☰ Matyu 1
Miti Mande Matyuko
Nakayáŋaró Mu
Mande Kembé
Sokome ŋako Yesuko Mesaiya tero maheró koro sowo mande ka. Komo suki uni kato sokome ŋa Grik mandewore nakayáŋaró, quko eneŋo owí kama nakayáŋaró. Tukú Anutu koro huru-huru koro tapá uni kumimbo ŋande yaŋgurí, ko Matyu, Yesu koro iŋo-iŋo rewero uni qu kato, nakayáŋaró. Ŋundiro naŋge nore sokome ŋaro yeteto, “Miti Mande Matyuko Nakayáŋaró Mu,” dokoro Mesaiya maheró koro piŋa mande ŋuko miti mande ŋundiro. Sokome nakayáŋaró quro naruyó muko 65AD peka. (Asa “65AD” murí muko ŋandiro, Yesu pisiyaró, yate kumima naru 65 ŋunde rotaró. Nore kumima naru 2,000 ŋunde rotoro yate itaka yoteto.)
Asa Matyuko mande ŋa nakayáŋaró ŋuro murí muko ŋandiro: Yesuko Mesaiya naŋge, ko norendo sokome ŋa weyoro ŋunde qene iŋowato. Enendo Yesu koro yoto-yotoyó soso ŋuro kama nakayáŋaró. Kini, Yesu koro nimímbo pisiyaró ŋuro nakayáŋaró, ko eneŋo kumima naru kapusa weŋayó quro nakayáŋaró. Dokoro kumima naru kapusa quroko ŋuno khoyó parámi taró.
Ŋu naruko ŋuno Israel mirako ŋuno Juda unipareto eneŋo miraye kama sopoyaŋgurí. Hamó, eneŋo uni kembéyembo sopo yereŋgurí, quko wiri yerete uni meyowombo uni kembé ŋu wiri yereyara. Wiri yerete uni parámi ŋuko Rom uni ka, ko eneŋo kuma unindo unipare soso mirane-mirane kondé yondowoyaŋgurí.
Asa nimímbo Yesu pisiyoní parámi tero hurí tero kho tero Anutuko unipareto wiri yereweya naruyó ŋuro yesowoyaró. Yate-yate Juda koro uni kembé-kembémbo Yesu koro mandí ŋuro piyimiŋoro saŋgirí tero rero Rom koro sopo-sopo unindoro kandímo raŋgurí. Ŋunde raŋoyi Yesu uroní khumaró. Khumoní Anutuko riní pitu ko otoqaró. Ko enendo itaka samboko yote.
1
Yesu koro usisambapukoyó
(Luk 3:23-38)
1 Ŋako Yesu Kristo koro usisambayó ŋuro sowo mande qu. Yesuko Dewit koro sowe qu ko Dewitko Abraham koro sowe qu.*
2 Abraham ŋuko Aisak koro iwí.
Aisak ŋuko Yakop koro iwí.
Yakop ŋuko Juda koya topé-topémboya awaye.
3 Juda ŋuko Peres koya Sera koro awayari. Náyari muko Tamar.
Asa Peres ŋuko Hesiron koro iwí.
Hesiron ŋuko Ram koro iwí.
4 Ram ŋuko Aminatap koro iwí.
Aminatap ŋuko Nason koro iwí.
Nason ŋuko Salamon koro iwí.
5 Salamon ŋuko Boas koro iwí. Boas ŋuro nimí muko Rahap.
Asa Boas ŋuko Opet koro iwí. Opet ŋuro nimí muko Rut.
Asa Opet ŋuko Jesi koro iwí.
6 Jesi ŋuko wiri yerete uni Dewit ŋuro iwí.
Dewit ŋuko Solomon koro iwí. Solomon nimí ŋuko komo Uria koro parí yora.
7 Asa Solomon ŋuko Rehopoam koro iwí.
Rehopoam ŋuko Apiya koro iwí.
Apiya ŋuko Asa koro iwí.
8 Asa ŋuko Jehosapat koro iwí.
Jehosapat ŋuko Joram koro iwí.
Joram ŋuko Usia koro iwí.
9 Usia ŋuko Jotam koro iwí.
Jotam ŋuko Ahas koro iwí.
Ahas ŋuko Hesekia koro iwí.
10 Hesekia ŋuko Manase koro iwí.
Manase ŋuko Amos koro iwí.
Amos ŋuko Josaia koro iwí.
11 Josaia ŋuko Jehoiakin koya topé-topémboro awaye. Ŋu naru ŋunoko Bapilon unindo Israel unipare yorero Bapilon mirako kusi yereŋgurí.
12 Asa Bapilon ŋuno kusi yiri yoroyi, yate naru ŋu kini taró.
Naru ŋu kini tiníqo, Jehoiakinko Sealitiel pisiyaró.
Sealitiel ŋuko Serupapel koro iwí.
13 Serupapel ŋuko Apiut koro iwí.
Apiut ŋuko Eliakim koro iwí.
Eliakim ŋuko Asoru koro iwí.
14 Asoru ŋuko Satok koro iwí.
Satok ŋuko Akim koro iwí.
Akim ŋuko Eliuti koro iwí.
15 Eliuti ŋuko Eleasar koro iwí.
Eleasar ŋuko Matan koro iwí.
Matan ŋuko Yakop koro iwí.
16 Yakop ŋuko Josep koro iwí. Ko Josep ŋuko Maria koro kamí.† Asa Mariako Yesu pisiyaró, eneko, “Kristo,” ‡ ŋu yero nekoyoteŋgo.
17 Ŋunde ŋuroko Abraham noŋgo yate-yate Dewit tunoqaró ŋuko wini 14 ŋunde taŋgurí. Ko Dewit noŋgo yate-yate Bapilon unindo Israel kusi yereŋgurí, ŋuko wini 14 ŋunde taŋgurí. Ko Bapilon kusi yereŋgurí, ŋu noŋgo yate-yate Kristo tunoqaró ŋuko wini 14 ŋunde taŋgurí.
Mariako Yesu pisiyaró
(Luk 2:1-7)
18 Asa Yesu Kristo§ tunoqaró ŋuro sowo mande ŋandiro. Nimí Maria koya Josep koya, epe re-re tewari, yero piŋa mande yunori iŋaŋgurí. Quko ene kopo kama yate, Maria qahu tiní qeneŋgurí. Ŋuko Yuqa Surumí** qundo kho tiní qahu taró. 19 Josep ŋuko uni roneneŋowí.†† Ŋunde ŋuroko Maria qahu tiní rotowero iŋaró. Ŋunde quko unipare toŋeyemo kowi piyo Maria inowero ŋuro piyimiŋaró. Ŋunde ŋuro mondó ta rotowero iŋaró.‡‡
20 Josepko pare rotowero ŋuro watí iŋoyoní, Uni Parámimboro sambo simómbo§§ suwono quko ŋande miraró, “Josep, keko Dewit koro wini qu, ke Maria pareke reweya ŋuro ma sasaro tewero. Iŋo, simó qahímo yote ŋuko Yuqa Surumí qundo re ina. 21 Ŋuko simó urumuni pisiyoweya. Ko owí muko Yesu*** ye qembe, dokoro enendo unipareyó quhuríye moŋgo yoreweya.” †††
22 O soso tunoqaró ŋuko Anutu koro ye-ye unindoro‡‡‡ mande qu ka riní hamó tunoqaró. Mande ŋuko ŋandiro, 23 “Pare kato kamímboya kama eteyate, ŋundo simó ka urumuni pisiyoweya. Pisiyoní owí Emanuel yewaŋgo.” §§§ (Owé ŋuro murí muko ŋandiro, “Anutuko noreya yote.”)
24 Asa Josep eteyate otoqoro Uni Parámimboro sambo simómbo miraró ŋu naŋge howero Maria koya epe re-re tariyó. 25 Quko ene ŋuya kama eteyari, yate-yate oro Maria simó urumuni pisiyaró. Pisiyoní owí Yesu nekaró.
* 1:1 “Abraham” ŋuko Juda uniparetoro pukoye. Abraham yotoro khumaró, yate-yate Dewit tunoqiní Anutuko Dewit rokóŋoní Juda unipare wiri yereró. Ŋu naruko ŋuno Anutuko ŋande yaró, ko imemoŋgo enendo Dewit koro sowe qu ka riní tunoqiní Dewit takaro wiri yerete uni parámi tunoqeweya. Juda unipareto uni maheweya ŋu “Kristo,” ma, “Mesaiya,” ye nekoro sopaŋgurí. Asa Yesu mahiní eneŋo unipareyó, “Kristo Yesu,” ma, “Yesu Kristo,” naŋge ye nekaŋgurí. † 1:16 Josepko Yesu aratu te inaró. Ŋunde ŋuroko Yesu ŋuko Dewit koro sowe qu. ‡ 1:16 “Kristo” ŋuko Anutuko rokóŋoní mahero wiri yerete uni parámi horé tunoqaró ŋu. § 1:18 “Yesu Kristo” - komo suki ye-ye unindo Anutuko uni ka rokóŋoní mahero wiri yerete uni parámi horé tunoqeweya qu karo yaŋgurí. Juda unipareto uni maheweya ŋu, “Kristo,” ma, “Mesaiya,” ye nekaŋgurí. Asa Yesu mahiní eneŋo unipareyó, “Kristo Yesu,” ma, “Yesu Kristo,” naŋge ye nekaŋgurí. ** 1:18 “Yuqa Surumí” ŋuko Anutu koro Yuqa naŋge. †† 1:19 “uni roneneŋowí” ŋuko Anutuko qenero potó moré kini tiní eneŋo uniyó tunoqete. ‡‡ 1:19 Josepko, Mariako o piyimi tero qahu taró, ye iŋaró tiníqo, enendo meté rero mande khono rotoweya. §§ 1:20 “sambo simó” ŋuko komo suki-suki Anutuko unipare kama yoriní tunoqi sambo simó yondowaró. Ko itaka eneŋo sunará teyoteŋgo. *** 1:21 Owé ŋu, “Yesu,” ŋuro murí muko ŋandiro: “Uni Parámimbo rambaruru koŋgo yoreyote.” ††† 1:21 Anutuko hamó uniparetoro quhuríye moŋgo yoreweya, ko ŋu murí ŋuko ŋandiro: enendo quhuríye se rotoweya, ko eneya newonde kanata tewaŋgo. ‡‡‡ 1:22 “ye-ye uni” ŋuko Anutuko mandí yunoní unipare yunaŋgurí. §§§ 1:23 Aisaia 7:14 Komo suki Aisaiako mande ŋu nakayáŋaró, yate kumima naru 700 rotoro Yesu tunoqaró.
☰