4
Ɩbwaarɛ asa ba sʋ ɔfʋʋtɛ Yesu tɔ
1 Ɩmʋ sʋ fɛɛ Ɩbwaarɛ maa da mʋ kɔkɔlɔ sʋ lɩɩ mu opula fʋʋtɛkpa kuloo mʋ, nɩɩ kɩ maa san kɩ dɛ sa anɛ sʋ mʋ, fan yɛgɛ a baa an da sʋ yɛ ɔdan, kɛ ɩ man ba fɛɛ fanɛ tɔ ɔkʋ ɔ fɔyɩ kɛ ɔ man nyɛ opula fʋʋtɛkpa mʋ tɔ loo.
2 Lɩɩ fɛɛ anɛ gbaa anɛ an nyɛ nɩɩ ba tɔwɛ asɩn danbɩrasa mʋ sa anɛ fɛɛ kanan mʋ nɩɩ ba tɔwɛ sa ngbaa bamʋ mʋ. Amaa ba man nyɛ asɩn mʋ nɩɩ ba nu mʋ tɔnɔ, lɩɩ fɛɛ ba maa nu waa bamʋ asʋ tɔ mʋ, ba man kɔɔlɛ gyii bamʋ nkɔlɔ tɔ.
3 Kanɩn sʋ nbɩɩnbɩɩ anɛ mʋ nɩɩ an kɔɔlɛ gyii mʋ, anɛ ii biti a loo mu opula fʋʋtɛkpa mʋ tɔ, fɛɛ kanan mʋ nɩɩ Ɩbwaarɛ tɔwɛ yɛ,
“N nyɛ agbʋ bɔ ntan yɛ,
‘Ba mɛɛ yɛ ba nyɛ loo mi opula fʋʋtɛkpa mʋ tɔ.’ ”
Halɩɩ saŋa mʋ nɩɩ ɔ tɔwɛ kanɩn mʋ, ɔ tɛɛ wʋla lʋwɛ dulinyaa mʋ nɩɩ ɔ tʋʋ mʋ kusun.
4 Lɩɩ fɛɛ Asɩnkyan yɩlasa mʋ ɩ tɔwɛ katɩn kʋ lɩɩ kakɛ fʋʋtɛsa mʋ sʋ yɛ, “Kakɛ sunɔsapʋ mʋ tɔ mʋ, Ɩbwaarɛ fʋʋtɛ lɩɩ kusun mʋ nɩɩ ɔ waa mʋ kpini tɔ.”
5 Nɩɩ ɩ bɩla tɔwɛ lɩɩ asɩn nɩmʋ sʋ yɛ, “Ba mɛɛ yɛ ba nyɛ loo mi opula fʋʋtɛkpa mʋ tɔ.”
6 Ɩmʋ sʋ mʋ kɩ san kɩ dɛ fɛɛ akʋ bee biti ba nyɛ loo opula fʋʋtɛkpa mʋ tɔ. Amaa bamʋ nɩɩ ba gyankpaa nu asɩn danbɩrasa mʋ, ba waa kʋsʋ tɔ ɔlʋn, nɩɩ ba man nyɛ loo kɩmʋ tɔ.
7 Ɩmʋ sʋ Ɩbwaarɛ bɩla yɩla kakɛ kʋ, nɩɩ ɛɛ tɩɩ kɩmʋ yɛ, “Ndaga.” Nɩɩ ɩ maa kyɛɛrɛɛ kamaa tɔ mʋ, Ɩbwaarɛ bɔla Dawidi sʋ tɔwɛ, fɛɛ kanan mʋ nɩɩ ɔ wʋla tɔwɛ asɩn maŋa mʋ yɛ,
“Ndaga, nɩɩ fan kan nu mʋ kɔnɔ tɔ asɩn mʋ,
fan man kan waa kɔkɔlɔ ɔsɩɩ yɛ fɛn mɛɛ yɛ fan nu.”
8 Fɛɛ nɩɩ Gyosuwa dɩn sa bamʋ ɔfʋʋtɛ nɩn, naafɔɔ kamaa tɔ Ɩbwaarɛ man dɩn bɩla tɔwɛ kakɛ pʋpwɛ kʋ asɩn.
9 Kanɩn bɩrɛ ɔfʋʋtɛ fɛɛ kakɛ fʋʋtɛsa mʋ kɩ san kɩ dɛ sa Ɩbwaarɛ asa, fɛɛ kanan mʋ nɩɩ Ɩbwaarɛ fʋʋtɛ kakɛ fʋʋtɛsa akɛ mʋ.
10 Lɩɩ fɛɛ ɔkʋmaa mʋ nɩɩ ɔ nyɛ loo Ɩbwaarɛ opula fʋʋtɛkpa mʋ tɔ mʋ, ɩ kaapʋ fɛɛ ɔ fʋʋtɛ lɩɩ mʋ gbaa‐gbaa kusun waasa sʋ, fɛɛ kanan mʋ nɩɩ Ɩbwaarɛ gbaa fʋʋtɛ lɩɩ mu kusun sʋ mʋ.
11 Ɩmʋ sʋ fan yɛgɛ a kpan anɛ n‐yɩɩ ɔkpa kʋmaa sʋ, kɛ a loo kanɩn opula fʋʋtɛkpa mʋ tɔ, kɛ ɩ man nyɛ ba fɛɛ fanɛ tɔ ɔkʋ ɔ waa kʋsʋ tɔ ɔlʋn, kɛ ɔ fɔyɩ ɔkpa naa lɩɩ tɩyɛ fɛɛ bamʋ mʋ.
12 Lɩɩ fɛɛ Ɩbwaarɛ asɩn mʋ ɩ sʋ nkpa, nɩɩ ii sun kusun. Nɩɩ asɩn mʋ ɩ bʋyɛ ɩ kyɔ sakunde gyimba anyɔ, nɩɩ ɩ taalɛ nyɛ loo nyɩmɩsa kɔkɔlɔ tɔ yɛ mʋ nfɛɛrɛ tɔ, nɩɩ ɩɩ barɩgɛ nyɩmɩsa ɩkyagakpa yɛ awiya tɔ npu. Nɩɩ kɩ bɩla kɩ talɛ nyɩmɩsa kɔkɔlɔ yɛ mʋ nfɛɛrɛ tɔ.
13 Nɩɩ kʋtɔ kʋmaa mʋ nɩɩ Ɩbwaarɛ tʋʋ mʋ kʋkʋ man bʋ tɔ, nɩɩ kɩ baala mu ansi sʋ. Amaa kʋtɔ kʋmaa nɩmʋ kɩ dɛ tentengilen mu ansi sʋ. Nɩɩ anɛ ɔkʋmaa nɩmʋ ii biti ɔ yɩlɛ lɛɛ mʋ kɔnɔ mu ansi tɔ.
Krisito ɩ gyɛ
anɛ Ɩbwaarɛ Oseepu bɩlɩsa asɛ
14 Lɩɩ kanɩn sʋ fan yɛgɛ a yɩlɛ anɛ kɩkɔɔlɛ‐gyii mʋ nɩɩ an sʋ mʋ tɔ kenken, lɩɩ fɛɛ an sʋ Ɩbwaarɛ oseepu bɩlɩsa asɛ kparɛ. Mʋ ɩ gyɛ Yesu, Ɩbwaarɛ mu‐bii mʋ nɩɩ ɔ kyʋn sʋsʋ Ɩbwaarɛ asɛ mʋ.
15 Lɩɩ fɛɛ anɛ oseepu bɩlɩsa asɛ man gyɛ ɔmʋ nɩɩ ɔ mɛɛ taalɛ wu anɛ kʋwɛɛ lɩɩ ntɩn mʋ nɩɩ a mɛɛ taalɛ an kɩtaa anɛ n‐yɩɩ mʋ. Amaa an sʋ ɔmʋ nɩɩ ɔ nyɛ kʋtʋʋ tɔ kɩɩ atɔ kpini tɔ fɛɛ anɛ, nɩɩ mɛɛ mʋ man waa alibi kʋ.
16 Ɩmʋ sʋ fan yɛgɛ a nyɛ kɔkɔlɔ yɩlɛ tɔ, ba Ɩbwaarɛ ansi tɔ mu kuwura‐gya mʋ asɛ katɩn mʋ nɩɩ kabwaala kɩ bʋ, kɛ o wu anɛ kʋwɛɛ kɛ a nyɛ kabwaala mʋ nkyɛtɔ saŋa mʋ nɩɩ i tiri san anɛ mʋ.