2
Kanuma Kaobaisiyena ana Botuna
1 Ba Pentecost marana i botu wai bigeruwana biyisi ereonowasi gawara kesanai si kesanisi.
2 Ba mara kesana gugura, sibe kaikapo sakina rutainina si nonori, sapamai i gakira memena si makira si mamana wai, yovena i bonuvi.
3 Ba si kinakinana ba sawara kesana pepe rutainina karakarasina si kitai ba si kasi mosamosarisi, ba si botu kesakesasike tepasi yai si toga.
4 Ba ereonowasi Kanuma Kaobaisiyena i bonuvisi ba ibo bimaragasisi wai si dagui gamo bubausi yai sibi sisiya.
5 Kona maranai Jew biyisi, God si bokuwayei wai, dam tumana ba si wagawaga si botu Jerusalem kamonai si mamana.
6 Maranai niko gugura sibe rutainina pipiya si nonori wai, korotosi si notuwa ba si gaenisi. Ba ereonowasi si sikwana saki, kata bigeruwana biyisi kesakesasike asi gamo yai sibi sisiya.
7 Si sikwana negenegeisi ba si wareyei ba si wona, “Nikosi sebasebare nikasike te bisisiya wai kosi Galilee biyisi kona?
8 Ba mekabage wai ereonowata kesakesasike, ta nonora ba ata gamo ai te bisisiya?
9 Kota wai Parthia, Media, ba Elam biyita; ba Mesopotamia, Judea, ba Cappadocia biyita; ba Pontus ba Asia,
10 Phrygia, Pamphylia, ba Egypt ba Libya kupurina, Cyrene gwabinai, yakai mutukai wai Rome biyikaika botu ku Jerusalem.
11 Gentile ba Jew biyisi iyabosi si garubona Jew biyisi asi yawasa si kibikibi. Ba Crete ba Arab biyikai, ka nonorisi ba BADA God ana kiyakiyaya ama gamo ai te bisisiyana!”
12 Si sikwana negenegeis ba si buruburuwei wai si toiruba bibirana, “Nikona basuna awaika?”
13 Saba, pipiya mutusi wai si binamisi ba si wonawona, “Nikosi pipiya wine si toma saki.”
Peter i Rumamara
14 Damanina ba Peter apostle asi 11 yabata si msiri, ba gamona kaikaponai i parara koroto kurisi, “Komi Jew biyimi ba iyabomi wata Jerusalem kamonai ko mamana wai ereonowami koi tainabaenega kabitam kuriku ba ani sisiya.
15 Nikosi sebasebare wai kega si toma neganega. Niko karaku wata mom mara i tom, ba kao wai 9:00.
16 Kega, nikona wai peroveta Joel matapa wata i sisiyei,
17 ‘God i wona, “Mara damonai au Kanuma ani utusewai
pipiya ereonowasi kurisi.
Natunatumi bibaine ba sebasebare sini peroveta wona,
ami yaraka aba kinakinanai sina kinana,
ba ami magumagura sina bo meumeu.
18 Ba kosi marasiyai, au saibisaibirisi,
sebasebare ba bibaine
au Kanuma ana utusewai kurisi ba
sini peroveta wona.
19 Ba yebo sapama kaidamonai kituruba ana wose
ba matakira dobu kamonai ani beyena.
Tara ba keyama kai karakarasina
ba kasu guba rutainina.
20 Kao ini baidibari ba
nawaravi ina botaratara,
ba muri yai Bada ana mara kaikapo sakina
ba kadakadarina ina botu.
21 Ba iyabosi wata Bada kana wabai
tebi yoereana wai sina yawasa.” ’ ”
22 Damanina ba Peter i sisiya mena i wona, “Israel biyimi, nikona ko nonori, God wai Iesu Nazareth biyina i debei kata kiyakiyaya, kituruba ba matakira ereonowana i wose wai ko kuiri.
23 Ba niko sebare kona God matapa naki i kuiri ba i damaninei wai pipiya kawa kasekasesi si baisimi wai komi ko kasibunui, ba korosi yai ko tuparatui.
24 Saba God rabobo ai ibo bimsiri meyei, ba rabobo ana sini nomosa kamonai i tombubauni, kairawina rabobo kega rubana ita botawani.
25 Ba David kona pipiyina i sisiyei,
‘A kuiri kata Bada wai mamanina naoku ai
ba kasaku ai e mamana,
kona kairavina kega ana nota kabakabai.
26 Kona kairavina nuwanuwaku wai
nuwagaire i bonuwa,
ba kawaku ai ana bokabakabari!
Ba tupuviku nuwanubai yebo ini yakam.
27 Basuna kega karawagai kuna tere bigaruiku,
kona kega am Baibaiyawasina Kaobaisiyena
kuna kita bigarui ina paga.
28 Ba yawasa ketana kui beyiku
ba kamoku ai ke mamana
wai nuwagaire e bibonuviku.’”
29 Damanina Peter i sisiya mena, “Warewaresiku, ere tepatoraku a wonewonimi kata tamata naki David i rabobo ba si dogui wai kana karawaga nade gubai karaku patana e mamana.
30 Ba saba kona wai peroveta, ba i kuiri kata God matapa ana kaobiyoyobana maragasina i terei, kata mara murinai wai nosinosina kesana, taupauma ana aba makimakirai ina terei ina makira.
31 Matapa awaika naonai i kinakinani wai Iesu ana bomsirina i bisisiyei, kata kona
‘Iesu wai kega karawagai si tere bigarui,
kona tupuvina si kita bigarui i paga.’
32 Ba God, Iesu rabobo ai ibo bimsiri meyei wai bisuwona ereonowata mata basutiyai ta kinani.
33 Ba kona i bokabari i gae God kasaunai e makimakira, kata Tamana i kaobaiyoyobani wai gwabinai Kanuma Kaobaisiyena i yauni, ba i utusewai kurita kata karaku ko kinakinani ba ko nonori.
34 Ba David kega tupuwai i gae ku sapama saba i wona,
‘Ba Bada i wona au Bada kurina,
“Nina kasuku ai ke makira,
35 yepo kam abiya ku kae gaburim ana terisi
am aba utukikita.” ’
36 Kona kairavina Israel biyisi ereonowasi sina kuira kabitamni kata niko Iesu ko tuparatui wai, God i wosei Bada, ba yebo Baibai yawasina Kaobaisiyena.”
37 Maranai pipiya nikona si nonori wai nuwanuwasi i yara saki, ba Peter ba apostle mutusi kurisi si wona, “Warewasikai, kata awaika kana wosei?”
38 Peter i kaobeyisi i wona, “Ereonowami kesakesasike wata Iesu Keriso kana wabai ami piragagoyosi yai koi nuwabirabira ba ko babataito, kata God ami piragagoyo ina notataveyisi. Ba kami puyo wai Kanuma Kaobaisiyenai kona yauni.
39 Niko kaobiyoyobana wai komi ba natunatumi kairavimi, ba iyabosi wata rabarabai te mamana wai ereonowasi, ata Bada God ina yorisi wai yebo yabata.”
40 Ba sisiya pesarisi yai i kaobitaraparanisi, ba i kao tutou kurisi, i wona, “Ko tombubauna meyimi, ba kega niko kimta asi goyona sarobina ku kamona kona riu.”
41 Ba Bada wonana iyabosi si geruwei wai si babataito kata kona kaonai pipiya 3,000 rubana asi ku koroto mena si riu.
Bigeruwana Biyisi asi Yawasa
42 Ba apostle asi ku bibeyebeyena mena si yapaiki ba sibi kesanisi, si bikambira ba si rupari yabata.
43 Ba ereonowasi wai bokuwaya ba nagara i bonuvisi, ba apostle kituruba ba kiyakiyaya ba matakira pesarisi si wose.
44 Ba bigeruwana biyisi ereonowasi mamanina, sibi kesanisi ba asi sawara ereonowana debai sibi kodei.
45 Asi sawara si bigimona, ba manesi iyabosi karisi yai kega wai si bereberisi.
46 Mara kau ereonowana God ana yove kamonai sibi kesanisi ba sibo pepeta, ba asi yove yai sibi kambira ba nuwasisirai ba nuwagaire yai si kam yabata.
47 God sibo kabakabari, ba pipiya asi gairena si kitai wai si kaobigegaenisi. Kao patepatena Bada iyabosi asi yawasa si berena wai bigeruwana biyisi asi koroto ibi rakasi.