Ekiam, Jerusalemɨn gumazamizibar araziba akɨrmɨgham
28
(Sapta 28--35)
Ekiam Samarian nguibar ekiar bar aghuim gasɨghasɨgham
1 O Efraimɨn anabamɨn adarasi, iavzika!
Ian nguibar ekiar bar aghuim Samaria bar ikuvigham.
Ian gumazir aruaba wain apava onganigha,
Samarian ziam bar puvɨram a fa kamaghɨn mɨgɨa ghaze,
a nguibar ekiar bar gavgavim.
A mɨghsɨar bar muziarim gisɨn iti, a nguazir bar aghuir dagheba oparamimɨn tongɨn iti,
egha a bar deragha gari,
mati ian gumazir aruaba uan dapanibagh arɨzir akɨmaribar mɨn,
bar dera.
Egh ian nguibar ekiam dughiar ruarimɨn ikeghan kogh,
mati akɨmarim mɨsigha ikuvizɨ moghɨn, ikuvigham.
2 Bar guizbangɨra, Ekiam ia dɨkabɨnasa
ikɨzir bar gavgavir mam amɨsevegha gɨfa.
Eghtɨ me amɨnir gavgavimɨn mɨn izɨva,
amozim ko aisɨn amozimɨn mɨn bar pamtemɨn ia girɨva,
ia amɨsararɨgh, ia fɨ nguazim mɨkɨnigham.
3 Egh me ia dɨkabɨn ia gisɨn daruam,
ia Efraimɨn anabamɨn adarasi, ian gumazir aruaba wainɨn dɨpaba apava onganigha,
ian nguibamɨn ziam bar pɨn mar a fe.
4 A mɨghsɨar bar muziarim gisɨn iti,
a nguazir bar aghuir dagheba oparamimɨn tongɨn iti,
mati ian gumazir aruaba uan dapanibagh arɨzir akɨmaribar mɨn
bar dera.
Egh ian nguibar ekiar kam dughiar ruarimɨn ikeghan kogham,
mati akɨmarim mɨsigha ikuvizɨ moghɨn, ikuvigham.
Egh a zuamɨra gɨvagham,
mati temer fighɨn mamɨn ovɨzim, mabagh afiragha faragha anizɨ,
gumazir mam zuamɨra a inigha aneme.
5 Eghtɨ dughiar kamɨn, gumazamizir ikiavɨra itir vabara,
me Ikiavɨra Itir Godɨn Gavgaviba Bar Itim bagh bar akuegham.
A uabɨ atrivimɨn dapanir asuar aghuimɨn mɨn ikiam,
egh mati akɨmarir bɨzim me uan dapanibagh aghui.
6 Ikiavɨra Itir God uabɨ nɨghnɨzir aghuim isɨ
kotiaba barazir gumazir aruabar anightɨ,
me guizɨn arazimɨn gɨn mangɨ deraghvɨra kotiaba tuisɨgham.
Eghtɨ a gavgavim isɨ nguibar ekiamɨn tiar akabar itir mɨdorozir gumazibar anɨngam,
eghtɨ me apaniba ateghtɨ,
me aven izɨ gumazamizibav soghan kogham.
Godɨn ofa gamir gumaziba ko Godɨn akam inigha izir gumaziba Aisaia dɨpofi
7 Godɨn ofa gamir gumaziba ko, Godɨn akam inigha izir gumaziba,
uaghan wainɨn dɨpaba ko dɨpar onganiba puv da apava onganigha,
asaghporaghira nuighnuigha men daroriba derazir puvatɨ.
Godɨn akam inigha izir gumaziba, me irebamɨn mɨn garir bizibar ganasa,
God men akakazir biziba, me deragha dar garir puvatɨ.
Ezɨ Godɨn ofa gamir gumaziba, men nɨghnɨziba derazir puvatɨgha,
gumazamizibar osɨmtɨziba deragha da tuisɨzir puvatɨ.
8 Dakozir me apiaghav ikia dɨpar onganiba apiba,
men mimiziba bar dagh izɨfa, ezɨ dar danganiba bar mɨzegha iti.
9 Gumazir aruar kaba, nan akam barazir dughiamɨn, me kamaghɨn mɨgɨa ghaze,
“Gumazir kam bar tinara sure damuasa?
E biziba bar dagh fogha gɨfa, ezɨ a tinan sure damuasa?
E borir aghegheviba puvatɨ,
egha datɨrɨghɨram amebamɨn otem ataki.
10 A zuraram akar kabaram ami,
mati borir iririviba azava ghaze, ta ta da da nɨ nɨ na na.
Mɨgɨrɨgɨar kaba mɨngariba puvatɨ.”
11 Bar guizbangɨra, gumazamizir kaba, nan akaba baraghan bar aghua,
kamaghɨn amizɨ, Ikiavɨra Itir God uan akam nguibar igharazimɨn gumazim danightɨ,
a uan nguibamɨn akamɨn mɨkɨm gumazamizir kabav kɨmam.
12 God uabɨ uan gumazamiziba nguazir otevir kamɨn me arɨki,
egha kamaghɨn me mɨkeme,
“Ia danganir kamɨn avughsɨ
navir amɨrizim inigh ikɨ.
Ia gumazamizir osɨmtɨziba aterava amɨraziba,
ia nguazir kamɨn avughsɨ nɨmɨra ikɨ.”
Ezɨ me an akam baraghan aghua.
13 Kamaghɨn amizɨ, Ikiavɨra Itir God uabɨ men sure damuam,
eghtɨ me aghuagh kamaghɨn mɨkɨm suam,
Godɨn akam mɨngariba puvatɨ, mati borir iririviba azafi.
Egh me bar onganigh dughiar kuram initɨma,
men apaniba, mati azuazim asɨzimɨn suirazɨ moghɨn,
me inigh mangɨ kalabus darɨgham.
God dagɨar bar aghuir gavgavim Saionɨn Mɨghsɨam darɨgham
14 Ia gumazir aruar Jerusalemɨn itir gumazamizibar gariba,
ia deraghvɨra Ikiavɨra Itir Godɨn akam baragh.
Ia na dɨpova ghaze,
nan akam a pura bizim.
15 Egha ia ti kamaghɨn mɨgei,
“E Ovevem ko akar gavgavim akɨrigha gɨfa.
E Gumazamizir Oveaghuezibar Nguibam ko, akar gavgavim akɨrigha gɨfa,
kamaghɨn, e ikuvighan kogham.
Dughiar kurar manam aperiamɨn mɨn e bativam, e a gitagham.
En nɨghnɨzir gavgavim kamaghɨn iti,
en ifavarir akaba ko ifavarir arazir guar igharagha garir avɨriba, en akurazɨma,
e deravɨra iti.”
16 Ezɨ Ikiavɨra Itir God, nan Ekiam, kamaghɨn mɨgei,
“Ia gan! Kɨ datɨrɨghɨn dagɨar mam isa, Saionɨn Mɨghsɨamɨn anerɨsi.
Ezɨ a dɨpenim aterir dagɨamɨn mɨn oto.
Kɨ deravɨra a tuisɨgha ghaze,
a dagɨar aghuir bar gavgavim, egha an ivezim bar pɨn ko.
Gumazamizir nɨghnɨzir gavgavim an itiba,
me zuamɨram atiating nɨghan kogham.
17 Kɨ Godɨn guizɨn arazim damightɨ,
a mati gumazir mam bizimɨn ruarimɨn ababanim tuisɨghsɨ, benim amɨkɨrɨvagh bizimɨn ruarimɨn dɨbobonim gɨfogham,
egh men araziba tuisɨgham.
Eghtɨ arazir aghuim,
mati gumazir mam bizibar osɨmtɨziba gan dagh foghsɨ,
a skelɨn mɨn otogh ian akaba tuisɨgham.
Ia ti ghaze,
ian arazir ifavariba ian akuraghtɨ, ia deravɨra ikiam.
Ezɨ puvatɨ. Kɨ bar dughiar kuram damightɨ a ia batogham.
Egha ia, mati aperiar dafam otogha gumazamizibagh asɨghasɨghizɨ moghɨn,
ia bar ikuvigh mangɨ mongamin danganiba puvatɨgham.
18 Egh kɨ ia Ovevem ko amizir akar dɨkɨrɨzir gavgavim uaghan anetughɨva,
ia Gumazamizir Oveaghuezibar Nguibam ko, akar dɨkɨrɨzir gavgavim agɨvagham.
Eghtɨ dughiar bar kuraba ia bativtɨma,
ia bar moghɨra ikuvigham.
19 Dughiar kurar kaba ia ateghan kogham. Puvatɨ.
Da dɨmagariba ko aruebar zurara ia bativ mamaghɨra ikiam,
mati amizim bɨzimɨn uan dɨpenim zurara aneviavɨra iti.”
Egh ia guizbangɨra Godɨn akar kabar mɨngaribagh foghɨva, puv atiating nɨgham.
20 E fo, gumazim dakozim dakuasava amima,
dakozim bar otevezɨ an suemning pura guraghav iti, ezɨ a dakuan ibura.
Egha gumazim dakuasava amima, an nir avavem bar suvizɨ
a uan mɨkarzim deragh anevaraghan kogh, egh dakuan iburagham.
Kamaghɨra, ia bar osemegham,
eghtɨ ian akurvaghamin tuaviba bar puvatɨgham.
21 Guizbangɨra, Ikiavɨra Itir God fomɨra Perasimɨn Mɨghsɨam ko Gibeonɨn danganir zarim gamizɨ moghɨn,
dɨkavigh uan gavgavim ko anɨngagharim sara izam.
Egh ingangarir a nɨghnɨzim,
an a damuam.
Egh ia ingangarir kamɨn gantɨ,
a bar igharagh otogham.
22 Kamaghɨn amizɨ, ia Godɨn akaba batogha da dɨpovir arazir kam atakigh.
Puvatɨghtɨ, ian kalabuziamɨn aven itir arazir kam,
a bar ekevegh mamaghɨra ikiam.
Kɨ kamaghɨn oraki, Ikiavɨra Itir Godɨn Gavgaviba Bar Itim, nan Ekiam, mɨkɨmtɨ
ian kantrin kam bar moghɨra ikuvigham.
Gumazamizibar fofozir aghuim,
a Godra ikegha izi
23 Ia kuariba arigh,
deragh nan akaba baragh.
24 Gumazitam dagher ovɨziba oparasa, zurara dughiabar akunimɨn ingaravɨra iti, o? Puvatɨ.
A ti dughiabar pura nguazim gɨkuavɨra iti? Puvatɨ.
25 A nguazim gɨkuigha, anekɨrasegha gɨvagha, zuravariba opari.
A witɨn ovɨziba, bar voroghɨram da oparava, balin ovɨziba igharagha da opari.
Egha, a uaghan azenir kamɨn mɨriamɨn,
raizɨn guar avɨrir igharaziba opari.
26 An God uabɨ, azenimɨn ingaramin arazir aghuim,
bar deravɨram an sure gami.
27 Egha zuravarir muziaribar ovɨziba iniamim dughiamɨn,
gumazir kam, ter ararir bar dafam isa pamtem zuravaribav sozir puvatɨ.
Egha a wilbaro tɨva ghua zuravaribagh isɨn da mɨra zuir pu.
Bar puvatɨ.
A ter agharir bar muziarim inighɨva, zuravarir muziarir kabar ovɨziba inisɨ,
bar aghumra dav sogha da kuari.
28 A witɨn ovɨziba dɨkabɨnamin arazim bar a gɨfo,
egha an adar bretbar ingaram.
Egha a witɨn ovɨziba, ko witɨn mɨseviba, da amɨsɨvasa hos ko wilkar isa
witɨn ovɨzibagh isɨn ghua da mɨrmɨra zui.
Egha a deravɨra aghumra ghua dar gara ghaze,
A witɨn ovɨziba amɨsar dagh asɨghasɨghan kogham.
29 Ingangarir kabar fofozim ko nɨghnɨzir aghuim, bar Ikiavɨra Itir Godɨn Gavgaviba Bar Itimɨn ize.
A uabɨra fofozir aghuir guar avɨriba ko nɨghnɨzir aghuim bar a gizɨfa.