12
Meliy iptum kaken Yeisuw, ven Betaniy waseg
1 Yam kweinim katanok mo bisilamaws Sagal Kaltuwon, Yeisuw inoun in Lasalos wanven Betaniy, mtowen kweiboug nikanig Yeisuw ivag mo neikit.
2 Yeisuw inekes, mo iva̱ges kan; Ma̱lid ikokew kan silma̱nin Yeisuw sen tawaw beikams. Lasalos siney tasiyas ikamkwams.
3 Meliy mo ikow kwavitanok tagon yagan nad, maysan singay avakaein, iptum kaken Yeisuw, wanaman mo ikow kunun tonen vayva̱yov, itanob Yeisuw kaken. Nad towen simsiman bo ika̱lawt bunatum.
4-5 Navamul teitan Yudas Iskaliyot igaw bisilkod Yeisuw, mtowen mo ilivan, ilana, “Aveiyag wawun iyamkwen nad? Maysan towen kadiloka biyamiyis lakatutoun kina; money bitakow, bitavgen tasimavs wasigeis.”
6 Anilivan ma̱wan, nag sivinan bilabes tasiyas tasimavs; nag. E, peinan tavveinaw towen Yudas, nawotet imtakavatay simoney Yeisuw sen navamul, ivveinaw waseg.
7-8 Yeisuw ikatimop anilivan, ilana, “Awoum kukwa̱nan waseg mana̱wen vin; nawotet towen silma̱nin gunakanig. Tasiyas tasimavs tuta babaw simiyas nukusesus, tage yey nag, igaw kakit mo balisaweimiy.”
Sivines kid beiweiys Lasalos
9 Min-Yudiy iliganes Yeisuw nises Betaniy, singay babaw tasiyas mo imeis, sivines kid bikines, o bikines-vak Lasalos, peinan nikanig, Yeisuw ivag mo ikit.
10-11 Tanuwgwes lun situwa̱veks mo ininuways, ilansa, “Ama̱wan bitaweiys Lasalos, peinan min-Yudiy babaw Lasalos bo ikines mo ilisaweids, inekes Yeisuw, mo isimounids waseg.”
Yeisuw isiw Yelusalem wanuwan
(Matiw 21:1-11; Mak 11:1-11; Luk 19:28-40)
12 Neiyam-nen gamag babaw tasiyas nikatuyouns nimeis Yelusalem silma̱nin sagal, mo iliganes Yeisuw bo neim.
13 Mapuna ikawes molay, inounas va̱gan kid binekes Yeisuw, iwkuwaks, ilansa, “Osana! Kalin nuwem ya̱koum, nukum Yowbad nawotet silma̱nin, min-Yisleil daguyaws ya̱koum.”
14-15 Yeisuw iban donkiy, imwen wakunuwatan, inoun, ma̱wan Bukitab nilivnek mamagina,
“Awoum beivag amipwa̱yat min-Sayon yakamiy!
Kukines miking bo neim,
Isin watapwan donkiy natun.”
16 Misumkwey towen navamul na-ikakins Bukitab nilivnek Yeisuw nawotet towen; wankuyeim gog Yeisuw iyum in walba̱lab mo inuwes livan towen, liva̱nen Yeisuw nawotet peinan bo ikamat ma̱wana nilivnek.
17-18 Gamag mwasanin nikines Yeisuw nidow takanig Lasalos igaw wakalawagan nises mo isap son mwamovan, gamag tasiyas mo ikamteles sinap towen wasigeis gamaga babaw sisiyas; mapuna inekes Yeisuw, peinan iliganes liva̱nen nawotet towen tawtoun.
19 Tasiyas Palisiy iliganes gamag babaw ninekes Yeisuw; sisiyas mo illivans, ilansa, “Bo igak! Ama̱wan bukuvkakes? Gamag tababawsa ininekes mtowen Yeisuw.”
Min-Gilis sivines bikines Yeisuw
20 Min-Gilis mwasanin nimeis Yelusalem sagal towen silma̱nin, sivines kid bitapwa̱louls Yowbad waseg.
21 Yeisuw navamul Pilip nises Yelusalem, inaven Beteseid wawnuwan Galiliy, min-Gilis tasiyas mo inekes Pilip, ilansa, “Tamwey, sivinem bakakin Yeisuw.”
22 Pilip in idibek Andiluw; Andiluw son Pilip ineis idibakes Yeisuw.
23 Yeisuw mo idibakes tasiyas, ilana, “Gimgilitoun yey, bo neim tutag balivet yakawanag tatoneig.
24 Mounid adibakeimiy, kukin kaytul wit nag bein wapwepway bo bisesuna anmwa̱net; tage kukin bein wapwepway, bikanig mo beivag anagin babaw.
25 “Kukin kal sivinan mwamovan, mo biyamkwen mwamovan tonen; tage bipiyev mwamovan ven watinow, mo biban mwamovan tonen bises bisigeg.
26 “Kukin kal yak sivinam bukumlavag gunavamul, kadiloka bukwabkunig; mo soug yak bitases. Tamag bo bikalin nuwan ya̱koum, gunavamul ya̱koum.
Igaw mo bitamnawes Yeisuw kaligweg waseg
27 “Tut towen bo igeg nanoug. Tabta banitoug, balana, ‘Tamag, kwatinabweig; awoum tut towen bakanig.’ Adok nag, peinan wotet towen silma̱nin bo nam.
28 Tamag, kuvag va̱gan gamag babaw bikavasims, peinan yak Tatawtoun yak.”
Walba̱lab aygan mo ikatilutegs, ilana, “Bo avag; igaw mo bavgavaw, yagag yakawanan peinan.”
29 Gamag mwasanin nitomos idokes kid pala̱pal. Mwasanin gog ilansa, “Gum-liba̱lab nidibek Yeisuw, anelos adok.”
30 Yeisuw ikatimop asilivan, ilana, “Aygan towen nag peinag yey; tage aygan towen pinamiy yakamiy.
31 Tut towen Tamag bo bimop sinap kalbaleb wadaban pwepway. Tanugwagan ven watinow towen Seitan, Tamag bo bikayeb.
32 Igaw bitamnaweigs wakaligweg mo babiteilis gamag babaw bimeis waseg yey.”
33 Yeisuw anilivan towen va̱gan bikatimlakes ama̱wan bikanig.
34 Gamag babaw ikatimapus aygan, ilansa, “Kakakin Bukitab ilivnek Mesay bo bises bisigeg; aveiyag wawun amlivan ‘Kadiloka bitamnaweigs wakaligweg, gimgilitoun yey’? Gimgilitoun yak muwotet ama̱wan?”
35 Iw to Yeisuw, ilana, “Tut nag biveiyov kamnat bises wasigeis yakamiy. Tut towen kadiloka bukunounas; igaw bidadub, ta-ma̱wan bukukwakins ked.
36 Igaw nases, mikamnat bo ivanoum; kadiloka kusimounids waseg, va̱gan bukumlavags gamag kamnat yakamiy.”
Yeisuw ilivan ikous, mo inoun in, itoupan va̱gan nag biba̱nes.
Min-Yudiy na-isimounids
37-38 Tasiyas nikines Yeisuw nawotet singay tawtoun; tage nag isimounids mtowen Mesay; to nikamat palopit Isaya anilivan, kweiboug nilivnek mamagina:
“E, Guyaw, kal bisimounid youd to nakalivan?
Kalisiy bo ikines Yowbad natawtoun?”
39-40 Mapun ta-ma̱wan bisimounids, peinan Isaya vayuwein nilivnek, ilana,
“Bo ivag mites ikawkwaw,
bo ivag tiges ikakon tasiyas;
mata mites beikins;
mata ninous bikakins;
mo bikanavin ninous bimekeigs,
va̱gan kid beibweins tasiyas.”
41 Anilivan towen Isaya nilivnek, peinan matan isisawl, ikin Mesay natawtoun, liva̱nen mo ilivan.
42-43 Min-Yudiy gog takaleiwags mwasanin isimounids waseg Yeisuw, tage nag bikamteles ninous, peinan iwenes tasiyas Palisiy, idokes bibwabwes sitapwa̱loul. Tasiyas nag ivna̱ses Yowbad, ivna̱ses gamag ninous; sivines kid gamag bikavasis, Yowbad nag.
Gamag biya̱tals Yeisuw anilivan waseg
44 Yeisuw iwak, aygan avakaein ilana, “Kukin kal bisimounid waseg yey, nag go isimounid waseg yey, tage isimounid waseg Towen nikayabeig nam.
45 “Kukin gog kal bikineig, bikin-vak Towen nikayabeig nam.
46-47 “Yey nam watinow silma̱nin mikamnat. Kal yak bukusimounid waseg yey, mo beikous mudadub. Kukin bukwatiligen aygag, tage nag bukuvnas aygag, yey nag bamop amsinap kalbaleb, nag. Peinan nag am watinow va̱gan bayateleimiy ven watinow gimgilis yakamiy, nag; nam gog va̱gan kid bakatinabweimiy.
48 “Kukin bukupiyev aygag tatoneig, o bukupiyaveig yey, igaw nakabiyokous tut waseg, aygag kaka̱wen biyateleim, mo bukulivet mapun amsinap kalbaleb.
49 “Yey nag alivan agulivan tatoneig, nag. Tamag bo ikaleiwag. Tamag gog nikayabeig, nam watinow, mo alivan, ma̱wan nakaleiwag tonen.
50 “Yey akakin nakaleiwag towen silma̱nin mwamovamiy nag beikous. Tamag nakaleiwag waseg isekeig aygan, mo alivan ma̱wan.”