18
Nuu tìin ndra Jesuu
(Mt. 26:47-56; Mr. 14:43-50; Lc. 22:47-53)
1 Takan kūu ta ora chinu kā'an Jesuu takan, tajan kēe ndio ra kuà'an ra chi'in ma ndra jàkua'a chi'in ra inga chiyo ma yuvi ña nàni Cedrón. Ta ora chāa ndra nuu tāchi yutun tata, ta ikan kī'vi ndra kuà'an ndra chi'in ra.
2 Ta nda ma Juda, ra xìkoña'a cha'a' Jesuu, juuni nàkoto ra ma ikan ndia, ti kua'a' cha'a' cha kūti'vi Jesuu ikan chi'in ma ndra jàkua'a chi'in ra.
3 Ta takan kūu yi ña chāa ma Juda chi'in kua'a' va'a jandaru, ta uvi uni ma ndra jandaru ña kùmi ma veñu'u, ña tāchi ma ndra kuxini nuu sutu, chi'in ma ndra fariseu. Tandi'i ndrakan nda'a ndra ñu'ú nda'a', chi'in machiti, ta nduva.
4 Va takua Jesuu cha chìto ra tandi'i ma ña ni ta'an ra, yakan va kēta ra, ta te'en chīkatu'un ra nuu ndra:
―¿Yo nànduku ndo? ―kàti ra.
5 Ta ndrakan te'en nāka'an ndra chi'in ra:
―Nànduku ndi Jesuu ra ñuu Nazaret ―kàti ndra.
Ta Jesuu te'en naka'an ra:
―Yu'u kùi ―kàti ra.
Ta ma Juda ra xìkoña'a cha'a' Jesuu juuni ndaa ra ma ikan chi'in ndra ndia.
6 Ta ora nāka'an Jesuu ña; “Yu'u kùi”, ta chīkachata ndra iti' chata, ta ndūva ndra nuu ñu'u'.
7 Tajan Jesuu te'en chīkatu'un tuku ra nuu ndra:
―¿Yo nànduku ndo? ―kàti ra.
Ta ndrakan te'en nāka'an ndra:
―Nànduku ndi Jesuu ra ñuu Nazaret ―kàti ndra.
8 Tajan Jesuu te'en nāka'an ra:
―Cha kā'in chi'in ndo, ña yu'u kùi. Tu yu'u kùu ma ra nànduku ndo, na jaña ndo ma ndra jàkua'a chi'i̱n, ta tìin ndo yu'u ―kàti Jesuu.
9 Takan kūu yi, ikan na chinu ma tu'un kā'an Jesuu ña te'en kà'an: “Ma ndian chā'a ma Tatái nui, töve nī kenaa nï'iin na.”
10 Tajan ma Simón Petu', ti ndà'a ra iin machiti, ta tāva ra yi ma tichi vena ra, ta chā'nda ra iin chiyo so'o ma ra nàni Malco, ma chiyo kua'a ra. Ta ra'ya ti ra kùu musu ma ra kuxini nuu sutu kùu ra.
11 Tajan Jesuu te'en nāka'an ra chi'in ma Petu':
―Na ti'i va'un ma machitiun ma tichi venaun. Vati tu Tatái chā'a ra ña na nde'i tundo'o, ¿a töve ìyo tu'vai ña nde'i tundo'o i'ya?, kùuni ndo ―kàti Jesuu.
Jesuu chàa ra nuu ma ra kuxini nuu ma ndra sutu
(Mt. 26:57-58; Mr. 14:53-54; Lc. 22:54)
12 Tajan ma ndra jandaru, chi'in ma ra kuxini nuu ndra, ta chi'in ma ndra kùu jandaru ma ndian judíu, tīin ndra Jesuu, ta chū'ni ndra nda'a' ra.
13 Ta chāndaka ji'na ndra ra nuu ma ra nàni Anás, raka'nu ma ra nàni Caifás. Ma kuiya ikan, Caifás kùu ra ma ra kuxini nuu sutu.
14 Ta juuni ma Caifás i'ya, kùu ra ña kātitu'un nuu ma ndian judíu, ña va'aga ña na kuvi iin ra'iini cha'a' ma ñuu na, kāti ra.
Petu' kà'an ra ña töve nàkoto ra Jesuu
(Mt. 26:69-70; Mr. 14:66-68; Lc. 22:55-57)
15 Ma ra nàni Simón Petu', tāndikun ra kuà'an ra chata Jesuu, chi'in inga, ra takani nàkoto ma ra kuxini nuu sutu ra, kī'vi ra chi'in Jesuu, ma nuke'e ve'e ma ra kuxini nuu sutu,
16 va ma Petu', kīndoo ra ma chata kora. Cha'a' yakan kùu yi ña kēe ma ra nàkoto ma ra kuxini nuu sutu. Ta chāka'an ra chi'in ma ña kùmi ma yu'u kora, ña na ku'va ña kì'vi ma Petu', kàti ra. Ta jāya'a ña ra iti' tichi.
17 Tajan ma ña kùmi ma yu'u kora, te'en kīcha'a chìkatu'an nuu Petu':
―¿A yöve iin ra chàkunuu chi'in ra tīin ndra ikan kùu̱n? ―kàtian chi'in ra.
Ta Petu' te'en nāka'an ra:
―Yöve yu'u kùi ―kàti ra.
18 Va takua ya'a ga vichin jà'a yi, yakan va ma ndra kùu musu, chi'in ma ndra jandaru, jāta'an ndra ñu'ú, ta tùmi ndra yi, ti ya'a vichin jà'a yi. Ta nda ma Petu', juuni ndaa ra tùmi ra yi chi'in ndra ndia.
Ma ra kuxini nuu sutu chìkatu'un ra nuu Jesuu
(Mt. 26:59-66; Mr. 14:55-64; Lc. 22:66-71)
19 Takan kūu tajan ma ra kuxini nuu sutu, chīkatu'un ra nuu Jesuu, nda ndra kùu ma ndra chàkunuu chi'in ra, ta nda va kùu ma ña jàna'a ra.
20 Tajan Jesuu te'en nāka'an ra chi'in ra:
―Yu'u chàkunui jàna'i ma nuu tuvi ñivi, ta juuni jàna'i nuu ma ndian judíu ma tichi veñu'u kuati na, ta ma tichi veñu'u ka'nu na nuu kùti'vi ndisaa na ndia. Yakan va, yu'u töve chàta'ani̱ jana'a xe'i nuu ma ñivi.
21 ¿Ta chïto naja chìkatu'u̱n nui? Na ndakatu'u̱n nuu ma ndian chīni ma ña jāna'i, ta ndiakan na katitu'un na nuu̱n ma ña jāna'i nuu na ―kàti Jesuu.
22 Ta ora chīnu kā'an Jesuu takan, ta iin ma ndra jandaru ña kùmi ma veñu'u, kāni ra nuu ra, ta te'en nāka'an ra chi'in Jesuu:
―¿Ta naja kà'un takan chi'in ma ra kuxini nuu sutu? ―kàti ra.
23 Ta Jesuu te'en nāka'an ra chi'in ra:
―Tu yu'u kā'in iin tu'un ña töve va'a, na ka'un nui nda cha'a' kùu yi. Va tu ma ña kā'in, ña va'a kùu yi, ¿nda cha'a' kāniun yu'u tuva takan? ―kàti Jesuu.
24 Tajan ma ra nàni Anás tāchi ra, ña na ku'ni ndra Jesuu, ta tāchi ndio ra ra kuà'an ra nuu ma ra kuxini nuu sutu ña nàni Caifás.
Inga cha'a' kà'an Petu' ña töve nàkoto ra Jesuu
(Mt. 26:71-75; Mr. 14:69-72; Lc. 22:58-62)
25 Takan kūu ta tava ma Petu' juuni ndaa ra tùmi ra ñu'ú ma ikan, yakan va te'en kīcha'a ndiko ndra chìkatu'un ndra nuu ra:
―¿A yöve yo'o, kùu ma ra chàkunuu chi'in Jesuu? ―kàti ra chi'in ra.
Ta ma Petu' te'en nāka'an ra:
―Yöve yu'u kùi ―kàti ra.
26 Tajan iin ma ndra jà'a tiñu nuu ma ra kuxini nuu sutu, ra nàkoto ma ra chā'nda ma Petu' so'o, te'en kīcha'a ra chìkatu'un ra nuu ra:
―¿A yöve yo'o kùu ma ra ndē'i chi'in ra ma nuu kàa yutun tata? ―kàti ra chi'in Petu'.
27 Ta ma Petu' nāka'an ndiko ra ña töve nàkoto ra ra, ta ma ora ikani nānda'yu ma lo'o.
Jesuu chàa ra nuu Pilatu
(Mt. 27:1-2, 11-14; Mr. 15:1-5; Lc. 23:1-5)
28 Takan kūu tajan kēe ndio ndra chi'in Jesuu ma ve'e Caifás, ta chāndaka ndra ra ma vetiñu nuu tà'nda tiñu. Va takua ma ora cha kūndichin kùu yi, yakan va ma ndra judíu, nī kuuni ndra kì'vi ndra tichi ma vetiñu, koto ndokini ndra, ta na küa kuxini ndra ma ora ìyo ma viko Pakua, kùuni ndra.
29 Tajan Pilatu kēe ra ma tichi vetiñu, ta te'en nāka'an ra chi'in ndra:
―¿Nda cha'a' kùu yi ña tìsokuati ndo ra'ya? ―kàti Pilatu.
30 Ta ndrakan te'en nāka'an ndra chi'in ra:
―Töve na ja'a ndi ña kichi ndaka ndi ra nuu̱n, tu yöve ra jà'a kuati kùu ra ―kàti ndra.
31 Tajan Pilatu te'en nāka'an ra chi'in ndra:
―Na kundaka ndo ra ku'un ndo, ta na jakutuni ndo ma kuati ra, takua kà'an ma tutu ley maa ndo ―kàti Pilatu.
Tajan ma ndra judíu te'en nāka'an ndra chi'in ra:
―Va taku ndyu'u ndian judíu, nï'iin ñivi na küu ka'ni ndi na ―kàti ndra.
32 Takan kūu yi ña jāchinu Jesuu ma ña kā'an ra, cha'a' ma naja kua ìyo yi ña kuvi ra.
33 Takan kūu tajan Pilatu kī'vi ndiko ra ma tichi vetiñu nuu chà'nda ra tiñu, ta kāna ndio ra ma Jesuu, ta te'en kīcha'a ra chìkatu'un ra nuu ra:
―¿A yo'o kùu ma rey ra chà'nda tiñu nuu ma ñivi judíu? ―kàti Pilatu.
34 Ta Jesuu te'en kīcha'a chìkatu'un ra nuu Pilatu:
―¿A ña chànini maun kùu ma ña chìkatu'u̱n nui, a kà'an na takan cha'i nuu̱n, yakan va chìkatu'u̱n yi nui? ―kàti Jesuu.
35 Ta ma Pilatu te'en nāka'an ra chi'in Jesuu:
―¿A chàniniun ña ra judíu kùi, yakan va kà'un takan? Ma ndian ñuu̱n, chi'in ma ndra kuxini nuu sutu, ndrakan kùu ma ndra kīchi ndaka ñu̱n nui. ¿Nayi jā'un? ―kàti Pilatu.
36 Ta Jesuu te'en nāka'an ra:
―Ma nuu ni koi, yöve ma ñuñivi i'ya kùu yi. Ti tu ma nuu ni koi kùu yi ma ñuñivi i'ya, ni kanita'an ma ndra chàkunuu chi'i̱n cha'i, chi'in ma ndian judíu, ta na kü'va ndra yu'u nuu na. Va ma nuu ni ka'ndai tiñu yöve ma ñuñivi i'ya kùu yi ―kàti Jesuu.
37 Tajan ma Pilatu te'en nāka'an ra chi'in Jesuu:
―¿A yo'o kùu ma rey tuva takan? ―kàti Pilatu. Tajan Jesuu te'en nāka'an ra chi'in ra:
―Ndicha ña kùi rey, ma takua kà'un. Vati yu'u kākui ma nuu ñu'u' ñuñivi i'ya kuenda ña katitu'in ma tu'un ndaa. Ta tandi'i ma ndian jàchi'in ma tu'un ndaa i'ya, juuni tàso'o na ma ña kà'in ―kàti Jesuu.
38 Tajan Pilatu te'en chīkatu'un ra nuu ra:
―¿Ta nayi kùu ma ña ndaa? ―kàti Pilatu.
Nuu ni ka'ni na Jesuu
(Mt. 27:15-31; Mr. 15:6-20; Lc. 23:13-25)
Ta ora cha ya'a ña chīkatu'un Pilatu nuu Jesuu, ta kēe ndiko ra ma nuu chà'nda ra tiñu, ta te'en chāka'an ndiko ra nuu ma ndian judíu:
―Yu'u töve nàta'in nï'iin kuati ra'ya.
39 Va tava ndyo'o, cha iin chìkan ndo nàni kuiya ña na jañai iin ra indii vekaa, ma ora ìyo ma viko Pakua. Yakan va, ¿a kùuni ndo ña na jañai ma rey ma ndian judíu? ―kàti Pilatu chi'in na.
40 Tajan tandi'i ndio ma ndian judíu, te'en kīcha'a ndiko na kanachaa ni'i na:
―¡Na küuni ndi ña jañaun rakan! ¡Na jañaun ma Barrabás! ―kàti na.
Ta ma Barrabás, ti iin ra su'u kùu ra.