3
Iesu ei buo ane Moses
1 Maolona Tamtamaigu, Salemo ei ino na langi i toleale amutou tamai muata na langi. Maido me namutou damutatala iiti e Iesu odo, ei a Aposel mine eitou ma Mapana Prist eitou silimulimuli e ei me eitou veipalele a aisane ei.
2 Ei toesesele a pipigona Salemo ei bilii e ei tomane Moses ei pipigo sagali na luma mine Salemo.
3 Moni malasana buo mine Iesu ei buo ane Moses, tomane a bibi na tinigena luma ei isa a aisa buo i vululusi a luma oto do.
4 Luma vuso tastasa ei isa a bibi ei tige, moni e Salemo ei mapale a golugolu vuso.
5 Moses ei toesesele tomane a bibi na pipigona lilona luma vuso mine Salemo, me ei isa pipigona mina ademuadana a golugolu vuso mulimuli Salemo ei ni ademuada i ane ei.
6 Moni e Krais ei e Natune Salemo, me ei toesesele a pipigona mina itealena luma mine Salemo. Mane eitou lapitole obi a silimulina me magitali a sava ni palea, eitou a luma mine Salemo.
Vanunua mina saukikina inade sou ma mapigogoi ete ne sou guale a manoana
7 Maidolo ma Maolona Nunu ei ade maido,
“Seidei mane amutou longe a baligolune ei,
8 io namutou ma tabesobesobe lei a lilone amutou,
tomane lisa eisusune amutou sou saukiki a inadegu
na ilala do sou malu na avena vanunua boa.
9 Me sou ite a pipigona vuso eau goli mapigogoi a avala savulu iva.
Moni sou tovetove eau na matamatana inigogona.
10 Maidolo me eau lilosinoa sele ane sou a abuna vanunua ma tavivine do,
me eau vei, ‘Ilala taliuliu lilone sou maisabasaba,
me sou ma muada oto a vea eau vileale le sou.’
11 Maidolo me eau lilosinoa mea ade sagali ane sou maido,
‘Ivu uata, sou ma mapigogoi ete ne sou gali ulilo mina manoana minau.’ ”
12 Tamtamaigu, amutou ulago kuba, dae ne tamaine amutou tasa ei isa a damutatalana pagu lilo na lilone ei mei litase a silimulina mei lametase Salemo ei mauli.
13 Moni maladalada vuso eitou vate “seidei,” amutou tastasa namutou bilii a inade doana usino ne sou a vanunua ma tavivine mine Salemo, dae a inigogona mina sinusu ni auala ane tasa mine amutou mei ni tabesobe sagali a lilone ei.
14 Ilala eitou soke a silimuline Salemo, eitou silimuli sagali sele. Me neitou goli a silimulina mine eitou ni muina sagali asu mapigogoi a ilala na punuluna. Mane eitou goli maido, io eitou eili maitamaina ivu mine Krais.
15 Eitou muada, inade li saboa ino,
“Seidei mane amutou longe a baligolune ei,
de namutou ma tabesobesobe lei a buune amutou,
tomane eisusune amutou sou lametase eau taliuliu lisa.”
16 Sei sou lisa sou longe a baligolune Salemo, me sou toevautauta me sou saukiki a inade minei? Ede a vanunua ma tavivine vuso Moses ei maasilele e sou maino ne Isip.
17 Me Salemo ei sinoa ane sei sou mapigogoi a avala savulu iva? Ei sinoa ane sou a vanunua ma tavivine sou goli a sinusu, me sou mate, ma aitolane sou ino na avena vanunua boa. Ei sinoa ane sou a abuna moni iodo.
18 Ne sei sou Salemo ei vei ivu uata ve sou ma mapigogoi ete ne sou gali ulilo na aubu mina manoana minei? Ede sou a abuna vanunua ma tavivine sou saukikiki a inade minei.
19 Maido me eitou muada, vanunua ma tavivine do sou ma mapigogoi ete ne sou gali ulilo na aubu mina manoana, vuna sou ma silimuli ete e Salemo.