18
बेबिलोन सहर बूळेम आता
1 पया ओसो उंद देवतुल पोग़ोन देवुळता जागाताहि रेगनद ऊळतन. तान्क पकाय अदिकर मता. ताना सोबातद वेह्चते पूरा बूमतगा वेह्च आता.
2 अद जोरते इद्रम केयता: “बूळेम आता, बूळेम आता, बेरा बेबिलोन सहर बूळेम आता! इंजेके अद सहर देयह्क मनदनद जागा आता. सबे देयह्क अगा मन्ह्ताङ. कळ्वोग़ आतव सबे पिटेङ अगा गूडाङ पंडटाङ. कळ्वोग़ आसि, एग़्ङ वानाह मनदनव सबे जन्वर्क अगान जागा पोयताङ.
3 बेबिलोन सहरता लाग्वाद साट्याल कबळतुन, सबे जातिनोर वने कीतोर. बूमतोर राजालोर ताना संगे साट्याल कबळ कीतोर. साट्याल कबळ कीयलाहि अद सहरतुह्क पकाय जीवा पर्ह्किंदु. अद इसबते बूमतगा दंदा केवालोर मन्कलोर साव्कर आतोर,” इता.
4 तानापया, पोग़ोन देवुळता जागाताहि ओसो उंद लेङ केंजतन. अद इद्रम इता: “ए नावा मन्कलोरिर! मीट ताना पापमते कलियमाट! ताना तिपल मीक दोर्कमाकि! अदिनेनाह्क तानग्डाहि पेसिस वाटु!
5 ताना पापम पोग़ोटा बूमतगा एवनाह कुपा कीतप लेह्का आता. ताना लाग्वद कबळतुन देवुळि सीता कीता.
6 अद दुस्रोरिह्क लाग्वाङ कबस्क कीतपलेह्का मीट वने तान्क अहे कीम्ह्टु. अद मीक कीतदिना बद्ला, मीट रेंड पटिङ तानेनाह्क कीम्ह्टु. अद दुस्रोरिह्क ईतद बेचोन एरस मंदु, तान्काय रेंड पटिङ एक्वा एरतदिन ताना बट्कितगा वळसीम्ह्ट.
7 अद सहर तना इद्रम सीता कीयलाह आता: नना रानिना लेह्कान उद्तान! नना रांडे आंचानन आयोन! नना बेस्केन दुकम आयोन आयकन, इनजोर सीता कीयलाह आता. अदिनेनाह्क तन्क बेचोटा बेरा समजेम आंदु, बेचोन साट्याल कबळ कीसोर पिससोर मंदु, अचोन तान सिक्सा ईम्ह्टु, दुकम ईम्ह्टु.
8 अदिन नेयम कीयनद सामि देवुळि तान्काय लावता मन्ह्ता. अदिनेनाह्क तानगा उंदिय दियाते तिपल्क वास अरयनुङ इतेके: हामुरि, दुकमि, दुकळि इव सबे अरयनुङ. ओसो अद सहर किसते कर्विस बूळेम आयग़ा,” इनजोर इता.
बेबिलोन सहरतगा दंदा कीया पग़वल इनजोर दंदा केवालोर अळयाह्तोर
9 अद सहरता संगे साट्याल कबळ कीतोर राजालोर, ताना संगे साट्याल कबळ कीसोर गिर्दा कीतोरु, अद सहर कर्वनद उंडुलतुन ऊळनुर. उळिसि तानेनाह्क अर्युल पासोर अळयनुर.
10 ओर अद सहरताङ तिपल्कनेनाह्क रेयिसि, जेक निचि इद्रम इनदनुर: “अलो! बेरा सहरतिन! बेबिलोन इनदनद लावता सहरतिन! नीक गोसा वाता. गट्कामेटेन नीक सिक्सा दोर्कता,” इनदनुर.
11 इद बूमतगा दंदा केवालोर मन्कलोरु, इंजेके तमा मादुन असवालोर बोरे इलेर इनजोरे, अद सहर कर्वनदिन ऊळिस अळयनुर ओसो दुकम आयनुर.
12 तमाङ बंगर्क, वेंडिङ, मिळ्स्कनव बंडाङ, मोतिङ, कुलुलताङ गेंदेङ, राजालोर केग़यनव डुंगा पंड रंगताङ गेंदेङ, रेसेम गेंदेङ, साय्बलोर केग़यनव नेत्रल रंगताङ गेंदेङ इद्रमताङ पकाय दाराताङ गेंदेङ, गम-गम एग़्स्कतव नळ्कतव मराङ, एन-पल्कने पंडटद मालु, पकाय मोलाताङ मराने पंडटद मालु, इतुळता मालु, कचता मालु, सोबाताङ बंडाने पंडटद मालु
13 दारचिनि इनदनद मस्ला, बेस गब वायनद मस्ला, दूपमि, गम-गम एग़्स्कनद अतर्नेय, बेस-नेह्ना एग़्स्कतद एवेग़ि, अंगुर जोमा, जय्तुन नेयु, मयदा पिंडि, गोह्कु, कोंदाङ-मूरेङ, गोरेङ, एर्रेङ, कोडाङ, कोडा गाडाङ, ओर्युलतोरु, इव सबेटविन असवालोर बोरे इलेर इनजोर अळन्दुर.
14 ओसो सहरतुन इन्ह्तोर, “निमा पकाय विचर कीतिन अव पंडिन इंजेके नीक दोर्कोङ, वेल्ला दाराता मालु ओसो पका विचर वानाह मतद मालु इंजेके नियगा इले. नियग्डोर मन्कलोरिह्क अव इंजेके मुर्तिय दोर्कोङ,” इन्ह्तोर.
15 इद मादुन अद सहरतोर मन्कलोरिह्क वमिसि, साव्कर आतोर मन्कलोरु, ताना तिपलतुन ऊळिसि रेयिस मनजि जेक नितनुर. निचि अळसोर, दुकम आसोर इद्रम इनदनुर:
16 “अलो! निमा बेरा सहरतिन! कुलुलताङ गेंदेङ, राजालोर केग़यनव डुंगा पंड रंगताङ गेंदेङ, साय्बलोर केग़यनव नेत्रल गेंदेङ उहचि, बंगर्क, मिळ्स्कनव बंडाङ ओसो मोतिङ केग़्स मतिन.
17 नियगा मतव अचोक कोताङ ओसो मालु गट्कामेटेन बूळेम आताङ,” इनजोर इन्ह्तोर. सम्दुरतगा ओडाङ पुंडवालोरु, ओडाने अनवालोरु, जाराह्कु, ओसो अगा कबळ-काम केवालोर सबेटोर जेक नितोर.
18 निचि अद सहर कर्वनद उंडुलतुन ऊळतोर, ऊळिसि “इचोटा बेरा सहरता लेह्का बेद सहर मन्ह्ता?” इनजोर केयतोर.
19 ओसो दुकम आताह्कु तमाङ तलानगा दुरातुन वाटटोर. वाटिसि इद्रम केयतोर, “इद सहरतगा पकाय मालसोम मताह्कु ओडानोर मन्कलोर अद मालसोमते साव्कर आतोर, मति इंजेके गट्कामेटेन इद बूळेम आस्ता,” इनजोर जोरते केयतोर.
20 ए देवुळदीपतगा मनवालोरिर! देवुळता मन्कलोरिर! किर्स्तुना बळयिरिर! देवुळता कबुरतोरिर! अद सहर मीक कोटुल पोस मताह्कु मियेनाह्क देवुळि तान्क इंजेके सिक्सा ईता. अदिनेनाह्क गिर्दा आम्ह्टु!
21 अस्के उंद पका लावता देवतुलि, बेरा जेता बंडाता लेह्काडा बंडातुन तेहचि सम्दुरतगा वाटटा. वाटिसि इता, “देवुळि बेरा सहर बेबिलोनतुन इद्रमे तेह्च वाटिसीयग़ा ओसो बूळे कीयग़ा. तानापया अद सहर मुर्तिय दिसो आयग़ा.
22 बेबिलोन सहरतिन! नियगा ओसो बेस्केन जेतुर एचनद, पाटा वाग़नद, सनय ऊरनद, अकुम ऊरनद केंज वावो आयग़ा. दुस्राङ-दुस्राङ कबस्क केवालोर इंजेके नियगा मनोर आयनुर. जेता बंडाते पिंड नोग़नद लेङ इंजेके नियगा केंज वावो आयग़ा.
23-24 नियगा दंदा केवालोर, पूरा बूमतगा बेरोर मंदुर. नियग्डोर मन्कलोर तमाङ ओदेने सबे जातिनोरिन लेसिह कींदुर. देवुळता कबुरतोरिन, पूरा बूमतगा देवुळता मन्कलोरिन ओसो दुस्रोर मन्कलोरिन नियग्डोर हव्कतोर. देवुळि नियग्डोर मन्कलोरिन सिक्सा ईयलाह आता. अदिनेनाह्क इंजेके ईकळ आयह्पा, चिमलिङ पोतिह कीयलाहि मन्कलोर मनोर आयनुर. मन्कलोर मनवेके बोग़े मर्म पेकाना, बेदे मर्म पिलाता पाटा मनो आयग़ा,” इनजोर अद देवतुल इता.