85
Gumazim God, an adarazigh eghuvasa a me bagha God ko mɨgei
Kar Koran anabam, men ighiam.
A gumazir onger akabar faragha zuim gɨnɨghnɨgha an osiri.
1 O Ikiavɨra Itir God, nɨ deragha uan nguazim gamigha,
Jekopɨn ovavir boriba ua men inizɨ me deragha,
faragha ikezɨ moghɨn iti.
2 Nɨ uan gumazamizibar arazir kurar me amiziba, nɨ da gɨn amada.
Nɨ men arazir kuraba batoghezɨ da ua itir puvatɨ.
(Ighiam gamua an suiam
atugha avughsegha ua
ighiam gami.)
3 Nɨ faragha men atara men anɨngazi.
Nɨ arazir kam, datɨrɨghɨn uam a gamir puvatɨ.
4 O God, nɨ en Akurvazir Gumazim.
E nɨn azangsɨsi, nɨ en ataran markɨ,
nɨ uam e inigh ua bagh izɨ.
5 Manmaghɨn ami, nɨ en atar kamaghɨra ikɨtɨ,
nɨn adarim gɨvaghan kogham o?
6 Nɨ ua ikɨrɨmɨrir e itir kam damightɨ a igiamɨn otogh,
gavgavim e danɨngtɨ e tuivigh gavgavigham.
Eghtɨ e nɨn gumazamiziba, nɨ bagh bar akuegh nɨn ziam fam.
7 O Ikiavɨra Itir God, nɨ zurara bar en apangkuvir arazir kam en akagh,
en akuragh uam e inightɨ e deragh ikiam.
8 Kɨ uan kuarim atɨgh Ikiavɨra Itir Godɨn Gavgavim Itim, an akam baragham.
E an gumazamiziba arazir kurar e amibar gɨn mangan kogh, uan navir averiabar aven a baghvɨra ikɨtɨ,
a mɨkɨmtɨ e navir amɨrizim ikiam.
9 Bar guizbangɨra, an akurvazim, an gumazamizir an ziam fava an atiatia an apengan itiba, bar men boroghɨra iti.
An angazangarim e gisiragha en akura,
a uabɨ e ko en nguazir kamɨn ikɨ mamaghɨra ikiam.
10 Dughiar kamɨn, gumazamiziba uarir apangkuvigh, guizɨn arazir aghuibar zurara uarir amuam.
Me Godɨn damazimɨn deragh ikɨ, navir amɨrizimɨn ikɨ, deragh uari ko dapiagh ikiam.
11 Gumazamiziba nguazimɨn ikɨ, bar guizbangɨra Ikiavɨra Itir Godɨn gɨn mangɨ
nɨghnɨzir gavgavim an ikɨvɨra ikiam,
eghtɨ Godɨn uan Nguibamɨn Itim me damightɨ me an damazimɨn zuegham.
12 Guizbangɨra, Ikiavɨra Itir God en akuragh bizir aghuiba isɨ e danɨngam.
Eghtɨ nguazir en azeniba itiba, dagher bar avɨriba dar aghungam.
13 Ikiavɨra Itir God, gumazamizibar amightɨ, me arazir an damazimɨn derazimɨn gɨn mangam.
Eghtɨ arazir kamra, God ua izamin tuavim atɨgham.