18
Iyousis Yeisuw
(Matiw 26:47-56; Mak 14:43-50; Luk 22:47-53)
1 Anilivan towen ikous, Yeisuw mo inounas sen navamuls, iwloubus, ikanapels lay Kidlon, ikatulags, ineis bigulen oliv, isinis.
2 Yudas, towen tasilkodein Yeisuw, ikakina Yeisuw sen navamul inineis ven towen.
3 Mapuna Yudas mo imgwayes takannaviys sisiyas tanuwgwes lun situwa̱veks siplismans mwasanin, o Palisiy siplismans mwasanin; ikokews wodama, lampa, son naviy youdanen, inounas, ineis bag towen.
4 Yeisuw ikakin youd babaw igaw bilivet, iwa̱ge ilana, “Kal kunineves?”
5 Ilansa, “Gum-Nasalet yagan Yeisuw.”
Yeisuw ilana, “Yey.” Yudas gog siney tasiyas nitomos, mtowen tasilkodein Yeisuw.
6 E, iliganes Yeisuw anilivan, ilana, “Yey,” mo isineikiks, ikalka̱louws, immasis wapwepway.
7 Ikous, itamanaws, vayuwein Yeisuw mo ikatiga̱nes, ilana, “Kal kunineves?”
Ilansa, “Gum-Nasalet yagan Yeisuw.”
8 Iwa̱ge Yeisuw, ilana, “Bo adibakeimiy mtowen yey. Bukuyousigs yey, tabta bukuta̱mes tasiyas bineis wasiven; awoum kuyousis tasiyas.”
9 Yeisuw anilivan ma̱wan va̱gan bikamat livan towen Bukitab nilivnek mamagina:
“Gamag tasiyas nukusekeig nag teitan
iyamkwaneig, nag.”
10 Saymon Pita mo ikow napulut tanmunum, iweiy tanuwgwes-lun sitovek natouwat teitan, yagan Malkos, ibob teigan wanaka̱tay.
11 Yeisuw idibek Pita, ilana, “Kusem mupulut wakaban. Kadiloka ba̱moum kwa̱vig yayan Tamag nisekeig.”
Yeisuw iya̱tal tanuwgwes lun sitovek avakaein wamatan
(Matiw 26:57-58; Mak 14:53-54; Luk 22:54)
12 Takannaviy babaw sisiy sitovek, sisiyas min-Yudiy siplismans, mo iyousis Yeisuw, iyawanis naman.
13 E, itokes Yeisuw inawes wanamug Anas wanbunatum, tamwey towen Kayapas yawan; bweilim towen Kayapas tanuwgwes lun sitovek avakaein.
14 Mtowen Kayapas nidibakes min-Yudiy sitakaleiwag mamagina, “Kadiloka tatanok gamag bikanig peinads ya̱kids, bod Yudiy ya̱kids.” (Kukines Yon 11:50)
Pita ikayan Yeisuw
(Matiw 26:69-70; Mak 14:66-68; Luk 22:55-57)
15-16 Saymon Pita mo ikabwa̱kuns Yeisuw waseg, son navamul teitan; mtowen veiyon tanuwgwes lun sitovek, mapuna isiws wanbunatum sen gamag tasiyas nitokes Yeisuw. Tage Pita itamanaw iton wamatan bunatum. Mtowen veiyon tanuwgwes lun sitovek avakaein mo inek vin mana̱wen ikayamat wakoukwed, ilivans son, mo ikaliyow koukwed va̱gan Pita beisiw beim.
17 Vin mana̱wen mo idibek Pita, ilana, “Adok ya̱koum Yeisuw navamul teitan, ne?” Pita ilana, “Nag.”
18 Asiloulun; tasiyas tanuwgwes lun sitouwats sisiyas plismans mwasanin mo ivlakes kov, itamanaws ikammunuws kov walasin. Pita siney tasiyas ikammunuws.
Tanuwgwes lun sitovek avakaein ikatigan Yeisuw
(Matiw 26:59-66; Mak 14:55-64; Luk 22:66-71)
19 Tanuwgwes lun sitovek avakaein mo ikatigan Yeisuw, ilana, “Kalisiy muvamul? O aw-sinap waseg nukumulis tasiyas?”
20 Yeisuw ilana, “Agusinap bo alivan kamnat, gamag babaw wasigeis, Yowbad wanbunatum o sinagog wasigeis. Sitapwa̱loul waseg min-Yudiy babaw nikatilutegs agusinap nakatimlakay; nag kweitan sinap akatimwa̱lag o aka̱wum; nag.
21 Aveiyag wawun kwatiga̱neig yey? Kwatiga̱nes tanageins agulivan, tasiyas-nan; ikakinsa agulivan.”
22 Yeisuw ilivan ikous, teitan plisman wadadan nitamanaw mo iweiy Yeisuw, naman waseg, ilana, “Awoum kwatimop tanuwgwes lun sitovek anilivan ma̱wan.”
23 Yeisuw ilana, “Magat agulivan kalbaleb, kadiloka kwamtel aveiyag igeg. Kukin gog nag, aveiyag wawun nukuweig?”
24 Yeisuw igawa iyawanis naman, Anas mo ikayeb va̱gan kid biya̱tal wamatan Kayapas, mtowen tanuwgwes lun sitovek avakaein.
Vayuwein Pita mo ikayan Yeisuw
(Matiw 26:71-75; Mak 14:69-72; Luk 22:58-62)
25 Saymon Pita, igawa itamanaw ikammunuw kov; gamag mwasanin mo idibakes, ilansa, “Adok ya̱koum navamul teitan, ne?”
Pita ilana, “Nag.”
26 Tanuwgwes lun sitovek natouwat nises, mtowen veiyon towen Pita nibob teigan; ilana, “Adok bo akineim wa̱bag soum Yeisuw, ne?”
27 Vayuwein Pita ikayan, ilana, “Nag.” Mo igel kolkolek.
Iyateles Yeisuw wamatan Paylat
(Matiw 27:1-2, 11-14; Mak 15:1-5; Luk 23:1-5)
28 Iyateles Yeisuw wamatan Kayapas ee... walalayis. Ikous, mo inawes gabman avakaein wanbunatum bunavakaein. O peinan min-Yudiy ikatkakils sitapwa̱loul waseg, yam towen beikams Kaltuwon bulukwan la̱miy, nag kadilok beisiws gabman Lom wanbunatum wanuwan.
29 Mapuna Paylat isap in watoulan, idibakes, ilana, “Aveiyag wawun bukuyateles taw towen?”
30 Ilansa, “Kukin nag takalbaleb towen, nag bakamey waseg ya̱koum.”
31 Paylat ilana, “Mikaleiwag nises. Kunawes taw towen, kukwaleiwags waseg.”
Iweis min-Yudiy, ilansa, “Nag ivag makaleiwag va̱gan baka̱weiy gamag.”
32 Min-Yudiy asilivan towen waseg mo ikamat livan towen Yeisuw nilivnek, peinan ilivan, “Beiweigs waklos.”
33 Paylat mo iyum in wanbunatum, ilana, “Kukines Yeisuw beim.” Im to Yeisuw; Paylat mo ikatigan; ilana, “Tabta ya̱koum min-Yudiy siking, ya̱koum; ne?”
34 Iw to Yeisuw, ilana, “Sivinam bukukwakin, ne? O adok min-Yudiy bo idibakeims liva̱neig towen.”
35 Paylat ikatimop anilivan, ilana, “Yey nag gum-Yudiy, yey. Ambod tasiyas tanuwgwes lun nimayeims waseg yey. Aveiyag mukwalbaleb?”
36 Yeisuw ilana, “Ta-ivag gunakabkaleiwag ven watinow; nag. Magat gunakabkaleiwag ven watinow, gungamag mo bikanaviys va̱gan min-Yudiy nag biyousigs. Tage nag; gunakaleiwag kweitan-wan.”
37 Paylat ilana, “Tabta king teitan ya̱koum, ne?”
Yeisuw ilana, “Ma̱wana nukulivan. Inag nikopweig wotet towen silma̱nin. Mapuna bo nam ven watinow va̱gan bakatimlakay sinap mounid. Kalisiy asisinap mounid mo biliganes aygag.”
38 Paylat ilana, “Aveiyag sinap mounid?”
Min-Yudiy sivines beiweiys Yeisuw
(Matiw 27:15-31; Mak 15:6-20; Luk 23:13-25)
Paylat ilivan ikous, vayuwein mo inek min-Yudiy, idibakes, ilana, “Nag aban ansinap kalbaleb waseg taw towen.
39 Tage sagal towen Kaltuwon sinapun balik wa̱deil teitan baspuy bein wamnat. Sagal towen, kavel baspuy beiw? Takaleiwag yakamiy. Adok balik min-Yudiy miking baspuy beiw, ne?”
40 Iwaks avakaein, ilansa, “Taw towen bises; tage Bala̱bas beim.” Mtowen Bala̱bas tavveinaw teitan.