijtoquilíaj Moisés.
29 Tijmatij Toteco quicamanalhui Moisés, pero nopa Jesús amo tijmatij canque huala.
30 Huajca nopa tacat quinilhui:
―¿Taya ya ni? Amo anquimatij canque hualajqui, pero yaya nechtachiyalti.
31 Nochi tijmatij para Toteco amo quintacaquilía huan quinpalehuía amo cuajcualme. Pero sinta se masehuali quitepanita Toteco huan quichihua cati ipaquilis, huajca quena, Toteco quitacaquilis cati quitajtanis.
32 Hasta ten quema pehua taltipacti huan hasta ama, amo aqui quicactoc ten se acajya cati hueli quitachiyaltía se cati tacatqui popoyotzi.
33 Sinta Toteco amo quititantosquía ni Jesús, huajca amo huelisquía nechchicajtosquía.
34 Huajca nopa israelita tayacanani quiilhuijque:
―¡San tiixtaca conet! ¿Tijnequi techmachtis tojuanti?
Huan quicuatopejtiyajque tiopan calteno.
Masehualme cati popoyotzitzi ipan iniyolo
35 Huan Jesús quicajqui para quiquixtijtoyaj ipan tiopamit nopa tacat cati eltoya popoyotzi, huajca yajqui quitemoto. Huan quema quipanti, quiilhui:
―¿Tijneltoca Icone Toteco?
36 Huan nopa tacat quitatzintoquili:
―Tate, ¿ajquiya nopa? Techilhui pampa nijnequi nijneltocas.
37 Huan Jesús quiilhui:
―Amantzi tiquita ajquiya, pampa na cati nimitzcamanalhuía, niIcone Toteco.
38 Huan ni tacat quiijto:
―NohueyiTeco, nimitzneltoca.
Huan nopa tacat motancuaquetzqui huan quihueyimatqui Jesús.
39 Huan Jesús quiilhui:
―Nihualajtoc ipan taltipacti para nijsencahuas nochi para ma eli xitahuac. Nihualajqui para masehualme cati eliyayaj quej popoyotzitzi ma quiitaca cati melahuac, huan para inijuanti cati moilhuíaj ya quimachilíaj nochi tamanti ma mocahuaca popoyotzitzi ipan inintalnamiquilis.
40 Huan sequij fariseos cati itztoyaj ihuaya quicajque cati quiijto huan quitatzintoquilijque:
―Huajca timoilhuía para tojuanti tipopoyotzitzi ipan totalnamiquilis. ¿Amo que?
41 Huan Jesús quinilhui:
―Sinta nelía anitztosquíaj anpopoyotzitzi huan amo anquiitztosquíaj huan anquimachilijtosquíaj nochi cati nijchijtoc, huajca amo anquihuicatosquíaj tajtacoli. Pero pampa anquiijtohuaj nelía cuali antachiyaj huan anquimachilíaj cati nijchijtoc, huajca nelía anquihuicaj tajtacoli pampa amo antechselijtoque na.