☰ Onger Akaba 34
34
God bar deragha Devit gamizɨ, an an ziam fe
Devit, Abimelek ko ikia ifarava onganizɨ moghɨn amima, Abimelek a batoke. Devit uamategha ghugha onger akar kam osiri.
1  +Kɨ zurara ziar ekiam Ikiavɨra Itir God danɨngam.
Kɨ an ziam fɨ mamaghɨra ikiam.
2 Ikiavɨra Itir God nan akurazir bizir kam bangɨn,
kɨ a mɨnabava a bagha bar akonge.
Gumazamizir osɨmtɨziba ateriba me bizir kam uaghan a baragh,
men naviba bar moghɨra deragham.
3  +E bar moghɨra an ziar ekiamɨn gun mɨkɨmɨva,
egh an ziam fam!
 
4  +Kɨ uabɨn akurvaghasa Ikiavɨra Itir Godɨn azangsɨzima, a nan azangsɨzim baraki.
A nan atiatiba bar da batoghezɨ, kɨ datɨrɨghɨn navir amɨrizimɨn iti.
5 Gumazamizir nɨghnɨzir gavgavim Ikiavɨra Itir Godɨn itiba,
me bar akongegh.
Men nɨghnɨzir gavgavir kam, a ikɨ gavgavightɨ
me aghumsɨghan kogham.
6  +Gumazamizir onganarazibagh amiba
Ikiavɨra Itir God ko mɨgeima,
a me baragha men osɨmtɨzibar aven deragha men akurvasi.
7  +Ikiavɨra Itir Godɨn ensel, gumazamizir an atiatia an apengan itiba, a me apaza men akurvasi.
Eghtɨ osɨmtɨziba me gasɨghasɨghan kogham.
 
8  +Ia kamaghɨn ganigh fogh suam,
Ikiavɨra Itir Godɨn araziba da bar moghɨra dera.
Gumazim God bagh mangɨ an aven modogh nɨghnɨzir gavgavim an ikɨ,
egh a deragh ikɨ bar akuegham.
9  +Ia Ikiavɨra Itir Godɨn gumazamiziba, ia an atiating an apengan ikɨ.
Gumazamizir an atiatia an apengan itiba me bizitamɨn otevezir puvatɨ.
10  +Dughiar mabar laionɨn nguziba dagheba puvatɨzɨ,
mɨtiriaba men azi.
Ezɨ gumazamizir nɨghnɨzir gavgavim Ikiavɨra Itir God ikia an apengan itiba,
me bizir aghuiba bagha asaghasazir puvatɨ.
 
11 Nan boriba, ia izɨ na baraghtɨ
kɨ ian sure damutɨ,
ia zurara Ikiavɨra Itir Godɨn atiating an apengan ikɨ.
12  +Nɨn dabirabim deraghasa nɨ ifongez, o?
Nɨ dughiar ruarimɨn ikɨ bar akongeghasa ifonge?
Are!
13  +Nɨ kamaghɨn ikɨsɨ, akar kurabav kɨman koghɨva
ifavarir akaba atakigh.
14  +Nɨ akɨrim ragh arazir kurabagh asaragh, egh arazir aghuibara damu.
Egh navir amɨrizimɨn gumazamizir igharaziba ko ikɨsɨ
gavgavigh mamaghɨra ikɨ.
 
15  +Ikiavɨra Itir Godɨn damazimɨn derazir gumazamiziba,
a deragha men gara, men arareba barasi.
16  +Ikiavɨra Itir God gumazamizir arazir kurabagh amiba,
a me batogha men aghua.
Kamaghɨn, me oveghtɨ
gumazamiziba ua me gɨnɨghnɨghan kogham.
 
17  +Ikiavɨra Itir Godɨn damazimɨn derazir gumazamiziba,
me Godɨn deima a me barasi.
A men akurvazima osɨmtɨziba me abɨrir puvatɨ.
18  +Gumazamizir naviba osɨa itiba,
Ikiavɨra Itir God bar men boroghɨra iti.
Egha gumazamizir osɨmtɨzir ekiar me abɨnasava amiba,
a men akurvasi.
 
19  +Osɨmtɨzir bar avɨriba gumazir aghuiba batifi.
Ezɨ Ikiavɨra Itir God men akurvazima
osɨmtɨzir kaba me abɨrir puvatɨ.
20  +Ikiavɨra Itir God guizbangɨra men akurazɨma,
men agharitam dɨpɨriaghirɨzir puvatɨ.
 
21 Gumazamizir kuraba, bizir kurar avɨriba me damutɨ, me arɨmɨghiram.
Godɨn damazimɨn derazir gumazamiziba,
God men apanibagh asɨghasɨgham.
22  +Ikiavɨra Itir Godɨn ingangarir gumazamiziba,
a ua me iniam.
Egh gumazamizir a bagha ghua an aven modiba,
a deragh men gantɨ,
me ovengan kogham.
+ 34:1 1 Samuel 21:13-15; Efesus 5:20; 1 Tesalonika 5:18; 2 Tesalonika 1:3; 2:13 + 34:3 Onger Akaba 69:30; Luk 1:46 + 34:4 Onger Akaba 18:6; Matyu 7:7; Luk 11:9 + 34:6 Onger Akaba 3:4; 34:17-19 + 34:7 2 Atriviba 6:17; Daniel 6:22; Sekaraia 9:8; Hibru 1:14 + 34:8 Onger Akaba 2:12; 1 Pita 2:3 + 34:9 Onger Akaba 31:23 + 34:10 Jop 4:10-11; Onger Akaba 84:11 + 34:12 1 Pita 3:10-12 + 34:13 1 Pita 2:22 + 34:14 Aisaia 1:16-17; Rom 12:18; Hibru 12:14 + 34:15 Jop 36:7; Onger Akaba 34:6; 34:17 + 34:16 Aghuzir Akaba 10:7; Jeremaia 44:11; Amos 9:4 + 34:17 Onger Akaba 34:6; 34:15; 34:19; 145:19-20 + 34:18 Onger Akaba 51:17; Aisaia 57:15; 66:2 + 34:19 Aghuzir Akaba 24:16; 2 Timoti 3:11-12 + 34:20 Jon 19:36 + 34:22 2 Samuel 4:9; 1 Atriviba 1:29; Onger Akaba 103:4
☰