22
देवुळता पिसमुळ ईयनद बेरेग़ ओसो मराङ
1 पया अद देवतुल नाक उंद बेरेग़ तोहता. अद बेरेग़ता एग़ु आदूर्कना लेह्कान सिरसिर एडिस मता. अद एग़ु देवुळता पिसमुळ ईयनद मता. देवुळता ओसो गोरे पिलाता राजकुर्सितग्डाहि अद बेरेग़ पोङसोर मता.
2 अद बेरेग़ता एग़ु सहरता बेरा अग़दा नडुमतुह्क पोङसोर मता. बेरेग़ताङ रेंडास दडिनगा, पिसमुळ ईयनव मराङ मताङ. अव मराङ, नेला-नेलातुह्क अलग-अलग रीतताङ पंडिङ आदिंदुङ. इद्रम वर्सामेटे बारा मल्काङ आदिंदुङ. ओसो अव मरानाङ आकिने सबे जातिनोर मन्कलोर सव्रेम आंदुर.
3 अद सहरतगा बेदे सरप मनो आयग़ा; मति देवुळि ओसो गोरे पिलाता राजकुर्सि अगा मनदग़ा. देवुळता सेवकिर ताना सेवा कीयनुर.
4 ओसो ताना मोकमतुन ऊळनुर. ताना पेदिर ओराङ मुंजिनगा रासतद मनदग़ा.
5 पया अगा बेस्केन ईकळ आयो आयग़ा. अहे अगा चिमलि वेह्चता, पोळ्द वेह्चता गर्ज इले आयगा. अगा सामि देवुळि ओरिह्क तना वेह्च ईयग़ा. ओर अमेसा-अमेसातुह्क राजेम ताकिह कीयनुर.
6 अद देवतुल नाक इता, “चट्पिट आयनव पोल्लोन, तना सेवकिरिन तोहतलाहि, तना कबुरतोरिन वेहनाह कीयनद सामि देवुळि देवतुलतुन लोहता. इव पोल्लोङ बर्वस कीयना लायकताङ ओसो निटमताङ मन्ह्ताङ,” इता.
7 येसु किर्स्तु इतोग़, “ऊळाट! नना चट्पिटे वायकन! इद पुस्तकतगा, वायनद कालमताङ पोल्लोङ रासिस मन्ह्ताङ. अविस्किन केंजिसि अहलेह्का ताकवालोर मन्कलोर देय्वातोरु,” इतोग़.
8 नना योहननन इव पूरा पोल्लोन केंजतन, ऊळतन. बेस्के नना केंजतन, ऊळतन, अस्के नाक इव पूरा पोल्लोन तोहतद देवतुलतुन दंडुम अरयलाह तानाङ काल्क अरतन.
9 मति अद इता, “नाक दंडुम अर्मा! नीवा लेह्कान, नीवा ऐंगेटोर देवुळता कबुरतोरा लेह्कान, इद पुस्तकताङ पोल्लोङ वेहतप ताकवालोरा लेह्कान, नना वने देवुळता सेवकनन आंदन. अदिनेनाह्क नाक आयो; मति देवुळतुने दंडुम अर्म,” इनजोर इता.
आक्रिताङ पोल्लोङ
10 ओसो अद नाक इता, “इद पुस्तकताङ पोल्लोङ करल आयनद कगो एवता. अदिनेनाह्क इद पुस्तकताङ पोल्लोन मकिह कीस तासमा.
11 बोर लाग्वाङ कीसोर ताकिह्तोर, ओर अहलेह्काने ताकिर; बोर जीवाते करब आतोर, ओर अहलेह्काने आसोर मनिर. ओसो बोर सेतेमतोर मन्ह्तोर, ओर अहलेह्काने मनिर; बोर पवित्रते मन्ह्तोर, ओर अहलेह्काने मनिर,” इनजोर इता.
12 येसु इतोग़, “ऊळाट! नना चट्पिट वायकन. ओर्वोग़-ओर्वोग़ मन्कल तमा बेद रीतते पिसतोर, अद रीतते ओरिह्क बूति ईयलाहि वायकन.
13 सबेटविना मोदुल वने ननाये; सबेटविना कोड वने ननाये. सुरुतोनन ननाये, मारेंगातोनन वने ननाये! सबेटविन सुरु केवानन वने ननाये, सबेटविन मारिह केवानन वने ननाये.
14 बोर आपुनाङ गेंदेन नोग़्स वेडिह कीस्तोर ओर देय्वातोरु! ओर सहरतगा ओळ्यनद अग़दुह्के ओळियनुर ओसो देवुळता पिसमुळ ईयनव मरानाङ पंडिन तिनदलाह ओरिह्क अदिकर दोर्कग़ा.
15 मति देवुळताङ पोल्लोन पास्कवालोर, ओदेङ पंडवालोर, साट्याल कबळ केवालोर, हव्कवालोर, पेन-बोमान मोळ्कवालोर, जोलतुन जीवा कीसि जोल पोल्लोङ केवालोर सबेटोर, अद सहरता लोप्पा ओळियलाह पग़वोर.
16 इव विस्वसिरा मुडा लोप्पाडाङ पोल्लोङ आंदुङ. इविस्किन मीक वेहतलाहि नना येसुनन, नावा देवतुलतुन लोहतन. नना दाविद राजाना कूळतोनन आंदन. नना दीचनद विय उका लेह्काडोनन आंदन,” इतोग़.
17 देवुळता जीवा ओसो मर्मिङ कीस ततनद पिला, येसुन “वय” इनजोर इन्ह्ताङ. इद पोल्लोतुन केंजवालोर वने “वय” इनजोर इनिर. एग़ उंडा वसतोर वायिर, विचर मनवालोर मन्कलोर देवुळता पिसमुळ ईयनद एतुन पुनेमते ओयिर.
18 इद पुस्तकतगा इंजेटाङ ओसो वायनद कालमताङ पोल्लोङ मन्ह्ताङ. इव पोल्लोन केंजवालोर सबेटोर मन्कलोरिन, नना योहननन वेहतलाह आतन: बोग़ाय इगा रासतव पोल्लोनगा ओसो उचुक पोल्लोङ काल्पतोग़ इतेके, इद पुस्तकतगा रासतव गोसाङ ओन्क आनाह देवुळ कीयग़ा.
19 अद्रमलेह्काने बोग़ाय इव पोल्लोनग्डाहि वळ्गा पोल्लोन तेंडटोग़ इतेके, देवुळि तना पिसमुळ ईयनद मरातग्डाहि ओन्क तूस एवो आयग़ा. अहे तना सहरतगा वने ओन्क तूस एवो आयग़ा.
20 इव पोल्लोन वेहवाल येसु इन्ह्तोग़, “इंगो! नना चट्पिटे वायकन,” इन्ह्तोग़. “आमेन! ए येसुसामि वय!”
21 देवुळता मन्कलोर सबेटोरगा येसुसामिना देय्वा मनि. आमेन.