4
1 देवुळि ओसो किर्स्तु येसु (ओग़े किर्स्तु उंद दिया तना राजेमतुन निल्पिह कीयलाह मल्स वायनोग़; अस्के हातोरा-पिसतोरा नेयम केवाल आयनोग़) वेरा अदिकरते नना नीक इद उकुम ईय्ह्नन:
2 बेसता कबुरतुन पोकुर कीम. मन्कलोरिह्क केंजलाह विचर वातेकाय वावेकाय, वेहचोर मन. मुर्तिय ओङ आयवा, मन्कलोरिन सुद्रे कीसोर, लाग्वा कबळ कीतेक तेर्हचोर, दीरा ईसोर देवुळता पोल्लोतुन बेस-नेह्ना काग़्हचीम.
3 बह इतेके वायनाङ दियाने सेतेम पोल्लोतुन मन्कलोर केंजोर आयनुर. मति तमाय विचरतेनाह्क तमाङ केव्किह्क बेद पोल्लो केंज वसिह्ता, अद पोल्लो काग़्हवालोर वेल्लाटोर मन्कलोरिन तमगा जमा कीयनुर.
4 कीसि सेतेमतुन केंजलाह केव पायवा मनदनुर, मति मन्कलोर पुटिह कीतव पीटोङ केंजलाह केव ओगनुर.
5 निमा मात्रम अमेसा सबे पोल्लोने उसर मन. तिपल आयह्पा आरेम आयमा, बेसता कबुरतुन वेहचोर मन. नीवा कयदे ईतद सेवातुन मारिह कीम.
6 बेद्रम देवुळतुह्क मोक ईयह्पा अंगुर जोमातुन वळ्पिह्तोर, अद्रमलेह्कान नावा जीवातुन वने देवुळतेनाह्क ईयनद दिया एवता, नावा हायना वेला एवता.
7 ओर्विह्क-ओर्वोग़ लळेम आयवालोर पूरा लाव कीस लळेम आयना लेह्कान, नना पूरा लाव कीसि बेचोको तिपल्कना नडुम नावा सेवातुन विळ्सोन. कग़्सवाल मन्कल जेक वितिसि सीनातगा एवयना लेह्कान, देवुळ नाक ईतद कबळतुन नना मारिह कीतन. देवुळ नावा पोग़ोन बर्वस तासतपु, नना सेतेमते ताकतन, बेस्केन पेग़्के अरवोन.
8 गेल्सवालोरिह्क दोर्कना लेह्कान, देवुळि इंजेटाहि नयेनाह्क उंद राजटोपि तासता, अदु सेतेमते पिसवालोरिह्क ईयनद इनम आंदु. सेतेमते नेयम केवाल येसु सामि, तना नेयम कीयनद दिया अद राजटोपतुन नाक ईयनोग़. सिरप नाके आयो, सामि ओसो वने मल्स वायनदिन गिर्दाते केपवालोर सबेटोर मन्कलोरिह्क ईयनोग़.
पोलु तिमोतिन जल्दि वायलाह वेहतह्तोग़
9-11 देमस इनवाल दुनियाता गिर्दातुन पसंद कीसि, नाक विळ्सिसि तिसलुनि सहरते अतोग़. कीरेसकेन्सु इनवाल गलाति पटटे अतोग़. तीतुस बार दलमतिया पटटे अतोग़. सिरप लूकाले नावा संगे मन्ह्तोग़. अदिह्क निमा नयगा बेचोन चट्पिट वाया पग़यह्निन, अचोन चट्पिट वायलाह तयर आम. देवुळता सेवाते मार्कल नाक पका कबळतुह्क अरयनोग़, अदिनेनाह्क निमा नयगा वायह्पा मार्कन पोस वाय.
12 नना तुकिकुसिन इपिसुस सहरते लोहतन.
13 निमा वानेके तरोवस सहरते करपुसना लोतगा नना विळ्सिस वातद कोटजगा ताय. ओसो नावाङ सीटिङ ताय, कासा इतेके तोलानगा रासतव सीटिङ ततलाहि मुर्तिय माग़्ङमा.
14 ओसो कोल्से कबळ केवाल सिकंदर पेदिरतोग़ नाक पका लाग्वाङ कीतोग़. ओग़ कीतव कबस्कना इसबते येसुसामि ओन्क बद्ला ईयनोग़.
15 ओना लोप्पा निमा वने उसरते मन. माट काग़्हतव पोल्लोन ओप्पोङ इनजोर ओग़ पका माक विरुद कीतोग़.
16 नावा मुनेता नेयमतस्के नना नावा लोप्पा कोरोटटे वेहतलाह अतन, अस्के नयेनाह साक्सि ईयलाह बोग़े तोळ वावोग़. देवुळि इद पोल्लोतुन सीताते तासिस ओरिह्क सिक्सा एमाकि. सबेटोर नाक विळ्सिस अतोर.
17 मति येसुसामि नावा संगे निचि नाक लाव ईतोग़. बह इतेके नेयम कीयनगा यहुदि आयवोर सबेटोर केंजनाह, नावा मेटे बेसता कबुर पूरा पोकुर आयना इनजोरे. ओसो नेयम केवाल बेरोग़ साय्बाल नाक हामुरता सिक्सा ईस मनेग़, मति सामि नाक पिसिह कीतोग़.
18 अद्रमे सबे लाग्वाङ पोल्लोनाहि सामि नाक पिसिह कीयनोग़ ओसो नाक पोग़ोन तना राजेम ताकिह कीयनगा बेस-नेह्ना ओयनोग़. ओन्के अमेसा-अमेसातुह्क जोहर आयि. आमेन!
19 पिरिस्किला ओसो ताना मुजो अक्विलान जय येसु वेहा, अहे उनेसिपुरुस इनवाना लोतोरिह्क जय येसु वेहा.
20 इरास्तुसकुरिंत सहरतगान मह्नन इतोग़. तुरपिमुस बेमर मताह्कु, ओन मिलेतुस सहरतगान विळ्सिस वातन.
21 निमा इर्ङमताङ दियाङ वायनामुनेन इके वायलाह तयर आम. यूबुलुस, पूदेन्स, लीनुस ओसो कलोदिया वेरु, ओसो इग्डोर सबेटोर विस्वसिर नीक जय येसु वेहतलाह आतोर.
22 सामि नीवा संगे मनि. देवुळि मीक सबेटोरिह्क देय्वा ईयि.