7
Yile Neki Wurdanthuk Kura Ngala
1 Bere da nhini thangunu Yile neki-ka mamna ngarra nukunu Noah, “Ngay-ka ngirranhingkadha ngardi nhinhi da matha kardu patha thathpirr thanam-yu. I nhini nankungime-ka narnerdinu-warda-ngime ngarra tharntu.
2 I nanmertinu ku wanku 14-wa ku-yu ku pana ngarra tarangka murrinh mampa-re-yu, ku nugarn 7 i ku mirringi 7. Mu ku ngamere ku mere tarangka thathpirr-ka perrkenku perrkenku nanbertinu ku nugarn i ku mirringi.
3 I ku murrirrbe deyida ku nugarn 7 i ku mirringi 7 nanmertnu. I da nakurlnu deyida-nu ku terert nhini-ka pawithpith-deyida-nu.
4 I bere da ngarra 7 pamanu-ka kura yelyel ngurduthuknu da ngarra putek ngala pana. I kura-ka bere ngatha wangu pirrayelnu da 40 days i da thipinhi 40. I kardu wurnangat warda ngatha i ku wurnangat warda ngatha panthikwiknu. I ngay-ka ngirranparlak da-nu matha ngarra kardu i ku mampunpatha-yu.”
5 I bere nukunu Noah-ka murrinh mamnabath murrinh ngarra Yile neki thangunu mamna-yu i mange nhini mam-yu.
6 Bere da thangku nukunu Noah-ka kardu da thangku 600-wa kardidha ngarra Yile neki-re kura ngala wurdanthuk-yu.
7 Bere nukunu Noah, palngun nukunu, wakal nukunu-re i palngun pigunu parnamkardi-warda-ngime ngarra tharntu, nhini-ka mere warda ngarra pankuyiwiknungime.
8-9 I ku wunku parnardi ku wurnangat warda ngatha wunku ku murrirrbe. I ku ngamere tarangka-ya, i ngamere manangka tarangka thathpirr, i pirdurdidha ngarra tharntu perrkenku perrkenku ku nugarn-ya ku mirringi-ya murrinh ngarra Yile neki thangunu mamna ngarra Noah.
10 I da ngarra 7 nhini thangunu parnamkardingime-ka wunku ku wunku, Yile neki-ka kura ngala nimin-ya, wurdanthuk warda.
11-12 Bere da nhini-re nukunu Noah-ka 600 da thangku nukunu-yu kardidha. I da merrk perrkenku i da 17 days, da nhini-re-ka kura ngarra putek pepe thangunu kathu-ka lurruth ngala da matha dempirnturt, i da ngarra kangkarl thangunu kathu kura ngala da matha pirriyeldha bere matha wangu ngarra da 40 i da thipinhi 40 da mana.
13 Bere Noah i palngun nukunu i wakal nukunu Shem, Ham i Japheth, i palngun pigunu-re parnamkardingime ngarra tharntu. I da ngarra 7 nhini thangunu mam-ka Yile neki-re kura ngala wurdanthuk.
14-15 I ku wanku parnardi ku ngala ngala, ku purrkpurrk i ku murrirrbe purrkpurrk wunku. I ku-ka perrkenku perrkenku pirdurdidha wunku Noah-yu,
16 murrinh ngarra Yile neki thangunu mamna ngarra Noah. I bere Yile neki-re-ka danthap warda nanhthi tuwa.
17-18 I kura ngala thathpirr warda wurdanthuk-yu da ngarra 40 da-nu mana.
I bere kura-ka puy wangu denawirnturttha wurrini i kura-ka puy wangu ngala wangu wurrinidha, mu tharntu-ka puy wurrinirurturttha ngarra kura kangkarl-yu.
19-20 I kura-ka puy wurrinimardawiththa i ngarra da palyirr ngala ngala da mana mamperdum, i puy kunungingki deyida wangu dempirnturt kura-yu ngarra mampeweth da mana.
21-22 I kardu i ku wurnangat warda ngatha daninthikwiktha wurrini da ngarra putek kanhi pardidha-yu.
23 Yile neki-re pirrimpunparlak kardu i ku wurnangat warda ngatha da ngarra putek ngala kanhi pardidha-yu. Mu Noah da matha peningime birnu pardedhangime-yu i ku wunku ngarra tharntu pardinganamardadha-yu.
24 Bere kura ngala thathpirr-ka kuguk-wa pirridha da merrk 5 da mana.