59
Israelia arazir kuramɨn gɨn mangasa bar gavgafi
1 Ia oragh! Ia kamaghɨn nɨghnɨghan markɨ,
Ikiavɨra Itir God ian akurvaghamin gavgaviba puvatɨ.
Egh ia kamaghɨn nɨghnighan kogham,
an kuariba pɨrizɨ, e an deir dɨmdiaba, an ada barazir puvatɨ.
2 Ian arazir kurabaram amima,
God uan guam ian modogha, ian dɨmdiaba barazir puvatɨ.
Ian arazir kuraba mati, davarir konim ia ko ian God abɨghizɨ,
ia an saghon iti.
3 Egha ian dafariba gumaziba mɨsozi me ariaghɨrima,
men ghuziba ian dafaribar pueghavɨra iti.
Ian dafariba arazir kurabagh ami.
Ian akaba, akar ifavarir guar avɨribagh ami.
Akar kurabar ian mɨzebar otivaghiri.
4 Ia deravɨra kotiabagh amir pu. Puvatɨ.
Ia akar ifavaribagh amua, pura gumazir igharazibagh ekua kotiam bagha zui.
Egha ia mɨgɨrɨgɨar ifavarir guar avɨribagh ami,
eghtɨ me iararam oragh igharaz darazi dɨkabɨnam.
Ian nɨghnɨziba ko naviba, arazir kurabar amuamin araziba dagh gizɨfa,
ezɨ ia arazir kurar guar avɨribagh amima da otifi.
5-6 Ian nɨghnɨzir kuraba, mati kuruzir divimɨn aroriaba.
Eghtɨ gumazitam kuruzir divimɨn aroriaba abigh dar amegh, an aremegham.
Eghtɨ aroriar kabar aven kuruzir nguziba otivigham.
Kamaghɨra, ian nɨghnɨzir kuraba osɨmtɨzir guar avɨribagh ami da otiva,
gumazir igharazibar ikɨrmɨribagh asɨghasɨsi.
E garima, boghoboriba uan dɨpenibar ingari, eghtɨ apizir muziariba mɨghɨ izɨ dar poghtɨ, me dar amam.
E fo, gumazitaba boghoboribar dɨpeniba inigh, dar inibar ingarigh, korotiabar mɨn dar aghuan kogham.
Ia boghoboribar mɨn ikia igharaz darazigh ifarasa men suigha, paza me gamua men ikɨrmɨribagh asɨghasɨsi.
Guizbangɨra, ian ingangarir kurar ia amiba, da ian modoghan kogham.
Puvatɨ. Ian arazir kuraba azenim giram.
7 Ia zuraram arazir kuram damuasa bar ifonge.
Egha ia zurara atamra ghua gumazamizir arazir kurabagh amir puvatɨzibav sozi, me ariaghiri.
Ia bizir kurabara damuasa nɨghnɨsi.
Egha ia gumazamizibar ikɨrɨmɨrim gasɨghasɨghasava arua bizibagh ami.
8 Ia navir amɨrizimɨn tuavim gɨfozir puvatɨgha igharaz darazi ko deragha apiaghiri puvatɨ.
Ian ikɨrɨmɨrim, guizɨn arazim an itir puvatɨ,
ia mati tuavir ikɨzɨrɨzimɨn zui.
Ian araziba bar derazir puvatɨ,
eghtɨ gumazitam ian gɨn tuavir ia zuimɨn mangɨ,
navir amɨrizim ko dabirabir aghuim batoghan kogham.
Gumazamiziba uan arazir kuraba aghuri
9 Ezɨ gumazamiziba kamaghɨn mɨgei:
“O God, e datɨrɨghɨn fo, e arazir kurar kam gami,
ezɨ bizir kam bagha nɨ uan guizɨn arazim en akazir puvatɨ.
Ezɨ nɨn arazir aghuim, e batozir puvatɨ.
E mati, gumazamiziba mɨtarmemɨn iti moghɨn iti.
Egha e dughiar aghuim e bativasa, e bar ifuegha a mɨzua iti,
mati aruemɨn angazangarim anang e gisiragham.
Ezɨ puvatɨ.
E mɨtarmer dafamɨn tongɨn arua, egha osɨmtɨzir igharagha garir avɨriba batifi.
10 Osɨmtɨzir kaba e gamima, e mati gumazir damazir okavɨrɨzibar mɨn tuavim buriagh arui.
Egha pura arua ghua dɨpenir bɨrimɨn suighasava amuav avenge.
Egha e aruer arɨzimɨn arua
mati gumazamiziba mɨtarmemɨn arua, uan sueba isa dagɨabagh asa daghiri.
E ghaze, e ti bar gavgavigha deravɨra iti, puvatɨ.
E gumazamiziba ariaghirezɨ moghɨn iti.
11 Osɨmtɨzir kaba e gamima, e bar osemegha arai, mati afiar atiaba aroi.
E dughiabar aghumra ikia aziavɨra iti, mati kuarazir bunbaba aghumram arai.
E Godɨn guizɨn arazim bagha mɨzua iti. Bar puvatɨ.
E Godɨn akurvazim bagh an gara iti. Ezɨ a bar en saghon iti.
12 “O Ikiavɨra Itir God, en arazir kuraba nɨn damazimɨn bar avɨraseme.
Egha da e isa kot gatɨ.
Ezɨ akaba batozir arazimɨn osɨmtɨzim, en poroghavɨra iti.
Ezɨ e uari uan arazir kurar e amibagh fo.
13 Ikiavɨra Itir God, en God, e arazir kuramɨn nɨ gamigha, akɨrim ragha nɨ gasaragha nɨ barazir puvatɨ.
E igharaz darazi dɨkabɨragha, akaba barazir puvatɨzir arazir guar avɨribagh ami.
E igharaz darazigh ifarasa tuavir bar avɨribagh nɨghnigha,
dar gun mɨgei.
14 E arazir kabagh amima, en arazir kam guizɨn nɨn arazim ko arazir aghuim gamima,
aning en saghon iti,
kamaghɨn amizɨ, nɨ en akuragha, uam e inizir puvatɨ.
E arazir zuruzim ko guizɨn mɨgeir arazim ataghizɨ, aning en itir puvatɨ.
Egha e uari akuvir dughiabar, arazir kamning uaghan itir puvatɨ.
15a Guizɨn arazitam en itir puvatɨ.
Eghtɨ gumazitam uan arazir kuraba ateghtɨ,
igharaz darazi pazav a damusɨ tuaviba buriam.”
Ikiavɨra Itir God uan gumazamizibar amutɨ me deravɨra ikiam
15b Ikiavɨra Itir God garima, gumazamiziba guizɨn arazim gamir puvatɨ,
ezɨ a navir aghuim men itir puvatɨ.
16 A garima, gumazamiziba paza gumazir igharazibagh amima, men akuraghamin gumazitam itir puvatɨ.
Ezɨ a kamaghɨn ganigha dɨgavir kuram gami.
Egha uabɨ uan gavgavim ko uan arazir aghuimɨn, a ua me inigha,
me gamizɨ me deravɨra iti.
17 An arazir aghuir a zuraram amiba, evarimɨn pɨzir korotiamɨn mɨn aneru.
Egha a gumazamizibar akurvaghamin gavgavim gɨnɨghnɨgha, an nɨghnɨzir kam mati a dapanir asuar gavgavimɨn mɨn aneruzɨ, an an dapanim ave.
Egha gumazir kuraba ivezir kuram me ikarvaghamin gavgavim, uan mɨdorozir korotiamɨn mɨn aneru.
Egha uan anɨngagharir ekiam, korotiar ruarimɨn mɨn aneru.
18 Egh Ikiavɨra Itir Godɨn anɨngagharimɨn, a uan apanibar arazir kuraba ikarvagh,
puv me damigham.
Egh a uaghan gumazamizir kantrin roghɨra itiba ko, saghon itir arighatɨzibar gumazamiziba,
puvɨra me damu ivezir kuram me danɨngam.
19 Ikiavɨra Itir God puv ingara,
mati amɨnim iza dɨpam giverazɨ, dɨpam bar puvɨra ivemari moghɨn,
Ikiavɨra Itir God izam.
Eghtɨ nguazir kamɨn ruaghateviba bar dar itir gumazamiziba, aruem anadi naghɨn tugha ghua aruem uaghiri naghɨn,
me Ikiavɨra Itir Godɨn ziar ekiam ko gavgavim gɨfogh,
an ziamɨn atiating an apengan ikiam.
20 Ikiavɨra Itir God kamaghɨn mɨgei,
“Kɨ men Akurvazir Gumazimɨn mɨn Saionɨn izam.
Kɨ Jekopɨn ovavir borir uan arazir kuraba ataghiziba, kɨ ua bar me iniam.”
21 Egha Ikiavɨra Itir God kamaghɨn mɨgei,
“Kɨ me ko Akar Dɨkɨrɨzir Gavgavim gamigha kamaghɨn mɨgei,
‘Kɨ uan Duam ko uan Akaba ia ganɨngizɨ, da ia ko iti.
Akar kaba, ia ko ikɨvɨra ikɨtɨ,
ia dar gun mɨkɨmam.
Eghtɨ gɨn ian boriba ko ian ovavir boriba, me uaghan zurara nan akam akunam.
Nan Akar Dɨkɨrɨzir Gavgavir kam zurara ikɨ mamaghɨra ikiam.’
Kɨ Ikiavɨra Itir God, kar nan akamra!”