8
Na̱tan vin iyousis peinan ikanavaya mav
1 Yeisuw mo ikatulag in wa̱koy yagan Oliv.
2 Walalayis mo iyum in Yowbad wanbunatum; gamag babaw mo inekes, isin, ikatimlakes.
3 Takatimlakeins kaleiwag sisiyas Palisiy mwasanin mo imeyes na̱tan vin niba̱nes bo imasis son teitan taw; vin mana̱wen mo iseinis wanuwein.
4-5 Idibakes Yeisuw, ilansa, “Tamwey, vin mana̱wen bo igeg ansinap. Na-imasis son namwan; nakaban imasis son tobwag taw. Moses nakaleiwag mamagina, kadiloka bitaweiys dakul waseg vinay kalisiy ikanavaysa mav. Ya̱koum aveiyag bukulivan?”
6 Ilivans ma̱wan va̱gan biyakwanes Yeisuw. Magat beibol anilivan, mo biyateles. Yeisuw gog istotow, naman waseg mo ilel wapwepway.
7 Igawa ivvaluts asilivan, ikatiga̱nes Yeisuw, kaleiwag towen silma̱nin. Mapuna itamanaw, ilana, “Kal yakamiy ta-ivag ansinap kalbaleb, wanmugwana dakul bignilov, babaw yakamiy wankuyeim mo bukulivelovs, beimat.”
8 Ilivan ikous, vayuwein mo istotow ilelel wapwepway.
9 Iliganes anilivan, mo ininuways, tatanok tatanok mo inounas ineis, tamumwey imugwas, gamaga babaw wankuyeim. Ikous, asteiyun-wan nisesus son vin mana̱wen itamanaw wamatan.
10 Yeisuw mo itamnow matan, ilana, “Vin yak, avanuy tasiyas tayateleims? Tabta beiweims?”
11 Ilana, “Nag, bo ineis, asibabaw-wan.”
Yeisuw ilana, “Yey ma̱wan; nag bayateleim; nag ba̱weim. Kunoun kun. Awoum kuvgavaw amsinap towen kalbaleb.”
Yeisuw ven watinow gimgilis sikamnat
12 Vayuwein Yeisuw mo idibakes, ilana, “Yey ven watinow gimgilis sikamnat, yey. Kal yak bukwabkunig, dadub mo beikous muked waseg, peinan bo ivanoum mukwamnat, mwamovam silma̱nin.”
13 Tasiyas Palisiy mo idibakes Yeisuw, ilansa, “Nag kasimounid amlivan, peinan liva̱neim tatoneim.”
14 Iw to Yeisuw, ilana, “Liva̱neig towen alivan, bo mounid-wan; peinan akakin avanuy ma̱noy nam o avanuy ban; yakamiy gog nag kukwakins avanuy ma̱noy nam o avanuy ban.
15 Ven watinow sinapun waseg kukwaleiwags yakamiy; yey gog nag bakaleiwag wasigeis gamag mwasinis; nag.
16 Magat yey bakaleiwag, gunakaleiwag mounid-wan, peinan nag agmwa̱net bakaleiwag. Towen gog nikayabeig nam, Tamag, soug nakases. Mapuna makaleiwag mounid-wan.
17 “Livan nises wamikaleiwag tatineimiy mamagina: Magat asteiy gamag asilivan bila̱tans katanok-wan, asilivan bo mounid.
18 Liva̱neig amateiy nakalivan, soug Tamag nikayabeig nam.”
19 Tasiyas mo ilansa, “Avanuy Tamam?”
Yeisuw gog ikatimop asilivan, ilana, “Yakamiy nag kukwakins yey, o nag kukwakins Tamag. Magat bukukwakins yey, mo bukukwakins Tamag.”
20 Igawa Yeisuw ikatimlakay Yowbad wanbunatum, anilivan towen nilivan money Buntuman wanuwan; tage nag kal iyous, peinan nag ilouvat tutan bikanig. Igaw-wan.
Igaw ban ta-bukuwekeigs
21 Vayuwein mo idibakes, ilana, “Bo banoun mo bukunineveigs, nag gog; bo bukumta̱mats son amisinap kalbaleb, peinan ta-ma̱wan bukuwekeigs.”
22 Min-Yudiy tasiyas mo illivans, ilansa, “Adok bo tonena bikatimet peinan ilana, ‘Ven towen ban, ta-ma̱wan bukuwekeigs’?”
23 Yeisuw gog idibakes, ilana, “Yakamiy watinow gimgilis yakamiy; yey gog wanakaew gimgeilin yey. Yakamiy miven towen watinow; yey gunaven kweitan.
24 Bo adibakeimiy bukumta̱mats son amisinap kalbaleb. Kukin nag bukusimounids yey Mesay yey, mo bukumta̱mats son amisinap kalbaleb.”
25-26 Ilansa, “Kavel yak?”
Yeisuw ilana, “Ma̱wan kweiboug nakatimlakeimiy. Kadilokeig livneimiy babaw balivan o bakaleiwag wasigeis yakamiy; nag gog, peinan towen nikayabeig nam ansinap towen mounid, anilivan tonen naligen, assekeimiy ven watinow gimgilis yakamiy.”
27 Yeisuw bo ilivan liva̱nen Taman, tage tasiyas nag ikakins.
28 Yeisuw ilana, “Igaw wakamweilok bukutamnaweigs Gimgilitoun yey, mo bukukwakins yey Mesay yey, o nag alivan gunakaleiwag tatoneig. Peinan Tamag nikatimlakeig mo alivan ma̱wan anilivan tonen.
29 Towen nikayabeig nam; soug towen nakases. Nag bilisaweig agumwa̱net bases. Peinan tuta babaw gunawotet bo ikadilok nanon waseg.”
30 Tasiyas ikatilutegs anilivan towen, tage mwasanina isimounids waseg.
Sinap mounid bitokeim bukun wamnat
31-32 Min-Yudiy mwasanin bo isimounids waseg Yeisuw, mo idibakes tasiyas ilana, “Kukin tut babaw bukwaninawes agulivan yey, gunavamul mounid yakamiy. E, mo bukukwakins sinap mounid, va̱gan kid bilikumiy bukuneis wamnat.”
33 Ikatimapus aygan, ilansa, “Yakamey Ebelam delen yakamey. Nag kweitan tut nakases wa̱deil; nag. Aveiyag wawun amlivan, ‘Bilikumiy, bukuneis wamnat’?”
34 Yeisuw ilana, “Mounid adibakeimiy, kal yak mukwawotet kalbaleb, mamagina tasiwun deil ya̱koum, peinan wanuwan dadub kuses.
35 Tasiwun deil nag ma̱wana tasiyas taginvens. Tage ven tanuwagan natun mo bises bisigeg.
36 Magat Natun bitokeim tasiwun deil ya̱koum mo bukun wamnat, bo mounid bukusesuna bukusigeg.
37-38 “Yey akakin Ebelam tibun yakamiy, tage sivinamiy bukuweigs, peinan aygag nag isiw ninoumiy wanuwan. Adibakeimiy sinap towen igaw soug Tamag bo nakin, tage nag kuliganes. Yakamiy gog nukuliganes tibumiy anilivan, mo kuvva̱ges ma̱wan.”
Yakamiy tibumiy Seitan
39-41 Iweis tasiyas, ilansa, “Tibum Ebelam.”
Yeisuw ilana, “Magat Ebelam tibun yakamiy, mo bukuwteles Ebelam nawotet. Tage sivinamiy bukuweigs yey, nasekeimiy livan mounid to naligen Yowbad waseg. Ebelam nag bivag ma̱wan. Yakamiy kuwteles tibumiy nawotet.”
Iweis tasiyas, ilansa, “Inmayas nag ikanavays mav mo ikopwemas, nag. Yakamey tibum anmwa̱net Yowbad.”
42 Yeisuw ilana, “Adok nag. Magat Yowbad tibumiy mo bukusiwyoubugs, peinan Yowbad waseg ma̱noy nam. Yey gunakaleiwag nag; mtowen nikayabeig nam.
43 Aveiyag wawun nag kukwakins agulivan? Adok peinan nag kadilokeimiy bukuliganes agulivan towen.
44 “Yakamiy tibumiy Seitan; sivinamiy gog bukuwteles nanon tibumiy towen. Wanmugwana tawayin gamag towen; sinap mounid bo ipiyev, peinan ta-ivag ansinap mounid. Misikena tayyaweid towen, tuta babaw anilivan yaweid. Inada tayyaweid mtowen.
45 “Yey gog, agulivan mounid, mapuna kupiyaves.
46 Kal yak ikadilokeim bukwavteg agusinap kalbaleb? Adok nag kavel. Kukin agulivan mounid, aveiyag wawun nag kusimounids waseg?
47 Tage Yowbad angamag bo biligen anilivan. Yakamiy gog nag, nag bukuliganes anilivan, peinan tobwag gamag yakamiy.”
Yey amug Ebelam ikuyeim
48 Min-Yudiy tasiyas ikatimapus aygan, ilansa, “Adok mounid amalivan, ‘Ya̱koum gum-Samaliy ya̱koum, Baloum bo iweim.’ ”
49 Yeisuw ilana, “Nag. Nag iweig Baloum. Bo avnas Tamag Yowbad, tage yakamiy nag kuvna̱seigs yey.
50 “Nag ivag sivinag yakawanag bivakaein, nag. Teitan gog sivinan yakawanag bivakaein; mtowen mo bikaleiwag.
51 Mounid adibakeimiy, kukin kal bivnas agulivan, nag bikanig, nag; bo bises bisigeg.”
52-53 Min-Yudiy tasiyas mo idibakes, ilansa, “Tut towen mounid kakakin Baloum bo iweim; peinan amlivan, ‘Kukin kal bivnas agulivan, nag bikanig, nag; bo bises bisigeg.’ Datoveks Ebelam bo ikanig. Tasiyas palopits kweiboug bo ikinka̱nigs ikous. Tabta bukulisow Ebelam, ne? Towen nikanig. Tasiyas palopits nikanigs. Kal yak kudok mugwamag nag bikanigs?”
54-55 Yeisuw ilana, “Magat bayakawaneig tatoneig, bo balivana makaw. Tage Tamag iyakawaneig, mtowen kudokes miYowbad. Tage nag kukwakins towen. Yey akakin. Kukin balivan, ‘Yey nag bakakin’ mo bamlavag tayyaweid ma̱wana yakamiy. Mounid akakin towen, akanow aygan.
56 “Tabuds Ebelam imwa̱saw peinan iligen tutag bo bam. Mamagin ikineig, mo imwa̱saw avakaein silma̱nig.”
57 Min-Yudiy tasiyas mo idibakes, ilansa, “Ya̱koum ta-ivag ambweilim sinwanim, mo kulivan, ‘Bo akin Ebelam.’ Takabala̱wein yak!”
58 Yeisuw ilana, “Mounid adibakeimiy, yey bo amug; Ebelam anatut wankuyeim.”
59 Iliganes anilivan towen, mo ikawes dakul va̱gan kid beiweiys; tage Yeisuw ivalel gamag inoun, ilisow Yowbad nabunatum.