20
Isa ye yon na fanka kɔrɔ
Lon do rɔ, Isa tɛrɛ ye mɔɔilu karanna ka kibaro ɲuma lase ie ma Allabatobonba kɔndɔ. Sarakalasela kuntiilu, ni sariya karanmɔɔilu, ni mɔɔbailu wara a tɛrɛn ye. Alu ka Isa maɲininka ko: «I ye baara mɛn kɛla ɲin, yon ka i lɔ wo la? I ye yon na fanka kɔrɔ?» Isa ka ie jabi: «N di ai maɲininka fɔlɔ: Yon ka Yaya lɔ sun na ji rɔ? Alla le ka a lɔ a la, wa mɔɔilu?» Alu wara iɲɔɔn ye ka wo jabili ɲinin. Alu kan ko: «Ni an ka a jabi: ‹Alla ka Yaya lɔ wo la›, a ri a fɔ ko: ‹nfenna ai ma la Yaya la wo rɔ?› Ni an ka jabili kɛ ko: ‹Mɔɔ ka Yaya lɔ,› mɔɔ bɛɛ ri wuli ka an bon kaba la, baa alu bɛɛ kan ko nabiɲuma do le tɛrɛ Yaya ri.» Wo rɔ, alu nara Isa jabi: «An ma Yaya kelayaba lɔn.» Isa ka jabili kɛ ko: «Nba, n fanan ti sɔn ka n kelayaba tɔɔ fɔ ai yɛ, n ye mɛn fanka kɔrɔ kɔnin.»
Baarala juuilu ka mɛn kɛ
Ka Isa to ye, a ka sanda do la jama yɛ. A kan ko: «Cɛ do ka jirifɛ labɔ a la sɛnɛ rɔ, ka ban ka a karifa baarala doilu la. A banni a karifala, a bɔra ye ka wa taama rɔ. A mɛnda ye, a ma ikɔseyi. 10 Jiri den kadi waati sera tuma mɛn, jirifɛ tii ka jɔn do lawa jirifɛ rɔ, ka a fɔ baaralailu yɛ ko alu ye a sɔ jiri den dɔ. Keladen se mɛn kɛni ye, baaralailu ma sɔn ka a sɔ. Alu ka keladen mira ka a gbasi ka a gbɛn. 11 Jirifɛ tii ka jɔn gbɛrɛ lawa. A fanan seni ye, baaralailu ma sɔn ka wo fanan sɔ, fo ka a gbasi ka a nani ka a gbɛn. 12 Jirifɛ tii ka jɔn sawana lawa ie ma. A se mɛn kɛra ie ma, alu ka a mira ka a gbasi fo ka a madimin ka wa a lafili kɔkan.
13 «Wo rɔ, jirifɛ tii ka a fɔ ko: ‹N ye nfen kɛla? Nba, n di n diyanan dencɛ lawa ie ma. Alu ka kan ka ale bonya.› 14 Baaralailu ka den wo natɔla yen, ka a fɔ iɲɔɔn yɛ ko: ‹Den wo ri kɛ jirifɛ tii ri a fa kɔ. An ye a mira ka a faa. Sa jirifɛ ri kɛ an ta ri.› 15 Wo bolo ma, alu ka a mira ka a lafili kɔkan ka a faa.»
«A ye di? Jirifɛ tii ri nfen kɛ baarala woilu la? 16 A ri na ka ie faa, ka ban ka jirifɛ karifa dɔgbɛrɛilu la.» Jama ka sanda wo mɛn ka a fɔ ko: «Ɛɛ! Alla ma an kisira ko su wo ma!» 17 Isa ka a ɲa lɔ jama rɔ ka ie maɲininka ko: «Nba, mɛn sɛbɛni Alla la kuma rɔ, wo kɔrɔ ye nfen di? A sɛbɛli ko:
‹Bon lɔlailu ka iban kabakurun mɛn dɔ,
wo le kɛra bon ju sii kaba ri.›»
18 «Mɔɔ mɛn wa be kaba wo kan, wo ri madimin kosɛbɛ, kɔni kaba wo wa be mɔɔ mɛn kan, wo ri mɔɲɔnkɔ.»
19 Sariya karanmɔɔilu ni sarakalasela kuntiilu ka a yen ko Isa ka sanda wo la ie ma. Wo rɔ, alu wulira ka Isa mira ɲa ɲinin damira. Kɔni alu silanda jama yɛ, ka a masɔrɔn Isa duman tɛrɛ ye jama yɛ kosɛbɛ.
Nisɔnkɔ bɔ ko
20 Wo bolo ma, alu tɛrɛ ye Isa lakɔrɔsila tuma bɛɛ. Alu ka janfateilu lawa a ma, mɛnilu ka ie jɛrɛ kɛ iko telenbailu Isa laɲinin kanma. Woilu tɛrɛ ye a fɛ kuma bɛnbali do ye bɔ Isa da rɔ, mɛn di se kɛla a mira sababu ri. Kosa alu ri wa a ri kiti diya fanma wara. 21 Wo bolo ma, janfateilu nara ka ɲininkali kɛ a kun ko: «Karanmɔɔ, an ka a lɔn ko i la kuma telenni le, a ni i la karan. I tɛ mɔɔ dooyala mɔɔ do yɛ. Alla la sila ka kan ka taama ɲa mɛn, i ye mɔɔilu karanna wo la tuɲa jɛrɛ jɛrɛ rɔ. 22 Wo rɔ, an ye a fɛ ka i maɲininka ko do la. A ye di? Ka nisɔnkɔ bɔ ka a di Rɔmu mansaba ma, wo dani an ma, wa wo dani tɛ?» 23 Isa ka a lɔn ko a laɲinin kuma le ɲin. Wo rɔ, a ka a fɔ ie yɛ ko: 24 «Ai ye wodi banan kelen yiraka n na. Yon sawura ni yon tɔɔ ye wodi banan ɲin kan?» Alu ka a jabi: «Rɔmu mansaba.» 25 Isa kan ko: «Nba, ai ye Rɔmu mansaba ta di Rɔmu mansaba ma. Ai ye Alla ta di Alla ma fanan.» 26 Isa ka jabili kɛ koɲuma jama bɛɛ ɲana ka janfateilu mabali. A la jabili ka ie kabannakoya fo ka ie makun.
Sadusilu ka ɲininkali kɛ Isa kun
27 Dina mɔɔ doilu tɛrɛ ye, mɛnilu tɔɔ ko Sadusilu. Woilu ye a fɔla ko mɔɔ si tɛ wulila saya kɔ. Wo doilu nara imadon Isa la ka a maɲininka ko: 28 «Karanmɔɔ, Nabi Musa ka a sɛbɛ a la sariya rɔ ko ni i kɔrɔcɛ sara ka a muso densɔrɔnbali to ye, i ye a muso ta, kosa muso ri den sɔrɔn i kɔrɔcɛ yɛ. 29 Awa, dencɛ wɔrɔnwula tɛrɛ ye cɛ do bolo. Dencɛ fɔlɔ ka muso do furu. A sara ka a muso densɔrɔnbali to ye. 30 Ka bɛn sariya ma, dencɛ filana ka muso wo ta. Ale fanan sara ka muso densɔrɔnbali to ye. 31 Wo rɔ, dencɛ sawana ka muso ta. Dencɛ wo fanan sara. A kɛra ten haan muso wo siira kanberen wɔrɔnwula kelen kelenna bɛɛ kun. Alu bɛɛ sara ka muso densɔrɔnbali to ye. 32 A laban, muso fanan sara. 33 A ye di? Suu lawuli lon, muso ri cɛ yon ta ri sa? A siira a kelen kelenna bɛɛ kun.»
34 Isa ka ie jabi: «Bi mɔɔilu ye furu kɛla. Cɛ ni muso ri furu ie ɲɔɔn ma. 35 Kɔni sini, a tɛ kɛ wo ɲa. Alla wa mɔɔ mɛnilu jate, woilu ri wuli ka don harijeene. Kɔni furu ko tɛ ye. Cɛ tɛ muso furu. Muso tɛ sii cɛ kun ma. 36 Alu tɛ sa butun, fo ka kɛ iko mɛlɛkailu. Alu ye Alla la denilu ri, ka a masɔrɔn alu ra bɔ saya rɔ ka don Alla la ɲenemaya banbali rɔ. 37 Mɔɔ ri wuli saya kɔ, sika tɛ wo rɔ. Nabi Musa jɛrɛ ka wo le yiraka an na. A bɛnda Alla ri jiri tuni taman dafɛ waati mɛn na, a ka a fɔ Maari Alla ma ko: ‹Iburahima la Alla, Isiyaka la Alla, a ni Yakuba la Alla.› 38 Awa Alla tɛ suuilu la Alla ri, fo ɲenemailu. Mɔɔ bɛɛ ɲenema le Alla ɲana.»
39 Sariya karanmɔɔ doilu ka a fɔ Isa yɛ ko: «Ɛɛ, karanmɔɔ! I ra jabili kɛ koɲuma!» 40 Mɔɔ si ma susu ka a ɲininka foyi la wo kɔ.
Mansa Dawuda dencɛ ye Alla la Mɔɔ Ɲenematɔmɔnin di wa?
41 Isa ka ie ɲininka ko: «Nfenna mɔɔilu ye a fɔla ko Alla la Mɔɔ Ɲenematɔmɔnin di kɛ Mansa Dawuda dencɛ do ri wa? 42 Mansa Dawuda jɛrɛ ka a sɛbɛ Jaburi kitabu rɔ ko:
‹Maari Alla ka a fɔ n Maari yɛ ko:
Na isii n bolokinin ma,
43 haan n ye i juuilu bɛɛ mira ka woilu lala i sen kɔrɔ.›
44 Mansa Dawuda jɛrɛ ka a fɔ a ma ko ‹n Maari.› A ye di? A ri se kɛla Mansa Dawuda dencɛ gbansan di wo rɔ wa?»
Isa ka sariya karanmɔɔilu dooya
45 Isa ka kuma do fɔ a la karandenilu yɛ jama ɲana. A kan ko: 46 «Ai ye ai jɛrɛ lakɔrɔsi sariya karanmɔɔilu la ko rɔ. A duman ie yɛ ka duruki ɲumailu don ka imataama. Alu ye a fɛ mɔɔilu ye ie tuwa ka ie bonya jama ladɛndiya rɔ, a ni ka ɲɛmɔɔ siidiya sɔrɔn Allabato diya, a ni sali kinin damun diya. Wo bɛɛ duman ie le. 47 Alu ri cɛsamusoilu bolofenilu bɛɛ damun, ka ban ka waati jan kɛ Alla matarala ka ie jɛrɛ kɛ ikomin Alla kaninbailu. Jahadi juu ba ye woilu makɔnɔla.»