5
Neky diꞌibʉ winjayʉ windujp ʉxkʉꞌp, es ja Borreeguꞌunk
1 Nétʉts nꞌijxy ma̱ Diosʉ ꞌyaga̱ꞌa̱ñgyʉꞌʉ tuk pityʉ neky diꞌibʉ winjayʉ windujp ʉxkʉꞌp, es jʉxtujkʉ seyʉ.
2 Net tuꞌugʉ mʉk anklʉs kya̱jxkéky:
—¿Pʉ́n pátʉp es dyajjʉnákʉt ja seyʉ es dyaꞌꞌawa̱ꞌa̱dsʉdʉ tya̱dʉ neky?
3 Per ni tsa̱jpótm, ni naxwiiñ es ni nax patkʉꞌp kyajápʉty pʉ́n mba̱a̱t dyaꞌꞌawa̱ꞌa̱dsyʉ tadʉ neky, es ni mba̱a̱t tkaꞌixtʉ.
4 Nétʉts ʉj njantsytyʉjkʉ jiibyʉ, jaꞌa ko kyajʉ naty pʉ́n yajpa̱a̱ty pʉ́n pátʉp es dyaꞌꞌawa̱ꞌa̱dsʉt ja neky es tꞌíxʉt wiꞌix jyʉnaꞌañ.
5 Net tuꞌuk ja niꞌiꞌpx ma̱jtáxkpʉ mʉjja̱ꞌa̱ydyʉjk xyꞌanma̱a̱yʉts:
—Katʉ mjʉꞌʉy. Yʉ Judaa tyʉʉmp ꞌya̱a̱ts diꞌibʉ yajtijp Ka̱a̱, diꞌibʉ nandʉꞌʉn tʉʉmpꞌa̱jt a̱a̱tsꞌa̱jtʉp ja rey Davit, yʉꞌʉ tʉ myadaꞌaky. Yʉꞌʉ mba̱a̱t dyaꞌꞌawa̱ꞌa̱dsyʉ tadʉ nekypyity es dyajjʉnákʉt ja jʉxtujkpʉ seyʉ.
6 Nétʉts nꞌijxy kujkꞌám ma̱ ja niꞌiꞌpx ma̱jtáxkpʉ mʉjja̱ꞌa̱ydyʉjk es ma̱ ja nima̱jtáxkpʉ jikyꞌa̱jtpʉty diꞌibʉ ijttʉp ma̱ Dios yajkutíky wyindum, es nꞌijxyʉts tuꞌugʉ Borreeguꞌunk tyanʉ diꞌibʉ kʉxʉꞌkp éxtʉm tʉ ꞌyokwindsʉꞌkʉnꞌa̱jtpʉ. Es tmʉdaty yʉ Borreeguꞌunk jʉxtujkʉ wya̱j es jʉxtujkʉ wyiin. Es ja jʉxtujkpʉ wyiin, yʉꞌʉ ꞌyandijpy ja Diosʉ Jya̱ꞌa̱jʉn diꞌibʉ tyiimpy jʉxtujk naxʉ tuunk es diꞌibʉ Dios tʉ tkexy ma̱ tʉgekyʉ naxwíñʉdʉ.
7 Tadʉ Borreeguꞌunk yʉꞌʉ oj ñejxy es tꞌaxa̱jʉ ja neky diꞌibʉ naty ja Dios myʉda̱jtypy ma̱ ja ꞌyaga̱ꞌa̱ñgyʉꞌʉ.
8 Es ko tꞌaxa̱jʉ ja neky, ja nima̱jtáxkpʉ jikyꞌa̱jtpʉty es ja niꞌiꞌpx ma̱jtáxkpʉ mʉjja̱ꞌa̱ydyʉjk ñaygyoxtʉna̱a̱ydyákʉ Borreeguꞌunk wyindum. Niduꞌuk niduꞌugʉ mʉjja̱ꞌa̱ydyʉjk tmʉdattʉ arpʉ esʉ oorʉ tsim ujts mʉdʉ poom, diꞌibʉ ꞌyandijpy ja Diosʉ jyaꞌayʉdyʉ kya̱jxtákʉn,
9 es tꞌʉwdʉ tya̱dʉ jembyʉ ʉy:
Mijtsʉ dʉꞌʉn mbátʉp es xyꞌaxá̱jʉt tya̱dʉ neky es xyajjʉnákʉt ja jʉxtujkpʉ seyʉ.
Pa̱a̱ty mʉt ko tʉ mnejxy windsʉꞌkʉn,
es mʉt ja mneꞌpyñ xyjuuy
éxtʉm ja Diosʉ jyaꞌayʉty,
pʉ́nʉty jikyꞌa̱jttʉ ma̱ maygya̱jpn, ma̱ wiinkpʉ may ayuk ka̱jxpʉty, es ma̱ mayñaxwíñʉdʉ.
10 Tʉ xypyʉjta̱ꞌa̱ktʉ yajkutujkpʉty esʉ teedyʉty,
es tmʉdúndʉt ja Dios es yajkutúktʉt naxwiiñ.
11 Nétʉts nꞌijxy kana̱k miyongʉ ánklʉsʉty juwʉdity ma̱ ja iꞌpx ma̱jtáxkpʉ mʉjja̱ꞌa̱ydyʉjk, es ja nima̱jtáxkpʉ jikyꞌa̱jtpʉty, es ma̱ diꞌibʉ uñaapy tsʉnaapy uñaaybyajnóty,
12 es jyʉna̱ꞌa̱ndʉ mʉk:
Yʉ Borreeguꞌunk diꞌibʉ tʉ ñejxy windsʉꞌkʉn,
pátʉp winʉ xʉʉ winʉ tiempʉ tꞌaxá̱jʉt ja kutujkʉn,
mʉjꞌa̱jtʉn, wijyꞌa̱jtʉn, mʉkꞌa̱jtʉn,
windsʉꞌkʉn, oyꞌa̱jtʉn esʉ awda̱jtʉn.
13 Es nmʉdooyʉts nandʉꞌʉn nidʉgekyʉ diꞌibʉ jikyꞌa̱jttʉp tsa̱jpótm, naxwiiñ, nax patkʉꞌp, es jikymyejyñóty jyʉna̱ꞌa̱ndʉ:
Pátʉdʉp ja Dios esʉ Borreeguꞌunk
ja awda̱jtʉn, windsʉꞌkʉn, mʉjꞌa̱jtʉn
esʉ mʉkꞌa̱jtʉn winʉ xʉʉ winʉ tiempʉ.
14 Ja nima̱jtáxkpʉ jikyꞌa̱jtpʉ jyʉna̱ꞌa̱ndʉ:
—Waꞌan dʉꞌʉnʉty.
Es ja niꞌiꞌpx ma̱jtáxkpʉ mʉjja̱ꞌa̱ydyʉjk ñaygyoxtʉna̱a̱ydyákʉdʉ es tꞌawda̱jttʉ Dios.