9
Yowbad nikatigikes nagamag min-Yisleil
1-2 Agulivan mounid, mamagina Kelis waseg. Awoum bayaweid. Yowbad Kululuwan ilabeig. Nanoug waseg mo akakina agulivan mounid. Peinan singaya ikalin nuwag talawog, tasiyas min-Yudiy. E, tut babaw igeg nanoug pines tasiyas.
3 Sivinag Yowbad biyagageig o bigidem Kelis nasiwa̱youb waseg yey, va̱gan kid bisiwyoubus tasiyas talawog.
4-5 Mounid min-Yisleil tasiyas. Yowbad dilenen tasiyas bo isekes yakawanan tonen, bo ikaveiyon wasigeis tibsiyas, isekes nakaleiwag, o sitapwa̱loul, o ilivnek youd bwanabwein igaw mo bisekes. E, anilivan ma̱wan wasigeis tammwayas, tasiyas Ebelam, Aysak, Yekob; e, gimgilitoun Kelis delen mtowen Ebelam. Mapuna takavasis Yowbad tut nag beikous, mtowen takaleiwag youd babaw wasigeis. Eimen.
6 Awoum bitadokes Yowbad ikatigikesa mav. Tasiyas Yisleil dilenen mwasanin mounid min-Yisleil, mwasanin gog tobwag.
7 O Ebelam tibun mwasanin dilenen mounid, mwasanin gog tobwag. Misinaka Aysak tibun Yowbad idoki dilenen Ebelam. Bo idibek, ilana,
“Aysak tibun bimlavags deleim ya̱koum.”
8 Mamagina Yowbad nag nitun tasiyas Ebelam tibun nikopwes ven watinow waseg, nag. Tage peinan anilivan mounid isek, mo ya̱kids bitamlavags Yowbad angamag ya̱kids.
9 Kweiboug Yowbad nilivnek; isek Ebelam anilivan ma̱wan:
“Igaw tut bwanabwein waseg mo ba̱yum baw, igaw Sela mo bikop natun kuda̱taw.”
10-12 Ma̱wan-vak Libek neivays son tabuds Aysak mo isum papaps wanuwan, Yowbad idibek, ilana,
“Kunutaw bikanow aygan digumasus.”
Igaw wanuwan ines nisesus; nag ivag asisinap bwanabwein o kalbaleb, nag. Tage Yowbad bikaleiwag va̱gan bilivnek angamag, nag peinan asisinap; misinaka bilivnek ma̱wana nanon. Mapuna Yowbad idibek Libek, ilana,
“Kunutaw bikanow aygan digumasus.”
13 Liva̱nen nises Bukitab waseg, mamagina:
“Sivinag Yekob; Isaw gog apiyev.”
14 Aveiyag bitalivan? Adok bitalana, “Yowbad ansinap nag idumwal?” Awoum bitalivan ma̱wan.
15 Anilivan gog Moses waseg, ilana,
“Kukin kal sivinag basiwyoub;
kukin kal binok nuwag, mo binok nuwag.”
16 Yowbad binok nuwan ya̱kid nag peinan nanoud o dawotet, nag. Misinaka nasiwa̱youb tatonen waseg mo binok nuwan ya̱kid.
17 Liva̱nen Pelow nises Bukitab waseg, peinan Yowbad idibek Pelow, ilana,
“Bo asekeim guyaw va̱gan bakamtilakes gamag babaw, bikines guntawtoun waseg yak, mo ven babaw gimgilis biliganes butug. O yagag yey bikavtagis.”
18 E, taninuways, kalisiy Yowbad sivinan binok nuwan mo bisiwyoubus; tage kalisiy sivinan bivag bikakons mo ivag ikakons.
Yowbad takaleiwag tatonen
19 Adok bukudibakeigs, kulansa,
“Kukin Yowbad bikalawageid ma̱wan nanon, ta-ma̱wan bitasilbwed. Igaw beivag adsinap kalbaleb peinan bo ivag nanon ma̱wan, adok awoum biyateleid.”
20 Awoum kal gamag ya̱koum kuvtok livan Yowbad, awoum. Magat loutan beivag nanon, tab kadilok bidibek tawtelein, bilana, “Aveiyag wawun nukuva̱geig agukwakin ma̱wan?” Adok awoum bilivan ma̱wan.
21 Adok tawtelein loutan bikaleiwag bidapwat waseg, ne? E, kadiloka bikow bidapwat babaw, simultanok waseg bivag loutan kweitan anlelel bwein; o som kwayuwein bivag loutan kweitan silma̱nin wotet, anlelel nag.
22 Kadilok Yowbad bikaleiwag ma̱wan, peinan sivinan gamag ya̱kids bitakines inaya̱tal o natawtoun wasigeis takalbalebs, ikapatul wasigeis tasiyas ee... igaw mo bigulekwes.
23 O peinan sivinan gamag ya̱kids bitakines ansinap singay kamnat wasigeis ya̱kids nisiwyoubuds, o kweiboug nibun dakamnats peinads ya̱kids.
24 E, bo idaweids nag misinaka min-Yudiy ya̱kids, tage tobwag ven gimgilis mwasanin-vak nidawes tasiyas.
25 Liva̱nen nises palopit Osey anilivan mamagina:
“Tasiyas nag gungamag
Mo badokes balana, ‘Agugwamag tasiyas.’
Peinan bod towen, gamag nag sivines,
Mo badokes gunabod tasiyas.
26 Ven tasiyas nidibakes, ilana,
‘Nag gungamag yakamiy.’
E, ven wunsiyas mo bidokes bilana,
‘Yowbad tamwamov nitun tasiyas.’ ”
27-28 Isaya kweiboug iwak, liva̱nen Yisleil ilana,
“Adok Yisleil tibun bibabaw ma̱wana alekel babewein,
Tage teiyuy Yowbad bikatinabwes.
Babaw biwaweiys, ven watinow gimgilis,
Peinan bitawtoun, nuwanaw, nawotet towen waseg.”
29 Isaya ma̱wan nilivnek, ilana,
“Kukin liba̱lab guyawun nag bikatibom
nitidayas mwasanin, mo biyagageids beikous,
ma̱wan Sodom kweiboug, o ma̱wan-vak Gomol, biyagageids beikous.”
Min-Yisleil ideivs
30 Aveiyag bitalivan? Adok tobwag ven gimgilis igaw dadub nag ivag sivines asisinap bididumwal, tage bo iba̱nes asisinap didumwal peinan isimounids waseg Yowbad.
31 Tage min-Yisleil sivines bikanawes Moses nakaleiwag silma̱nin sinap didumwal, iyokons, bo nag, peinan nag ikanawes bwein Moses nakaleiwag.
32 Aveiyag wawun? Iyokons, tage nag isimounids Yowbad waseg. Idokes misinaka biwotets bwein mo biba̱nes. Nag gog. Mamagina kikeis ikatpines wululay nimmasis wapwepway mo ikalka̱louws.
33 Kabebay-nen nises Bukitab waseg mamagina:
“Kukines, ven Sayon waseg basen gunawlulay va̱gan bikatpines kikeis,
mamagina dakul kikeis bikatpines mo bikalka̱louws.
Tage kukin kal bisimounid waseg wululay towen nag beivag anmwasin.”