Me nguaziba tuiragha Israelian anababagh anɨdi
13
(Sapta 13--22)
Ikiavɨra Itir God ghaze, Israelia nguazir igharazir me inizir puvatɨziba, uaghan da iniam
1 Ezɨ azenir avɨriba gɨvazɨma, Josua ikia ghua bar ghuri. Ezɨ dughiar mam Ikiavɨra Itir God kamaghɨn a mɨgei, “Nɨ bar ghuri, egh dughiar ruarimɨn ikian kogham. Ezɨ nguazir avɨriba ikiavɨra itima, nɨ tɨghar mɨsoghɨva ada iniam.
2-3 Nguazir kabanang: Filistian nguaziba bar, ko men nguibar ekiar 5plan kabanang, Gasa, Asdot, Askelon, Get, ko Ekron. Ia uaghan Gesurɨn nguaziba inizir puvatɨ. A Isipɨn nguazir mɨtaghniar aruem anadi naghɨn iti. Ia uaghan sautɨn amadaghan Avia, men nguaziba inizir puvatɨ. Ia uaghan, Sihorɨn Faner mɨriamɨn itir nguazim, a Isipɨn kantrin mɨtaghniamɨn iti, egha notɨn amadaghan ghua Ekronɨn nguibamɨn nguazim, ia a inizir puvatɨ.
4 Ia Kenanian nguaziba bar tɨghar ada iniam. Nguazir kam, a Saidonɨn nguazimɨn itir nguibam Mearan ikegha, ghua Afekɨn nguibamɨn oto, an Amorian nguazir mɨtaghniamɨn iti. Ia nguazir kaba tɨghar ada iniam.
5 Ia Gebalian nguazim ko, Lebanonɨn nguazir aruem anadi naghɨn itiba, ia bar da inizir puvatɨ. Nguazir kaba, Hermonɨn Mɨghsɨamɨn boroghɨn itir nguibam Balgatɨn ikegha ghua Hamatɨn Tuavir Akamɨn tu.
6 Ia uaghan, Saidonɨn gumazamizir Lebanonɨn Mɨghsɨabar ikia ghua Misrefot Maimɨn nguibamɨn itiba, ia men nguaziba inizir puvatɨ. Kɨ uabɨ Israelian faragh mangɨ men agɨraghtɨ me aregham, eghtɨ Israelia nguazir kaba inigh dar ikiam. Kɨ nɨ mɨkemezɨ moghɨra, nɨ nguazir kaba bar ada abigh, da isɨ Israelia danightɨ me dar ikɨ.
7 Egh nɨ datɨrɨghɨn nguazir kam tuiragh a isɨ, Israelian 9plan anababa ko Manasen anabar me tuirazimningɨn igharazim, bar me danɨngigh.”
Ruben, Gat, ko Manase, men nguaziba
8 Ikiavɨra Itir Godɨn ingangarir gumazim Moses, a fomɨra Rubenɨn anabamɨn adarasi, ko Gatɨn anabamɨn adarasi, ko Manasen anabar me tuirazimningɨn faragha zuimɨn adarasi, nguazir maba me ganigha gɨfa. Men nguaziba aruem anadi naghɨn Jordanɨn Fanemɨn vongɨn iti.
9 Ezɨ men nguazim, an Arnonɨn Fanemɨn danganir zarimɨn tongɨn itir nguibamɨn ikegha notɨn zui. Ezɨ uaghan Arnonɨn Fanemɨn notɨn mɨriamɨn itir nguibam Aroer, a uaghan men nguazim. Egha men nguazim ghua mɨghsɨar orazimɨn danganir bar zarir ekiam itir nguaziba inigha ghua Medeban nguibamɨn otogha ghua Dibonɨn nguibamɨn tu.
10 Egha uaghan Amorian Atrivim Sihon, an nguibar ekiaba bar ada ini. Sihon fomɨra uabɨ Hesbonɨn nguibar ekiamɨn ikia, egha nguibar ekiar kabagh ativagha dar gara ghua, Amonian nguazim ko mɨtaghniam atɨ.
11 Egha me uaghan Gileatɨn nguazim isava, Gesur ko Makatɨn Distrik sara inigha, uaghan Hermonɨn mɨghsɨam sara, bar ada ini. Egha Basanɨn Distrighɨn danganiba bar ada inigha, ghua Salekan nguibamɨn tu.
12 Egha me, nguazir Atrivim Ok ativaziba, bar ada ini. A Refaimbar gumazir mam, me gumazir ekiar bar ruariba, egha me avɨrasemezir puvatɨ. Ok, a men gumazir abuananam. A fomɨra, Astarot ko Edrein nguibamningɨn iti. Ezɨ Moses gumazir kaba ko mɨsogha me abɨragha bar me batoke.
13 Egha Israelia, Gesur ko Makatɨn nguibamningɨn adarasi, me batoghezir puvatɨ. Ezɨ merara ikia datɨrɨghɨn Israelian tongɨn ikiavɨra ikia kati.
14 Ezɨ fomɨra Ikiavɨra Itir God, Israelian God Moses mɨgɨa ghaze, asɨzir gumaziba inigha iza Ikiavɨra Itir Godɨn ofa damuasa avimɨn tueba, kar Livain anabamɨn adarazi damuamin ingangarim. Kɨ bizir aghuimɨn mɨn a isa me ganɨngizɨ, me a ini. Eghtɨ ingangarir kam me ko ikɨ kamaghɨra ikiam. Kamaghɨn, Moses nguazitam isava Livain adarazigh anɨngizir puvatɨ.
15 Egha Moses nguazir akuar maba isa vaghvagha Rubenɨn anabamɨn ikɨzibagh anɨngizɨ, me dagh apiagha dagh amua iti.
16 Ezɨ men nguazim, an Arnonɨn Fanemɨn danganir zarimɨn tongɨn itir nguibamɨn ikegha notɨn zui. Ezɨ uaghan Arnonɨn Fanemɨn notɨn mɨriamɨn itir nguibam Aroer, a uaghan men nguazim. Egha men nguazim ghua mɨghsɨar orazimɨn danganir bar zarir ekiam itir nguaziba inigha ghua Medeban nguibamɨn oto.
17 Egha bar ghua Hesbonɨn nguibar ekiamɨn otogha ghua, mɨghsɨar orazimɨn danganir bar zarir ekiam itir nguaziba, dar aven itir nguibar kaba sara ini. Dar ziabar kara: Dibon, Bamotbal, Bet Balmeon,
18 ko Jahas, Kedemot, Mefat,
19 ko Kiriataim, Sipma, Seretsahar, a danganir zarir kamɨn itir mɨghsɨar muziarim gisɨn iti.
20 Egha Betpeor, ko nguibar Pisgan mɨghsɨamɨn mɨriabar itiba, ko Bet Jesimot.
21 Nguibar kaba da, mɨghsɨar orazimɨn danganir bar zarir ekiam itir nguaziba, dar aven itir nguibaba bar moghɨra. Kar Amorian Atrivim Sihon uabɨ Hesbonɨn nguibar ekiamɨn ikia, egha nguibar ekiar kabagh ativagha dar gari. Moses a ko mɨsogha anebɨragha uaghan Midianian gumazir dapanir kabav sogha me abɨra. Men ziabar kara: Evi, Rekem, Sur, Hur, ko Reba. Me faragha bar moghɨra nguazir kamɨn apiagha itima, Atrivim Sihon ingangarim me ganɨngizɨ me itir danganibar gari.
22 Egha Beorɨn otarim Balam, a gɨn otivamin bizibar gun mɨgeir gumazim, Israelia uaghan a mɨsoghezɨ an areme.
23 Ezɨ Jordanɨn Fanem, a Rubenɨn anabamɨn adarazir nguazir mɨtaghniam. Nguibar ekiar kaba ko dar nguibar doziba, Rubenɨn anabamɨn ikɨziba vaghvagha uari baghavɨra da ini.
24 Ezɨ Moses uaghan nguazir kabar maba tuiragha vaghvagha Gatɨn anabamɨn ikɨzibagh anɨngizɨ, me vaghvagha dagh apiaghav iti.
25 Dar ziabar kara: Jaserɨn nguazim, ko Gileatɨn Distrighɨn itir nguibar ekiaba, ko Amonian nguazimɨn akuar mam, a ghua Aroerɨn nguibar ekiamɨn tu. Aroer, a Raban nguibar ekiamɨn boroghɨn aruem anadi naghɨn iti.
26 Egha men nguazim, Hesbonɨn nguibar ekiamɨn ikegha ghua, Ramatmispen nguibar ekiam ko Betonimɨn nguibamɨn otogha ghua, Mahanaimɨn nguibar ekiamɨn otogha, ghua Lodebarɨn nguazir mɨtaghniamɨn tu.
27 Ezɨ Gatɨn anabamɨn adarasi, Jordanɨn Fanemɨn danganir zarimɨn itir nguibar kaba ini. Dar ziabar kara: Betharamɨn nguibam, ko Betnimran nguibam, Sukotɨn nguibam, ko Safonɨn nguibam, ko Atrivim Sihonɨn nguazir otevir mam, a Hesbonɨn nguibar ekiamɨn atrivim, a faragha an gari. Egha Gatɨn anabamɨn adarasi, nguazir Jordanɨn Faner mɨriamɨn itim inigha ghua aruem anadi naghɨn otogha, bar ghua notɨn amadaghan Galilin Dɨpar Akaremɨn tu.
28 Nguibar ekiar kaba ko dar nguibar doziba, Gatɨn anabamɨn ikɨzibar adarazi uari baghavɨra da inigha dagh apiaghav iti.
29 Egha Moses nguazir otevir mam isa Manasen anabar me tuirazimningɨn mav ganɨngizɨ, me vaghvagha uari bagha a inigha a gapia.
30 Ezɨ men nguazim Mahanaimɨn nguibar ekiamɨn ikegha, ghua Basanɨn Distrighɨn danganiba bar ada ini. Atrivim Ok, a fomɨra Basan gativagha an gari. Me uaghan 60 plan nguibar ekiar Jair gariba, da Basanɨn distrighɨn iti, me bar da ini.
31 Men nguazir kam, a Gileatɨn Distrighɨn akuam inigha, Astarot ko Edrein nguibamning ini, Atrivim Ok, fomɨra ativagha ganizir nguibamning. Egha Moses nguazir kam isava Manasen otarim, Makirɨn ovavir boribar ikɨzibar adarazi vaghvagha me ganɨngi.
32 Kamaghɨra, Moses Moapɨn danganir zarimɨn ikia Jerikon nguibamɨn aruem anadi naghɨn amadaghan Jordanɨn Fanemɨn vongɨn nguazir kaba, a bar da tuiragha da isa Israelia ganɨngi.
33 Egha Moses nguazir taba isava Livain anabamɨn adarazigh anɨngizir puvatɨ. A kamaghɨn me mɨgei, “Ikiavɨra Itir God, Israelian God, a mati bizir aghuir ia inizimɨn mɨn iti, kamaghɨn ia nguazitam inian kogham.”