20
देवतुलि देयह्कना मुक्यान अजर वर्सानेनाह्क दोहता
1 जन्वरतुन ओसो ताना तोळतोरिन हव्कतापया, पोग़ोन देवुळदीपताहि उंद देवतुल इळ्न रेगनद ऊळतन. तानगा हानादीपताङ तालम कय्कु मताङ. ओसो उंद बेरा गोल्स पोस मता.
2 पया अद देवतुलि मासुंडतुन मेलिय पग़वाह पोयता. अद मासुंडि इतेके, मुनेता तरसि. तान देयह्कना मुक्याल इन्ह्तोर. देवतुल तान पोसि अजर वर्सानेनाह्क दोहता.
3 दोहचि हानादीप बोंदातगा वाटिसीता. वाटिसि अग़दुन केहच बोग़े तेग़्यनायो इनजि सीना वर्सता. अद्रम कीताह्कु अजर वर्साङ आनाह सबे जातिनोर लोकुरिन देयह्कना मुक्याल लेसिह कीया पग़वो. अजर वर्साङ मारतापया तान गळ्किह्क विळ्समुळ आयग़ा.
4 पया नना राजकुर्सिन ऊळतन. बूमतगा मनदह्पा उच्वुर मन्कलोर अद जन्वरतुन, ताना बोमातुन, मोळ्कवा मतोर. ताना सीनातुन तमाङ मुंजिनगा, कय्कनगा तासोर. ओर येसुना ओसो देवुळता पोल्लोता साक्सि ईताह्कु, दुस्रोर मन्कलोर ओराङ तलान डायिस मतोर. अद्रम डोलतोर मन्कलोराङ आनस्किन ऊळतन. ओर अव राजकुर्सिनगा उदिस मतोर. देवुळि ओरिह्क नेयम कीयनद अदिकर ईता. ओर ओसो वने जीवा अरतोर ओसो किर्स्तुना संगे अजर वर्साङ आनाह राजेम ताकिह कीतोर.
5 इदे डोलतोरग्डाह मुने जीवा अरयनद आंदु. डोलतोर ओसो उच्वुर मन्कलोर अजर वर्साङ मारनाह जीवा अरवा मतोर.
देयह्कना मुक्यान विळ्सिह्ता ओसो पूरा बूळे कीस्ता
6 इद्रम मुने जीवा अरवालोर देय्वातोर. ओर देवुळता पवित्र मन्कलोरु. ओर किस बटटगा दुस्रा मल्का डोलोर, मति ओर देवुळता ओसो किर्स्तुना बूमयालोर आयनुर. ओसो किर्स्तुना संगे अजर वर्साङ राजेम ताकिह कीयनुर.
7 पया अजर वर्साङ मारतापया उंद देवतुलि, देयह्कना मुक्यान दोहतग्डाहि विळ्सिसीयग़ा.
8 अद बोंदाताहि पेसिसि बूममेंड मनवालोर सबे जातिनोरिन नाळेह कीयलाहि दायग़ा. ओर जातिनोरिन याजूज ओसो माजूज इन्ह्तोर. देयह्कना मुक्याल ओरिन लळयतेनाह्क जमा कीयलाहि दायग़ा. ओर मन्कलोरु सम्दुरता उस्कोता लेह्कान वेल्लाटोर मनदनुर.
9 ओर बूममेंड तिरियनुर ओसो देवुळि जीवा कीतद ताना लोकुर मनदनद सहरतुन सर तिरियनुर. मति देवुळदीपताहि किस रेगिसि ओरिन बूळे कीयग़ा.
10 तानापया ओरिन नाळेह कीसोर मतद देयह्कना मुक्यानु उंद देवतुलि किसु ओसो किस तळ्मिङ मळ्गनद बटटगा वाटिसीयग़ा. अगा अद जन्वरतुन ओसो जोल कबुरतोन वाटटद मन्ह्ता. ओर अगा नग़्का-पिळ्विळ, पियल-पोळ्द अमेसा-अमेसातुह्क किस मंटाते सिक्सा आसोर मनदनुर.
11 पया उंद बेरा पाड्रि राजकुर्सितुन ऊळतन. ताना पोग़ोन देवुळि उदिस मता. अचोटेने इळ्ता बूमि ओसो पोग़ोटा बूमि ताना मुनेटाहि वितताङ. अविस्किना पता-जाडा वने दोर्को.
12 तानापया डोलतोर उड्लोर, बेरोर सबेटोर देवुळता राजकुर्सिता मुनेह नितद ऊळतन. देवतुल्क पुस्तकिङ तेग़ियताङ. पया ओसो उंद पुस्तकतुन तेग़ियताङ. अद पुस्तकतगा अमेसातुह्क पिसवालोराङ पेदिर्क रासिस मताङ. मुनेताङ पुस्तकिनगा रासतपु डोलतोर मन्कलोर तमा जीवात मनदह्पा बेद रीतते पिसतोर, अद रीतते देवुळि ओरिन नेयम कीता.
13 पया सम्दुरतगा डोलतोरिन देवुळि नेयम कीता. पया बूमते डोलतोर मन्कलोरिन ओसो हानादीपतगा मनवालोरिन नेयम कीता. ओर्वोग़-ओर्वोग़ मन्कल बेद रीतते पिसतोर अद रीतते नेयम कीता.
14 तानापया हामुर ओसो हानादीप मनो. अविस्किन देवुळि किस बटटगा वाटिसीता. इद किस बटिये दुस्रा हामुरि.
15 देवुळता संगे अमेसातुह्क पिसवालोरा पुस्तकतगा, बोना पेदिर रासतद इले, ओन देवुळि किस बटटगा वाटिसीता.