9
Gumazim Godɨn guizɨn arazir bagha a mɨnabi
Devit ighiar kam osiri.
Gumazir onger akar kamɨn faragha zuim, a gumazamizibav kɨmtɨ, me Almut Labenɨn tiarimɨn gɨn mangɨ ighiar kam bangam.
1 O God, kɨ uan navir averiamɨn nɨ mɨnabaghasa.
Kɨ nɨ amir ingangarir aghuir kaba bagh gumazamizibav kɨmasa.
2 Kɨ nɨ gɨnɨghnɨgh nɨ bagh ongɨ
bar akuegham.
O Godɨn Bar Pɨn Itim, kɨ nɨ bagh ongɨ
egh ziar ekiam nɨ danɨngam.
3 Nan apaniba nɨn ganigha ara ghua,
nɨn damazimɨn daghiregha bar ariaghire.
4 Nɨ uan atrivir dabirabim gaperagha
guizɨn arazimɨn gumazamizibar araziba tuisɨsi.
Egha nan araziba guizɨn arazimɨn da tuisigha ghaze,
kɨ osɨmtɨziba puvatɨ.
5 Nɨ Kantrin Igharazibar Gumazamizibar araziba tuisigha gɨfa.
Gumazamizir kuraba, nɨ bar me gasɨghasigh men ziaba angarightɨ,
gumazamiziba me gɨnɨghnɨghan kogham.
6 Nɨ bar apanibagh asɨghasigha gɨfa,
eghtɨ me ikuvigh ikɨ mamaghɨra ikiam.
Men nguibar ekiaba sara, nɨ bar dagh asɨghasigha gɨfa,
eghtɨ gumazitam ua me gɨnɨghnɨghan kogham.
7 Ezɨ Ikiavɨra Itir God zurara uan atrivir dabirabim daperaghav ikɨ mamaghɨra ikiam.
A guizɨn arazimɨn gumazamizibar araziba tuisɨgham.
8 A uan guizɨn arazir kabar gɨn ghua gumazamizibar araziba tuisɨsi.
A uan arazir aghuimɨn gumazamizibagh ativagha men gari.
9 Ikiavɨra Itir God osɨmtɨziba itir gumazamiziba bagha
dɨpenir gavgavir mamɨn mɨn iti.
Eghtɨ apaniba osɨmtɨzibar anɨngamin dughiabar,
me an aven mangegh muegham.
10 O Ikiavɨra Itir God, gumazamizir nɨ bagha iziba,
nɨ akɨrim giragha me gasir puvatɨ.
Kamaghɨn gumazamizir nɨ gɨfoziba,
me nɨghnɨzir gavgavim nɨn iti.
11 Ikiavɨra Itir God, Saionɨn nguibamɨn ikia
uan atrivir dabirabim gaperaghav iti.
E a bagh ongɨva an ziam fam!
E Kantrin Igharazibar Gumazamizibar tongɨn ikɨ,
arazir an amizibar gun mɨkɨmɨva an ziam fam.
12 Ikiavɨra Itir God, gumazamizir mɨzaziba isiba, a me gɨnɨghnɨsi.
A me baragha uan kuarimning dukuir puvatɨ.
Gumazamizir arazir kurabar me gamiba,
a men arazir kuraba ikarvasi.
13 O Ikiavɨra Itir God, nɨ nan apangkufigh!
Apaniba na garɨzir osɨmtɨziba nɨ dar gan.
Kɨ bar ovengasava amir dughiabar,
nɨ nan akurvagha ua na isima kɨ deraghavɨra iti.
14 Kamaghɨn amizɨ, nɨ na gamizir biziba,
kɨ bar dagh eghan nɨn ziam fam.
Nɨ ua na inizir bizim bagh, kɨ Saionɨn nguibamɨn tiar akamɨn tughɨv ikɨ,
bar akuegh an gun mɨkɨmam.
15 Kantrin Igharazibar Gumazamiziba en suighasa, nguazimɨn toribagh tui.
Egha me uari dagh iraghue.
Me en suighasa azuaziba guizɨ,
azuaziba merara suiki.
16 Ikiavɨra Itir God, guizɨn arazimɨn gumazamiziba tuisɨzir dughiamɨn,
a uan arazir aghuim akakasi.
Gumazamizir kuraba, igharaz darazigh asɨghasɨghasa amir biziba
meraram asɨghasɨsi.
(Nɨ akar kam gɨnɨghnɨgh kuarimɨn aven bar aghumra ighiam damu.)
(Ighiam gamua an suiam
atugha avughsegha ua
ighiam gami.)
17 Gumazamizir kuraba ko Kantrin Igharazibar Gumazamizir akɨrim ragha God gasaraziba,
me bar moghɨra mangɨ Gumazamizir Oveaghuezibar Nguibamɨn ikiam.
18 Dughiabar zurara, God onganarazibagh amir gumazamizibagh nɨghnɨghavɨra iti.
Gumazamizir osɨmtɨziba itiba, me nɨghnɨzir gavgavim ikia kamaghɨn fo,
God men akurvagham.
A me ateghtɨ
me puram a mɨzuam ikian kogham.
19 O Ikiavɨra Itir God, nɨ dɨkavigh izɨ.
Nɨ nguazimɨn gumazamiziba ateghtɨ,
me gavgavigh nɨ gafiraghan markɨ.
Nɨ Kantrin Igharazibar Gumazamizibar amightɨ,
me nɨn kotɨn aven nɨn damazimɨn tuifigh.
Egh nɨ guizɨn arazimɨn men araziba tuisɨgh.
20 O Ikiavɨra Itir God, nɨ me damightɨ me bar atiatingigh.
Nɨ Kantrin Igharazibar Gumazamiziba kamaghɨn me damightɨ,
me bar fogh suam me gavgaviba puvatɨ,
me pura bizir kɨniba.
(Ighiam gamua an suiam
atugha avughsegha ua
ighiam gami.)