17
Yesu kʋlɛ kabwaarɛ‐kʋlɛ sa mʋ n‐yɩɩ
1 Yesu maa tɔwɛ ɩnɩmʋ lʋwɛ mʋ, ɔ kʋsaa mu kumu kɩɩ sʋsʋ nɩɩ ɔ kʋlɛ Ɩbwaarɛ yɛ,
“Nsɛ saŋa mʋ fʋʋ. Sa mɛ, Fu‐bii mʋ bʋnyaa, kɛ mɛ, Fu‐bii mʋ gbaa n sa fʋ bʋnyaa.
2 Lɩɩ fɛɛ fʋ sa mɛ ɔlʋn lɩɩ asa kpini sʋ, fɛɛ n sa asa mʋ nɩɩ fʋ taa bɔɔta mɛ mʋ kpini nkpa kakpaa.
3 Nkpa kakpaa mʋ ɩ gyɛ yɛ asa ba bɩɩ fʋ, kesintin Ɩbwaarɛ kʋlʋn mʋ, kɛ ba bɩɩ mɛ, Yesu Krisito mʋ nɩɩ fu sun mʋ.
4 N bɩya fʋ bʋnyaa kasɛ sʋ nfɩɩ, lɩɩ n maa lʋwɛ fu kusun mʋ nɩɩ fʋ sa mɛ yɛ n ba waa mʋ sʋ.
5 Mɛ‐Sɛ, sa mɛ bʋnyaa fu ansi tɔ nbɩɩnbɩɩ nɩmʋ, bʋnyaa mʋ nɩɩ n wʋla n sʋ fʋ asɛ pɔyɩ nɩɩ fʋ tʋʋ dulinyaa mʋ.”
Yesu kʋlɛ kabwaarɛ‐kʋlɛ
sa mʋ abɩɩlapʋ mʋ
6 Nɩɩ Yesu kyaga sʋ yɛ, “N lɛɛ fu kedubi kaapʋ bamʋ nɩɩ fʋ lɛɛ bamʋ lɩɩ dulinyaa nɩmʋ tɔ sa mɛ mʋ. Ba daa ba gyɛ fʋ lɛɛ nɩn, nɩɩ fʋ taa bamʋ sa mɛ. Nɩɩ ba kɔɔlɛ fʋ asɩn mʋ nɩɩ ba buu ɩmʋ.
7 Nbɩɩnbɩɩ bɩrɛ, ba bɩɩ fɛɛ kʋtɔ kʋmaa mʋ nɩɩ n sʋ mʋ lɩɩ fʋ asɛ nɩn.
8 Lɩɩ fɛɛ n tɔwɛ bamʋ asɩn mʋ nɩɩ fʋ sa mɛ mʋ, nɩɩ ba kɔɔlɛ. Ba bɩɩ kesintin tɔ fɛɛ n lɩɩ fʋ asɛ, nɩɩ ba kɔɔlɛ gyii fɛɛ fu i sun mɛ.
9 N kʋlɛ kabwaarɛ‐kʋlɛ n sa bamʋ. N mɛɛ kʋlɛ n sa dulinyaa abi, amaa bamʋ nɩɩ fʋ taa sa mɛ, lɩɩ fɛɛ ba gyɛ fʋ lɛɛ mʋ.
10 Asa mʋ nɩɩ ba gyɛ mɛ lɛɛ mʋ kpini, ba gyɛ fʋ lɛɛ, nɩɩ bamʋ nɩɩ ba gyɛ fʋ lɛɛ mʋ ba gyɛ mɛ lɛɛ. Lɩɩ bamʋ sʋ nɩɩ mɛ bʋnyaa mʋ lɩɩ ifuli.
11 N man bɩla yɛ n kyɩna dulinyaa nɩmʋ tɔ, n ba fʋ asɛ nɩn. Amaa bɛɛ bamʋ bɩrɛ ba san ba bʋ dulinyaa nɩmʋ tɔ. Nsɛ Kyɩrɛkyɩrɛ taa fʋ kɩtɩɩ mʋ nɩɩ fʋ sa mɛ ɔlʋn mʋ kun bamʋ, kɛ ba nyɛ waa kʋkʋlʋn fɛɛ kanan mʋ nɩɩ maa fʋ an gyɛ kʋkʋlʋn mʋ.
12 Maa kyɩna n bʋ bamʋ asɛ mʋ, kɩtɩɩ mʋ nɩɩ fʋ sa mɛ mʋ, kɩmʋ ɔlʋn tɔ nɩɩ n taa kɩɩ bamʋ sʋ, nɩɩ n kun bamʋ. Ɩmʋ sʋ bamʋ tɔ ɔkʋ man fɔyɩ, amɔɔ ɔmʋ nɩɩ ɔ dagaa fɛɛ ɔ fɔyɩ mʋ, kɛ Asɩnkyan yɩlasa mʋ ɩ ba tɔ.
13 “Nbɩɩnbɩɩ n ba fʋ asɛ nɩmʋ. Amaa maa san n bʋ dulinyaa nɩmʋ tɔ mʋ nɩɩ n tɔwɛ ɩnɩmʋ, kɛ ba nyɛ mɛ kensi‐gyii bamʋ tɔ danbɩrasa naa lʋwɛ.
14 N taa fʋ asɩn mʋ sa bamʋ, nɩɩ dulinyaa abi ba kisi bamʋ, lɩɩ fɛɛ ba man bɩla ba gyɛ dulinyaa tɔ abi, fɛɛ kanan mʋ nɩɩ n man gyɛ dulinyaa tɔ obii mʋ.
15 N mɛɛ kʋlɛ fʋ nɩn yɛ fʋ lɛɛ bamʋ lɩɩ dulinyaa tɔ, amaa n kʋlɛ nɩn yɛ fu kun bamʋ lɩɩ Sɩtaanɛ sʋ.
16 Ba man gyɛ dulinyaa nɩmʋ lɛɛ, fɛɛ kanan mʋ nɩɩ n man gyɛ kɩmʋ lɛɛ mʋ.
17 Taa fʋ asɩn kesintin lɔŋɔ bamʋ yɩla, lɩɩ fɛɛ fʋ asɩn mʋ ɩ gyɛ kesintin.
18 Fɛɛ kanan mʋ nɩɩ fu sun mɛ dulinyaa tɔ mʋ, kanɩn nɩɩ ngbaa mɛ n sun bamʋ dulinyaa tɔ.
19 Lɩɩ bamʋ sʋ nɩɩ n taa mɛ n‐yɩɩ sa fʋ, kɛ ngbaa bamʋ ba nyɛ taa bamʋ n‐yɩɩ sa fʋ kesintin tɔ.”
Yesu kʋlɛ
kabwaarɛ‐kʋlɛ sa mu
abuupu kpini
20 Nɩɩ Yesu bɩla kʋlɛ kabwaarɛ‐kʋlɛ, “Man gyɛ mɛ abɩɩlapʋ mʋ nkʋn nɩɩ n kʋlɛ kabwaarɛ‐kʋlɛ n sa. N kʋlɛ n sa bamʋ nɩɩ bee biti ba be nu mɛ asɩn lɩɩ bamʋ asɛ kɛ ba kɔɔlɛ mɛ gyii mʋ gbaa.
21 Nsɛ, mɛ kabwaarɛ‐kʋlɛ ɩ gyɛ yɛ bamʋ kpini ba waa kʋkʋlʋn, fɛɛ kanan mʋ nɩɩ fʋ bʋ mɛ tɔ nɩɩ ngbaa n bʋ fʋ tɔ mʋ. N kʋlɛ fʋ yɛ, ba baa ba bʋ anɛ tɔ, kɛ dulinyaa abi ba kɔɔlɛ gyii yɛ fu i sun mɛ.
22 N sa bamʋ bʋnyaa mʋ nɩɩ fʋ sa mɛ mʋ, kɛ ba nyɛ waa kʋkʋlʋn fɛɛ kanan mʋ nɩɩ an gyɛ kʋkʋlʋn mʋ.
23 N ba n bʋ bamʋ tɔ yɛgɛ fʋ bʋ mɛ tɔ, kɛ ba bʋga waa kɔnɔ kʋlʋn naa lʋwɛ. Ɩnɩmʋ ii biti ɩ yɛgɛ dulinyaa abi ba bɩɩ fɛɛ fu i sun mɛ, nɩɩ fʋ sʋ kebiti sa bamʋ fɛɛ kanan mʋ nɩɩ fʋ sʋ kebiti sa mɛ mʋ.
24 “Nsɛ n biti fɛɛ bamʋ nɩɩ fʋ taa sa mɛ mʋ, ba baa ba bʋ mɛ asɛ katɩn mʋ nɩɩ n bʋ mʋ. Kɛ ba wu mɛ bʋnyaa mʋ nɩɩ fʋ taa sa mɛ mʋ, lɩɩ fɛɛ fʋ sʋ kebiti sa mɛ pɔyɩ nɩɩ fʋ tʋʋ dulinyaa mʋ.
25 “Nsɛ, ɩkpa kyiigisa wuya, dulinyaa abi ba maa man nyi fʋ, amaa mɛɛ mɛ n nyi fʋ, nɩɩ mi abuupu mʋ be nyi fɛɛ fu i sun mɛ.
26 N lɛɛ fu kedubi kaapʋ bamʋ, nɩɩ n biti n kyaga sʋ lɛɛ fʋ kaapʋ bamʋ, kɛ fu kebiti mʋ nɩɩ fʋ sʋ sa mɛ mʋ kɩ baa kɩ bʋ bamʋ tɔ, kɛ ngbaa mɛ n baa n bʋ bamʋ tɔ.”