5
लेहता पग़वाह वटे मेततद तोला सीटि
1 पया नना ऊळतन अस्के, राजकुर्सितगा उदतदिना (इतेके देवुळता) तिनळ कयदगा ऊर्हतद तोला सीटि मता. अद तोला सीटटा लोप्पा ओसो पलते रासिस मता. अद सीटटुन बोग़े लेहता पग़वाह सीटटगा एळुङ जागाने वटे मेतिस मता.
2 अस्के उंद पका लावता देवतुलतुन ऊळतन. अद जोरते इद्रम पोकुर कीता, “इद तोला सीटटगा मेततदिन तेंडिसि तान लेहतना लायकतोग़ बोग़ मन्ह्तोग़?” इता.
3 मति पोग़ोन देवुळदीपतगा, इद बूमतगा, बूमता इळ्नु वने बोग़े सीटटुन लेहचि तानग्डा पोल्लोतुन अर्वना लायकतोग़ इलेग़.
4 सीटटुन लेहचि तानग्डा पोल्लोतुन अर्वना लायकतोग़ बोग़े दोर्कवाह्कु नना योहननन पकाय अळिया बोटटन.
येसु किर्स्तु गोरे पिलाता लेह्कान मनजि तोला सीटटुन लेहतह्तोग़
5 पया पेदल्करग्डाह ओर्वोग़ नयगा वासि, “अळमा! इद ऊळा! यहुदाना पुळ्गतोग़, सिंगपुलता लेह्कान लाव मनवाल, दाविद राजाना कूळतोग़, तना कोटुलतोरिन गेल्सतोग़. अदिनेनाह्क तोला सीटटगा एळुङ जागानगा मेततद वटेतुन, तेंडिसि तान लेहतलाह ओग़ पग़यह्तोग़,” इनजोर वेहतोग़.
6 अचोटेने उंद गोरे पिलातुन ऊळतन. राजकुर्सिता ओसो नालुङ जन्वर्कना, वीसा नाल्वुर पेदल्कना नडुम निच मता. तान मुनेने बोग़ो मति हव्किस मतप लेह्कान दिसिंदु. तान्क एळुङ कोहक मताङ, ओसो एळुङ कोंडाङ मताङ. अव कोंडाङ पूरा बूमतगा देवुळ लोहतव तानाङ एळुङ जीवाङ!
7 अद गोरे पिला वासि राजकुर्सितगा उदिस मतदिना तिनळ कयदग्डाहि अद तोला सीटटुन एता.
8 अद तोला सीटटुन एतस्के नालुङ जन्वर्कु ओसो वीसा नाल्वुर पेदल्कु ताना मुनेह अरसि मोळ्कतोर. ओर ओर्वोग़-ओर्वोग़ तमाङ कय्कने उंद जेतुरि ओसो दूपम बोळ्सनद बंगरता कसला पोस मतोर. अद कसलामेंड दूपम मता. अद दूपम इतेके देवुळता मन्कलोरा पार्तना आंदु.
9-10 अद्रमलेह्काने पया, वीसा नाल्वुर पेदल्क मोळ्कतोर ओसो इद्रम पूना पाटा वाग़तोर:
“तोला सीटटुन एतलाहि,
ओसो तानगा मेततद वटेतुन तेंडलाहि निमन लायकतोनिन.
नीक मन्कलोर हव्किस मतोर,
निमा नीवा नेतुर पोहच डोलतिन.
ओसो सबे पुळ्गिनाहि, दुस्राङ-दुस्राङ पोल्लोङ वळ्ह्कवालोरग्डाहि,
सबे देसेह्कनोरग्डाहि, सबे जातिनोरग्डाहि मन्कलोरिन देवुळतेनाह्क मल्हतिन.
ओसो ओरिन मावा देवुळता राजेमतोर कीतिन, ताना बूमयालोर वने कीतिन.
ओर पूरा बूमते राजेम कीस्तोर,”
इनजोर पूना पाटा वाग़तोर.
देवतुल्क येसु किर्स्तुन मोळ्किह्ताङ
11 पया नना ऊळतन: राजकुर्सि मता. नालुङ आस जन्वर्क मताङ. पेदल्क मतोर. ओरा सर्ने लाकिनाङ-लाकिङ, करोळ्कनाङ-करोळ्क लेक पग़वा देवतुल्क मताङ. नना अविस्कना लेङ केंजतन.
12 अव जोरते इद्रम इताङ:
“मन्कलोर इद गोरे पिलातुन हव्किस मतोर,
मति अदिकर तानाये, सबे मालसोम तानाये, बुदि तानाये, लाव तानाये,
मान तानाये, डीसा तानाये, तान जोहर कीकल,
अदे अद्रम कीयना लायकता आंदु,”
इनजोर इताङ.
13 अस्के पोग़ोटा बूमतगा मनदनव, इद बूमतगा मनदनव, बूमता इळ्न मनदनव, सम्दुरतगा मनदनव, देवुळ पंडटव सबे इद्रम इनदनद केंजतन:
“राजकुर्सितगा उदतदिन ओसो गोरे पिलातुन जोहर कीकल.
मान, डीसा, राजेमि अमेसा-अमेसातुह्क अविस्कनाये मन्ह्ता,”
इनजोर इताङ.
14 इतस्के नालुङ आस जन्वर्कु, “आमेन” इनजोर इताङ. पेदल्कु दंडुम अरसि मोळ्कतोर.