64
1 O Ikiavɨra Itir God, nɨ overiam abigh kagh izighirɨ!
Nɨ kamaghɨn damutɨ, mɨghsɨaba nɨn damazimɨn atiating bar puvɨram akongam.
2 Nɨ gumazim dazir suzibar avim atɨzɨ, dɨpam isiaghtui moghɨn,
nɨ uan ziar ekiam isɨ uan apanibar akagham.
Eghtɨ Kantrin Igharazibar Gumazamiziba nɨn damazimɨn atiating
bar puvɨram akongam.
3 Nɨ fomɨra izaghira bizir igharagha garir e ganizir puvatɨzibagh amizɨ da otivima,
e dar gara dɨgavir kuram gami.
Nɨ izaghirir dughiar kamɨn,
nɨ mɨghsɨabagh amizɨ
da nɨn damazimɨn bar puvɨram agoi.
4 Bar fomɨra iza datɨrɨghɨn, gumazitam uan damazimɨn gara uan kuarim atɨgha orazi,
godɨn nɨn mɨn iti tam, ua itir pu.
Bar puvatɨ.
Nɨ uabɨra, gumazamizir nɨghnɨzir gavgavim nɨn ikia nɨ mɨzuaiba,
nɨ me bagha pamtem ingara men akura.
5 Gumazir arazir aghuibara damuasa ifuegha nɨn tuavim gɨnɨghnɨgha an gɨn zuiba,
nɨrara me bativa me gifonge.
E fo, nɨ faragha en ataravɨra itima,
e tong uan arazir kuraba ataghɨrazir puvatɨ.
E dughiar bar ruarimɨn arazir kurabar amuasa bar gavgavighavɨra iti.
Ezɨ markɨ, nɨ uan gavgavir ekiam sara izɨ uam e inigh.
6 E nɨn damazimɨn arazir kurabagh amigha, bar mɨze.
E amir arazir kaba e ghaze, da ti derazɨ e dagh ami,
arazir kaba nɨn damazimɨn bar ikuvigha, mati inir avɨzir bar pughpurizim.
En arazir kurar kabara e gamima,
e amɨnim ter afarir mɨdiaribagh ivarazɨ da ghuezɨ moghɨn,
e bar mɨsigha atam ariaghire.
7 Gumazitam nɨn ziam dɨbora nɨ ko mɨgeir puvatɨgha,
akurvazim bagha nɨn boroghɨn zuir puvatɨ.
E ghaze, en arazir kuraba bangɨn,
nɨ bar uan guam en modogha e ataghizɨ,
en arazir kuraba e gasɨghasɨghizɨ, e bar ikuvigha iti.
8 O Ikiavɨra Itir God, nɨ en Afeziam, nɨ mati mɨnebar ingarir gumazim.
Ezɨ e mati, gumazim nguazim isa uan dafarimningɨn nguazir mɨnebar ingari.
Ezɨ nɨ uan dafarimningɨn en ingari.
9 O Ikiavɨra Itir God, nɨ zuraram en arazir kurar e amibagh nɨghnɨgh
puv en anɨngaghan markɨ.
Nɨ kamaghɨn nɨghnɨgh, e bar nɨn gumazamiziba,
nɨ tong en apangkufigh.
10 Nɨn nguibar ekiaba, danganir kɨnibar mɨn iti,
ezɨ Saion, a gumazamiziba puvatɨzir danganimɨn mɨn oto.
Guizbangɨra, Jerusalem bar moghɨra ikuvizɨ,
gumazitam an itir puvatɨ.
11 Ezɨ nɨn Dɨpenir e an mangɨ nɨn ziam famim,
a uaghan avim an isizɨ, a bar moghɨra ikufi.
Fomɨra Dɨpenir kam bar dɨpenir dirim,
ezɨ en inazir afeziaba an ghua nɨn ziam fe.
Egha datɨrɨghɨn a ikuvizɨ,
bizir aghuir e ifongeziba, da uaghan bar ikuvigha iti.
12 O Ikiavɨra Itir God, nɨ bizir kabar gara,
en akuragh bizitam damuasa nɨn navim nɨ dɨkafi, o puvatɨ?
Nɨ ti kamaghsua,
e osɨmtɨzir avɨriba ater mangɨvɨra ikiam, o?
Nɨ en mɨgɨrɨgɨaba baragha da ikarvaghan aghua, o?
E ghaze, nɨ ti en akuragham.