41
Ikiavɨra Itir God ghaze, a Israelian akuragh ua me iniam
1 God kamaghɨn mɨgei:
Ia kantrin roghɨra itimɨn gumazamiziba ko, saghon itir arighatɨzibar gumazamiziba,
ia uan akaba dukumigh nan akam baragh.
Ia bar deravɨra nɨghnigh kotɨn izɨ uan akaba tuisɨghamin dughiamɨn dav kɨm.
E uari akuvagh akaba tuisɨgh dar gan egh fogh suam, tinan akam a guizbangɨra.
2 Tinara aruem anadi naghɨn atrivim garugha a fezɨ,
a kantriba ko mɨsogha ghua egha bar moghɨra me abɨni.
Godra kantriba an agharim gatɨgha, a gamima,
an atrivir igharaziba abɨri.
An mɨdorozir sabam ko pim bar me agefi,
ezɨ me mati nguazir mɨneziba ko raizɨn afezibar mɨn otozɨ, amɨnim me gɨva zui.
3 A zuamɨra me bativa, me gasɨghasɨgha me gitavɨragha zui,
ezɨ me bizitamɨn a damuan ibura,
mati amɨnim uabɨ a inigha zuima, a tong nguazim dɨkarazir puvatɨ.
4 Tinara bizir kabagh amizɨ da otifi?
Kɨ Ikiavɨra Itir Godra, kɨ dagh ami.
Kɨ nguazim gamizɨ an otozir dughiamɨn,
kɨ zurara bizibagh amima, da nan ifongiamɨn nguazir kamɨn otifi.
Kɨ Ikiavɨra Itir God, kɨ bar faraghavɨra iti.
Egh kɨ ikɨvɨra ikɨ mangɨ bar gɨn dughiar abuananamɨn, uaghan ikiam.
5 Saghuiamɨn itir arighatɨziba bar men gumazamiziba, ko nguazimɨn oteviba bar dar itir gumazamiziba,
me kɨ amizɨ bizibar ganigha, puv atiatia nɨsi.
Egha me iza uari akuvagha,
6 me uan naviba gavgavim dar anɨngasa, uarira uariv gei.
7 Egha me asebar marvir guabar ingari.
Gumazir dɨgɨribagh amiba, golɨn bizibar ingarir gumazibav gɨa ghaze,
Ia ingangarir bar aghuimram ami.
Ezɨ golɨn mɨsogha anekɨri gumaziba, kamaghɨn ainɨn bizibar ingarir gumazibav gei,
Aia, ia bar deravɨram ada isavsuiki.
Egha me gɨn da iran atiatigha,
dɨkonibar dagh afughafuki.
8 Ezɨ ia Israelia, ia Jekopɨn anabamɨn adarasi, kɨ ia amɨsevezɨ,
ia nan ingangarir gumazamizibar iti.
Ia nan roroam Abrahamɨn ovavir boriba.
9 Kɨ nguazir kamɨn ruaghatevimɨn itir nguibar bar saghon itimɨn ia inigha ize.
Egha kɨ kamaghɨn ia mɨkeme, ia nan ingangarir gumazamizibar ikɨ.
Kɨ ua bagha ia ginaba,
egha kɨ ian aghuagha akɨrim ragha ia gasarazir puvatɨ.
10 Kɨ ian God, egha kɨ ia ko iti,
kamaghɨn amizɨ, ia atiatingan markɨ.
Kɨ ia damutɨ ia gavgavightɨ,
kɨ ian akuragham.
Kɨ bar deravɨra ian ganɨva,
uan gavgavir ekiamɨn ian apaniba abɨnam.
11 Ia gan! Ian anɨngagha ia isa kot bagha zui darasi,
me ia dɨkabɨnan iburagh bar aghumsigham.
Gumazir ia mɨsoghasa amiba,
me pura bizir kɨnimɨn mɨn otogh bar gɨvagham.
12 Ia mɨsogha ia gasɨghasɨghava amir gumazir kaba,
ia me buri men apighan kogham.
Me pura nguazir kam ategh bar puvarigham.
13 Kɨ Ikiavɨra Itir God, ian God, kɨ ian boroghɨra ikia,
gavgavim isa ian agharir guvim ganɨga kamaghɨn ia mɨgɨa ghaze,
Ia atiatingan markɨ.
Kɨrara, kɨ ian akurvagham.
14 Ikiavɨra Itir God ghaze:
“O Israelia, ia avɨrasemezir puvatɨgha gavgaviba puvatɨ.
Kɨ ian akurvagham.
Kɨ Israelian Godɨn Bar Zuezim,
ian Akurvazir Gumazim.
15 Ia gan! Kɨ ia damightɨ, ia wit dɨkava a mɨrmɨri ter ararir bar dafar me ainɨn dɨkonibar afughafughizimɨn mɨn otogham.
Kar ter ararir igiam, ezɨ an dɨkonibar atariba bar ghumi.
Egh bizir ian tuaviba apɨra osɨmtɨziba ia ganɨdiba, ia da dɨkabɨnigham.
Mati ia mɨghsɨaba abɨagharɨzi da uaghira nguazir mɨnemniamɨn otifi.
16 Ia osɨmtɨzir kaba isɨ pɨn da akunam,
mati gumazim nguazir mɨnezim ruegha pɨn anekunizɨ, amɨnim a givaragha ghu.
Egh ia Ikiavɨra Itir God bagh bar akuegham.
Egh ia Israelian Godɨn Bar Zuezimɨn ziam fam.
17 “Gumazamizir onganarazibagh amiba dɨpaba puvatɨgha,
men kuariba bar men pɨrizɨ, me dɨpaba buri.
Me nan deima, kɨ Ikiavɨra Itir God, kɨ men mɨgɨrɨgɨaba barasi.
Kɨ Israelian God, kɨ me gɨnamadaghan kogham.
18 Kɨ fanebar amutɨ, dɨpaba mɨghsɨar temeba aghuir puvatɨzibar otiv afor dar izighiram.
Egh kɨ dɨpar emɨmɨribar amutɨ, da danganir zaribar otiv monmoniba anangam.
Egh kɨ dɨpar akarebar amutɨ, da danganir dakɨrtɨzibar otivam.
Egh kɨ dɨpaba puvatɨzir daghuribar amutɨ, dɨpaba dar otiv dagh izɨvam.
19 Egh kɨ sidan temeba ko, pain ko, oliv ko, saipres ko, temer guar igharagha garibar amightɨ,
da dɨpaba puvatɨzir danganimɨn otivigh aghungam.
20 Kɨ kamaghsua, gumazamiziba ganigh fogh suam,
kɨ Ikiavɨra Itir God, Israelian Godɨn Bar Zuezim, kɨ uan gavgavir ekiamɨn bizir kabagh ami.
Kɨ bizir kaba bar dar ingarizɨ, da otifi.”
Aseba da guizɨn godba puvatɨ
21 Ikiavɨra Itir God, a Jekopɨn anabamɨn atrivim, a kamaghɨn mɨgɨa ghaze,
“Ia kantrin igharazibar aseba, ia uan akar otevir ia mɨkɨmamiba deragh da akɨrigh, uan akaba gavgavim dar anɨngsɨ kotɨn izɨtɨ,
kot deragh ian mɨgɨrɨgɨaba tuisɨgh da baragham.
22 “Ia faragha, bizir gɨn otivamibar gun mɨkeme.
Egh datɨrɨghɨn akar kaba kot geghan, egh bizir kabar mɨngariba abɨgh e mɨkɨmtɨ,
e deraghvɨra da tuisɨgh dagh fofogh suam, da guizbangɨra otoz, ti puvatɨ.
Egh ia gɨn otivamin bizibar gun mɨkɨm.
23 Egh ia gɨn izamin arazibar gun e mɨkɨm, eghtɨ bizir kaba otivamin dughiamɨn,
e kamaghɨn fogh suam, ia guizɨn godba, o puvatɨ.
Ia bizir aghuitam, o bizir kuratam damutɨ,
e ian gavgaviba deraghvɨra dar ganam.
24 E fo, ia pura bizir kɨniba, kamaghɨn amizɨ, ia bizitam damighan kogham.
Ezɨ gumazamizir ian ziaba feba, me uaghan bizir kurabar mɨn otivizɨ,
kɨ bar men aghua.
25 “Kɨ aruem anadi naghɨn itir gumazir mam amɨsefe.
Gumazir kam ziar ekiam na ganɨdi.
Ezɨ kɨ datɨrɨghɨn notɨn amadaghan a inigha izi.
Ezɨ a mati, gumazir nguazir mɨnebar ingarim, a mɨnemɨn ingarasa nguazim dɨkabɨri moghɨn,
an atriviba dɨkabɨra me abɨri.
26 Ia kantrin igharazibar aseba,
ian tongɨn tina ghaze, bizir kaba otivam? Puvatɨ.
Ian tongɨn tinara mɨgɨrɨgɨar tam damightɨ,
e kamaghɨn mɨkɨmam, a guizbangɨra mɨgei.
Ian tav kamaghɨn mɨkemezir puvatɨ, bizir kaba otivam.
Guizbangɨra, gumazitam ian tav barazima, a mɨgɨrɨgɨatam gamizir puvatɨ.
27 Kɨ uabɨ faraghavɨra, bizir kaba otivasa kɨ dar gun Saion mɨkeme.
Ezɨ datɨrɨghɨn ia garima, ada otivigha gɨfa.
Kɨ datɨrɨghɨn Jerusalemɨn akar aghuim akunasa abuir gumazir mam amadagha gɨfa.
28 “Kɨ aser kabar garir dughiamɨn, me mɨgɨrɨgɨatam gamizir puvatɨ.
Egh me nɨghnɨzir aghuitam damuan kogham.
Egh men tav nan azangsɨziba ikaraghan kogham.
29 Ia gan! Aser kaba da pura bizir kɨniba.
Dar nedaziba mati amɨnim pura ivai.
Da bizitam damuamin gavgaviba puvatɨ.”