10
1 Mɛ‐daa ana yɛ mi‐supu ana, mɛ kɔkɔlɔ biti yɛ mɛ kabwaarɛ‐kʋlɛ ɩ gyɛ yɛ Ɩbwaarɛ ɔ mɔlɩgɛ Ɩsɩrayɩ abi.
2 Lɩɩ fɛɛ n taalɛ gyii kesintin lɩɩ bamʋ sʋ kaapʋ fɛɛ bɛɛ payɩ ansi bee buu Ɩbwaarɛ bɩrɛ, amaa bamʋ kensi payɩ man yɩlɛ kinyi sʋ.
3 Nɩɩ ba man nyi kanan mʋ nɩɩ Ɩbwaarɛ ɩɩ kɔɔlɛ asa fɛɛ bamʋ ɩkpa i kyiigi mʋ asɛ. Ɩmʋ sʋ bɛɛ kɩɩ fɛɛ bamʋ gbaa‐gbaa bamʋ awaasa ɩ yɛgɛ nɩɩ bamʋ ɩkpa i kyiigi. Ɩmʋ sʋ ba man bɩya bamʋ n‐yɩɩ kasɛ ba buu Ɩbwaarɛ ɩkpa mʋ nɩɩ ɩ yɛgɛ o kyula fɛɛ bamʋ ɩkpa i kyiigi mʋ asɛ.
4 Ɩmʋ kesintin ɩ gyɛ yɛ Krisito ɩ waa nbara mu kusun mʋ lʋwɛ, nɩɩ ɔkʋmaa mʋ nɩɩ ɔ kɔɔlɛ mʋ gyii mʋ, Ɩbwaarɛ ii biti ɔ tɔwɛ yɛ mʋ ɩkpa i kyiigi mʋ asɛ.
5 Mosesi kaapʋ asa kanan mʋ nɩɩ ba buu nbara mʋ, kɛ Ɩbwaarɛ ɔ kɔɔlɛ bamʋ fɛɛ bamʋ ɩkpa i kyiigi mʋ asɛ. Nɩɩ ɔ kyʋrɔɔ yɛ, “Ɔsa kʋmaa mʋ nɩɩ o buu ɩnɩmʋ mʋ ee biti ɔ nyɛ nkpa lɩɩ ɩmʋ sʋ.”
6 Amaa fɛɛ kanan mʋ nɩɩ Asɩnkyan yɩlasa mʋ ɩ tɔwɛ lɩɩ kɩkɔɔlɛ‐gyii mʋ nɩɩ ɩ yɛgɛ nɩɩ Ɩbwaarɛ ɩ kɔɔlɛ asa yɛ bamʋ ɩkpa i kyiigi mʋ asɛ mʋ ɩ gyɛ fɛɛ, “Man kan tɔwɛ fʋ kɔkɔlɔ tɔ yɛ, anɩmʋ ii biti o dii kpee sʋsʋ? (ɩmʋ ɩ gyɛ yɛ, kɛ ɔ kpɩlɩgaa Yesu ba kasɛ),
7 abɛɛ man tɔwɛ yɛ, anɩmʋ ii biti ɔ kpɩlɩgɛ kpee kasɛ‐kasɛ tɔ? (ɩmʋ ɩ gyɛ yɛ, kɛ ɔ naa kʋsaa Yesu lɩɩ kamandɛ tɔ ba.)”
8 Amaa nɛnɛ nɩɩ ɩ kyaga sʋ ɩ tɔwɛ? “Ɩbwaarɛ asɩn mʋ i tiri fʋ tɔ, nɩɩ ɩ bʋ fʋ kɔnɔ tɔ yɛ fʋ kɔkɔlɔ tɔ.” Ɩnɩmʋ ɩ gyɛ kɩkɔɔlɛ‐gyii asɩn mʋ nɩɩ an tɔwɛ mʋ.
9 Nɩɩ fʋ kan taa fʋ kɔnɔ lɛɛ tɔwɛ yɛ, Yesu ɩ gyɛ Ɔnyɩrɩpɛ mʋ, nɩɩ fʋ kɔɔlɛ gyii fʋ kɔkɔlɔ tɔ yɛ Ɩbwaarɛ kyiŋi mʋ lɩɩ lewu tɔ mʋ, fii biti fʋ nyɛ kamɔlɩgɛ.
10 Lɩɩ fɛɛ kɔkɔlɔ tɔ nɩɩ nyɩmɩsa ɩ kɔɔlɛ ee gyii, nɩɩ Ɩbwaarɛ kɔɔlɛ mʋ fɛɛ mʋ ɩkpa i kyiigi. Nɩɩ ɔ kan lɛɛ kɔnɔ tɔwɛ yɛ Yesu ɩ gyɛ Ɔnyɩrɩpɛ mʋ, ee biti ɔ nyɛ kamɔlɩgɛ.
11 Fɛɛ kanan mʋ nɩɩ Ɩbwaarɛ Asɩnkyan yɩlasa mʋ ɩ tɔwɛ yɛ, “Ɔkʋmaa mʋ nɩɩ ɔ kɔɔlɛ mʋ gyii mʋ, ɔ mɛɛ yɛ o gyii ipeeli kpaa.”
12 Gyiwu abi ba man kwɩɩ yɛ bamʋ nɩɩ ba man gyɛ Gyiwu abi mʋ tɔ. Lɩɩ fɛɛ Ɔnyɩrɩpɛ kʋlʋn ɩ gyɛ Ɔnyɩrɩpɛ sa asa kpini. Nɩɩ ɔ sʋ kʋsee kʋkyɔ ɛɛ sa ɔkʋmaa mʋ nɩɩ ɛɛ tɩɩ mʋ kɩtɩɩ mʋ,
13 fɛɛ kanan mʋ nɩɩ Asɩnkyan yɩlasa mʋ ɩ tɔwɛ yɛ, “Ɔkʋmaa mʋ nɩɩ ɔ tɩɩ Ɔnyɩrɩpɛ mʋ kɩtɩɩ mʋ, ee biti ɔ nyɛ kamɔlɩgɛ.”
14 Nɛnɛ nɩɩ bee biti ba waa kɛ bamʋ nɩɩ ba man pɩɩta kɔɔlɛ mʋ gyii mʋ, ba taalɛ tɩɩ mʋ kɩtɩɩ? Nɩɩ ba man kan nu mʋ asɩn mʋ, nɛnɛ nɩɩ bee biti ba waa kɛ ba kɔɔlɛ mʋ gyii? Nɩɩ ɔkʋ man pɩɩta tɔwɛ bamʋ abwaarɛsɩn mʋ, nɛnɛ nɩɩ bee biti ba waa kɛ ba nu?
15 Nɩɩ ɔkʋ man kan sun bamʋ yɛ ba naa tɔwɛ asɩn danbɩrasa mʋ, nɛnɛ nɩɩ bee biti ba waa kɛ ba naa tɔwɛ asɩn mʋ? Ɩbwaarɛ Asɩnkyan yɩlasa mʋ ɩ tɔwɛ yɛ, “Bamʋ nɩɩ ba naa bɛɛ tɔwɛ asɩn danbɩrasa mʋ, bamʋ kɩnatɛ mʋ kɩ bʋrɔn gaa.”
16 Amaa man gyɛ Ɩsɩrayɩ abi kpini ɩ kɔɔlɛ asɩn danbɩrasa mʋ gyii. Lɩɩ fɛɛ Ɩbwaarɛ ɔtɔwɛpʋ Isaya tɔwɛ yɛ, “Ɔnyɩrɩpɛ Ɩbwaarɛ, anɩmʋ ɩ kɔɔlɛ anɛ asɩn tɔwɛsa mʋ gyii?”
17 Kanɩn bɩrɛ lɩɩ asɩn danbɩrasa mʋ kɩtɔwɛ lɩɩ Yesu Krisito sʋ nɩɩ asa bee nu asɩn mʋ. Nɩɩ lɩɩ asɩn mʋ kinu sʋ, nɩɩ asa bɛɛ kɔɔlɛ bee gyii.
18 Amaa n taasɛ yɛ, Gyiwu abi mʋ nɩɩ ba man kɔɔlɛ gyii mʋ, ba man nu asɩn mʋ nɩn? Ba nu yɛ bamʋ asʋ. Asɩnkyan yɩlasa mʋ ɩ tɔwɛ yɛ,
“Asɩn danbɩrasa kɩtɔwɛ mʋ, ii kpee dulinyaa tɔ kpini,
nɩɩ asɩn tɔwɛsa nɩmʋ i kpee ɩsʋwʋlɛ kpini sʋ.”
19 N bɩla taasɛ yɛ, “Ɩsɩrayɩ abi ba man nu kasɛ nɩn? Ba nu kasɛ, lɩɩ fɛɛ Mosesi wʋla gyankpaa tɔwɛ bamʋ yɛ, Ɩbwaarɛ yɛ,
‘N biti n taa bamʋ nɩɩ ba man gyɛ Gyiwu abi mʋ,
nɩɩ ba man gyɛ kʋbʋ fɛɛ fanɛ mʋ, waa fanɛ kensi payɩ.
N biti n taa asa mʋ nɩɩ ba man nyi mɛ mʋ waa fanɛ agbʋ.’
20 Nɩɩ ɔtɔwɛpʋ Isaya yɩlɛ kɩnyɩntɔ kyaga sʋ tɔwɛ fɛɛ Ɩbwaarɛ yɛ,
‘Bamʋ nɩɩ ba man kɩɩ biti mɛ gbaa mʋ, bamʋ nɩɩ n yɛgɛ nɩɩ ba wu mɛ.
Nɩɩ bamʋ nɩɩ ba man taasɛ mɛ sʋ mʋ, n lɛɛ mɛ n‐yɩɩ n kaapʋ bamʋ.’
21 Amaa lɩɩ Ɩsɩrayɩ abi mʋ sʋ bɩrɛ Ɩbwaarɛ tɔwɛ yɛ,
‘Halɩɩ Ɩsɩrayɩ abi ba maa bamʋ kʋsʋ tɔ ɔlʋn,
yɛ bamʋ kikina mɛ sʋ mʋ, n san n da kɩbaa n tɩɩ bamʋ kakɛ kʋmaa yɛ ba ba mɛ asɛ.’ ”