19
Ba bun Yesu oyu laasa sʋ
lewu kʋpwɛ
(Matiwu 27:27-31; Maki 15:6-20; Luka 23:13-25)
1 Tʋtɔ nɩɩ Paleti taa Yesu sa, nɩɩ ba tɩŋɛ mʋ awulibi.
2 Nɩɩ anaakɔpʋ mʋ ba taa iwii bɔɔ kuwura‐wʋrʋ bun mʋ, nɩɩ ba bun mʋ kɩrɩman‐kyu balɩmaasʋ fɛɛ owura.
3 Nɩɩ bɛɛ ba mʋ asɛ bɛɛ tɔwɛ mʋ yɛ, “Eee! Gyiwu abi owura, eee, owura!” Nɩɩ bɛɛ kpee bɛɛ kpa mʋ ɩtan.
4 Nɩɩ Paleti bɩla lɩɩ ba kewu Gyiwu abi mʋ asɛ ba tɔwɛ bamʋ yɛ, “Fan nu nfɩɩ, n sʋ mʋ n bɩya fanɛ, kɛ fan bɩɩ fɛɛ mɛɛ mɛ n man wu alibi akʋ mʋ sʋ, mʋ nɩɩ n taa bun mʋ kʋpwɛ.”
5 Yesu maa lɩɩ ba mʋ, o bun iwii kuwura‐wʋrʋ yɛ kɩrɩman‐kyu balɩmaasʋ, nɩɩ Paleti tɔwɛ asa mʋ yɛ, “Fan kɩɩ, ɔnyɩn mʋ ndee!”
6 Aseepu bɩlɩsa yɛ Gyiwu anaakɔpʋ ba maa wu Yesu mʋ ba kuusi yɛ, “Da mʋ mata oyu laasa sʋ mɔɔ. Da mʋ mata.” Nɩɩ Paleti tɔwɛ bamʋ yɛ, “Fanɛ gbaa‐gbaa fanɛ fan taa mʋ naa da mata oyu laasa sʋ. Mɛɛ mɛ n man wu alibi akʋ mʋ nɩɩ n taa bun mʋ kʋpwɛ.”
7 Nɩɩ Gyiwu abi mʋ ba lɛɛ Paleti kɔnɔ yɛ, “An sʋ nbara kʋ nɩɩ ɩɩ kaapʋ fɛɛ ɔnyɩn nɩmʋ dagaa maa wu, lɩɩ fɛɛ ɔ tɩɩ mʋ n‐yɩɩ yɛ mʋ gyɛ Ɩbwaarɛ Mu‐Bii.”
8 Paleti maa nu ɩnɩmʋ mʋ kufuu kɩ kɩtaa mʋ tii sʋ.
9 Nɩɩ o bwiiyaa Yesu loo kɩkpaara mʋ tɔ nɩɩ ɔ taasɛ mʋ yɛ, “Fɩnɛ nɩɩ fʋ lɩɩ?” Amaa Yesu man tʋwɛ mʋ.
10 Nɩɩ ɔ bɩla taasɛ mʋ yɛ, “Fu kina mɛ asɛ kɩ tɔwɛ? Fʋ man nyi fɛɛ n sʋ ɔlʋn n taalɛ yɛgɛ fʋ natɛ kɩyan, abɛɛ ba da fʋ mata oyu laasa sʋ mɔɔ?”
11 Nɩɩ Yesu lɛɛ mʋ kɔnɔ yɛ, “Nɩɩ Ɩbwaarɛ daa ɔ man sa fʋ ɔlʋn mɛ sʋ nɩn, naafɔɔ fʋ mɛɛ taalɛ waa mɛ sɛhn. Amaa ɔnyɩn mʋ nɩɩ ɔ lɛɛ mɛ sa fʋ mʋ, mu alibi ɩ kyɔ fʋ lɛɛ gaa.”
12 Paleti maa nu kanɩn mʋ, o biti ɔkpa mʋ nɩɩ ɔ bɔla yɛgɛ Yesu ɔ natɛ kɩyan. Amaa Gyiwu abi mʋ ba kuusi yɛ, “Fʋ dan kan yɛgɛ nɩɩ ɔnyɩn nɩmʋ natɛ kɩyan bɩrɛ, fʋ man gyɛ Owura lala Kasaro mʋ kyɛmɩnɛ. Kpalɩ fɛɛ ɔkʋmaa mʋ nɩɩ ɛɛ tɩɩ mʋ n‐yɩɩ yɛ ɔ gyɛ owura mʋ, gyɛ Owura lala Kasaro mʋ dʋn nɩn.”
13 Paleti maa nu kanɩn mʋ, ɔ taa Yesu lɩɩ ba kɩlandɛ sʋ, nɩɩ Paleti naa kyɩna kagya mʋ nɩɩ awura bɛɛ kyɩna kɩmʋ tɔ bɛɛ gyii asɩn mʋ. Bɛɛ tɩɩ tʋtɔ yɛ, “Abuu ɔtagakpa.” Gyiwu abi katɔwɛ tɔ bɛɛ tɩɩ kɩmʋ yɛ, “Gabata.”
14 Kanɩn kakɛ maŋa gyɛ kakɛ kʋlasa sa Kesu kɔnɔ Kanyaŋɛ nbunɔ kensi‐gyii mʋ. Lɩɩ ɩ maa fʋʋ kyɔwɛ amu nsana mʋ.
Nɩɩ Paleti tɔwɛ Gyiwu abi mʋ yɛ, “Fan kɩɩ fanɛ Owura!”
15 Nɩɩ Gyiwu abi ba kuusi yɛ, “Mɔɔ mʋ, mɔɔ mʋ. Da mʋ mata oyu laasa sʋ mɔɔ.”
Nɩɩ ɔ taasɛ bamʋ yɛ, “N mɔɔ fanɛ owura mʋ abɛɛ?”
Nɩɩ aseepu bɩlɩsa mʋ ba lɛɛ kɔnɔ yɛ, “A man sʋ owura kʋ tii Owura lala Kasaro sʋ.”
16 Tʋtɔ maŋa nɩɩ Paleti taa mʋ sa bamʋ yɛ ba naa da mʋ mata oyu laasa sʋ mɔɔ.
Ba da Yesu mata
oyu laasa sʋ
(Matiwu 27:32-44; Maki 15:21-32; Luka 23:26-43)
Ɩmʋ sʋ anaakɔpʋ mʋ ba taa Yesu kyʋn.
17 Nɩɩ Yesu lɩɩ tʋtɔ ɔ kyɛ mʋ oyu laasa naa fʋʋ katɩn mʋ nɩɩ bɛɛ tɩɩ yɛ “Kumu kawɛ opula.” Nɩɩ bɛɛ tɩɩ kɩmʋ Gyiwu abi katɔwɛ tɔ yɛ, “Goligota” mʋ.
18 Tʋtɔ nɩɩ ba da mʋ anyenbi mata oyu laasa sʋ. Nɩɩ ba bɩla da asa nyɔ anyenbi mata iyu laasa sʋ, ɔkʋ bʋ mʋ gyisa sʋ nɩɩ ɔkʋ mɔɔ bʋ mʋ bɩna sʋ.
19 Nɩɩ Paleti yɛgɛ nɩɩ ba kyʋrɔɔ asɩn gyaga kʋtɔ kʋ sʋ naa mata oyu laasa mʋ sʋ yɛ, “YESU KANASARETI‐NYƖN, GYIWU ABI OWURA.”
20 Ba kyʋrɔɔ ɩmʋ Gyiwu abi yɛ Roma abi yɛ Giriki abi ntɔwɛ tɔ, nɩɩ Gyiwu abi gaalaagaa ba kalɛ ɩmʋ, lɩɩ fɛɛ katɩn mʋ nɩɩ ba da mʋ mata oyu laasa sʋ mʋ, man bʋ kata yɛ kadɛ mʋ.
21 Nɩɩ Ɩbwaarɛ aseepu bɩlɩsa mʋ ba ba tɔwɛ Paleti yɛ, “Man kyʋrɔɔ yɛ ‘Gyiwu abi Owura’, amaa kyʋrɔɔ yɛ ‘Ɔnyɩn nɩmʋ ɩ tɔwɛ yɛ mʋ ɩ gyɛ Gyiwu abi owura.’ ”
22 Nɩɩ Paleti tɔwɛ bamʋ yɛ, “Kʋtɔ mʋ nɩɩ n dan kyʋrɔɔ mʋ kɩmʋ nɩɩ n kyʋrɔɔ.”
Ba barɩgɛ Yesu
atɔ bunsa tɔ
23 Anaakɔpʋ mʋ ba maa da Yesu mata oyu laasa sʋ lʋwɛ mʋ, ba barɩgɛ mʋ atɔ bunsa mʋ tɔ ntun nna, nɩɩ bamʋ ɔkʋmaa nɩmʋ nyɛ katɩn kʋlʋn. Nɩɩ ɩ san mʋ kaalɛ bʋnswɩɩsa mʋ nɩɩ kɩ man sʋ ɔbaatakpa, nɩɩ ba lʋʋ kɩmʋ lɩɩ sʋsʋ ba yii kasɛ nɩn.
24 Nɩɩ anaakɔpʋ mʋ ba tɔwɛ abaa yɛ, “A man kyatɛ kɩmʋ barɩgɛ tɔ. Fan yɛgɛ a tʋʋ kɩmʋ sʋ nbii, kɛ a kɩɩ anɛ tɔ ɔmʋ nɩɩ ee biti o gyii kɩmʋ.”
Ba maa waa kanɩn mʋ, ɩ yɛgɛ nɩɩ Asɩnkyan yɩlasa mʋ ɩ ba tɔ kesintin. Ɩmʋ ɩ gyɛ yɛ,
“Ba barɩgɛ mɛ atɔ bunsa tɔ sa abaa, nɩɩ ba tʋʋ nbii mɛ kaalɛ bʋnswɩɩsa sʋ.”
Ɩmʋ sʋ kanɩn nɩɩ anaakɔpʋ mʋ ba waa.
25 Yesu mu‐nyi yɛ mʋ nɩkarɛ yɛ Kilopa mʋ‐ka Mɛɛrɩ yɛ Mɛɛrɩ Magidalen ba yɩlɛ Yesu oyu laasa mʋ asɛ.
26 Yesu maa wu mu‐nyi yɛ mʋ ɔbɩɩlapʋ mʋ nɩɩ ɔ sʋ kebiti sa mʋ ba maa yɩlɛ tʋtɔ mʋ, ɔ tɔwɛ mu‐nyi yɛ, “Ɔkyɩɩ, fu‐bii ndee.”
27 Nɩɩ ɔ tɔwɛ ɔbɩɩlapʋ mʋ mɔɔ yɛ, “Fɔɔ fʋ, fu‐nyi ndee.” Lɩɩ kanɩn saŋa mʋ, nɩɩ ɔbɩɩlapʋ mʋ taa mʋ naa kyɩna mʋ asɛ.
Yesu kelewu
(Matiwu 27:45-56; Maki 15:33-41; Luka 23:44-49)
28 Asɩn nɩmʋ kpini kamaa mʋ, Yesu nyi fɛɛ nbɩɩnbɩɩ bɩrɛ kʋtɔ kʋmaa kɩ lʋwɛ, nɩɩ ɔ tɔwɛ yɛ, “Bʋlɩfɔ sʋ mɛ.” Ɔ tɔwɛ ɩnɩmʋ nɩn kɛ Asɩnkyan yɩlasa mʋ ɩ nyɛ ba tɔ.
29 Tʋtɔ mʋ, nta nyaŋɛsa ɩ bɔla kɔlɔ‐bi ɩ yɩlɛ, nɩɩ anaakɔpʋ mʋ ba taa ɔkyɛɛ ba nyɔ nta mʋ tɔ, nɩɩ ba taa sɔgɩta hisopi oyu sʋ, nɩɩ ba kʋsaa kɩmʋ naa tii mʋ kɔnɔ.
30 Yesu maa kyʋkyʋʋ nta mʋ, nɩɩ ɔ tɔwɛ yɛ, “Nbɩɩnbɩɩ bɩrɛ ɩ lʋwɛ.” Nɩɩ ɔ lɛɛ ɔŋɛɛ.
31 Kanɩn kakɛ maŋa kɩ gyɛ kakɛ kʋlasa akɛ sa Kakɛ fʋʋtɛsa. Kakɛ fʋʋtɛsa maŋa maa gyɛ Kakɛ fʋʋtɛsa lala mʋ, nɩɩ Gyiwu abɩlɩsa mʋ be mee biti fɛɛ asa mʋ ba baa ba saa iyu laasa mʋ sʋ naa fʋʋ kakɛ fʋʋtɛsa maŋa. Kanɩn sʋ Gyiwu abɩlɩsa mʋ ba naa kʋlɛ Paleti yɛ ɔ yɛgɛ ba naa gyayɩ‐gyayɩ bamʋ ayaa, kɛ ba wu bilen, kɛ ba nyɛ saatɛ bamʋ lɩɩ iyu laasa mʋ sʋ.
32 Ɩmʋ sʋ anaakɔpʋ mʋ ba ba asa anyɔ mʋ nɩɩ ba da bamʋ mata iyu laasa sʋ tii Yesu sʋ mʋ. Nɩɩ ba gyayɩ ɔgyankpaasa mʋ ayaa yɛ ɔbanban mʋ gbaa lɛɛ.
33 Amaa ba maa fʋʋ Yesu asɛ mʋ, ba wu fɛɛ ɔ tɛɛ wʋla wu, kanɩn sʋ ba man gyayɩ mʋ ayaa.
34 Amaa anaakɔpʋ mʋ tɔ ɔkʋ taa kɩkpɛ yii Yesu kikelebi tɔ. Opula maŋa tɔ nɩɩ nkalan yɛ nkyu ɩ lɩɩ wʋrɩgɛ.
35 Ɔmʋ nɩɩ o wu ɩmʋ yɛ ansi ɩ maa waa mʋ, mʋ ii gyii ɩmʋ kesintin, kɛ fan nyɛ kɔɔlɛ gyii. Nɩɩ ɩmʋ nɩɩ ɔ tɔwɛ mʋ ɩ gyɛ kesintin, nɩɩ o nyi fɛɛ mʋ asɩn mʋ gyɛ kesintin.
36 Ɩnɩmʋ ɩ waa nɩn kaapʋ fɛɛ Asɩnkyan yɩlasa mʋ ɩ ba tɔ kesintin. Asɩn mʋ ɩ gyɛ yɛ, “Mu kuwuya kʋlʋn gbaa kɩ mɛɛ yɛ kɩ gya.”
37 Nɩɩ bɩla kyʋrɔɔ yɩla katɩn kʋ gbaa tɔwɛ yɛ, “Asa bee biti ba kɩɩ ɔmʋ nɩɩ ba taa kɩkpɛ yii mʋ mʋ.”
Yesu kepula
(Matiwu 27:57-61; Maki 15:42-47; Luka 23:50-56)
38 Ɩnɩmʋ kamaa tɔ mʋ, ɔnyɩn mʋ nɩɩ bɛɛ tɩɩ mʋ yɛ Gyosefu mʋ kpee Paleti asɛ naa kʋlɛ mʋ yɛ, ɔ sa mʋ ɔkpa kɛ ɔ naa saatɛ Yesu kibuni naa pula. Nɩɩ Paleti sa mʋ ɔkpa, nɩɩ o kpee naa taa Yesu kibuni mʋ. Gyosefu maŋa lɩɩ Arimatiya kadɛ tɔ mʋ, nɩɩ ɔ gyɛ Yesu ɔbɩɩlapʋ mʋ tɔ ɔkʋ. Amaa maa sɩlɛ Gyiwu abɩlɩsa sʋ mʋ, ɔ man lɛɛ mʋ n‐yɩɩ ifuli.
39 Gyosefu maa Nikodemusi mʋ nɩɩ ɔ kyɩna kpee naa wu Yesu kagyanbwɛ kʋ mʋ i kpee. Nikodemusi maŋa bɩya tulale mʋ nɩɩ ba taa mɩɩrɛ yɛ kibondiri waa, nɩɩ ba sʋ ba sʋswa abuni mʋ. Ɩmʋ odu ɩ waa fɛɛ akyembee bɔɔta kʋlʋn.
40 Anyɩn anyɔ mʋ ba taa Yesu kibuni mʋ, nɩɩ ba taa taafuli mili mʋ, nɩɩ ba bɔ mʋ tulale fɛɛ kanɩn mʋ nɩɩ Gyiwu abi bɛɛ waa bamʋ obuni, pɔyɩ nɩɩ bee pula mʋ.
41 Kadɔɔ‐bi kʋ bʋ tiri katɩn mʋ nɩɩ ba da Yesu anyenbi mata oyu laasa sʋ mʋ. Kanɩn kadɔɔ‐bi maŋa tɔ mʋ, nɩɩ ba lɔŋɔ kakyan kʋ kʋfʋlɛ tɔ yɩla, nɩɩ ba man pɩɩta pula ɔkʋ kɩmʋ tɔ.
42 Lɩɩ fɛɛ kanɩn kakɛ maŋa maa gyɛ Gyiwu abi kakɛ kʋlasa sa Kakɛ fʋʋtɛsa sʋ mʋ, nɩɩ kakyan mʋ maa tiri tʋtɔ sʋ mʋ, ba taa Yesu naa pula tʋtɔ.