8
देवुळता जीवा ईयनद पिसमुळ
1-2 मुने नाक पापम ताकिह कीसि अमेसाता हामुरतेके ओसींदु, मति इंजेके नना येसु किर्स्तुन विस्वस कीताह्कु, नयगा मनदनद देवुळता जीवा पापमता, हामुरता कयदग्डाहि नाक विळ्सिह कीता. अदे जीवा इंजेके नाक ताकिह कीस्ता. अदिनेनाह्क देवुळि कसुरतोरिर इनजि मावा नेयम कीयग़ा इनजोर माक बातय रेय इले. येसु किर्स्तुन विस्वस केवालोरिह्क [मन्कना बुदते ताकवा देवुळता जीवा वेहतप ताकवालोरिह्क] देवुळि बेस्केन सिक्सा एवो.
3 माट मन्कना बुदते ताकसोर मताह्कु मोसानाङ अडोङ केंज पग़वा मतल. अद इसबते, अडोङ माक पापमता लावताहि विळ्सिह कीया पग़वोङ. मति अडोङ कीया पग़वदिन देवुळिये कीता. बेद्रम इतेके तना वग़ोग़ मग़िन लोहचीता. ताना मग़ि माट पापि मन्कलोरा लेह्का मन्कल मारियिस इद बूमतगा वास मतोग़. अदे मेंदुलते ओग़ मावा पापमता सिक्सातुन तना पोग़ोन एतोग़.
4 देवुळि बाराह्क इद्रम कीता? इंजेके माट मन्कना बुदते ताकवालेवा देवुळता जीवा वेहतप ताक पग़यह्नल, इद्रम ताकसोरे उंद पूना रीतते अडोङ वेहतप कीयलाह आतल.
5 मन्कना बुदते ताकवालोर बार मन्कनाङे पोल्लोनगा सीता कीसोर मन्ह्तोर. मति देवुळता जीवा वेहतप ताकवालोर बार देवुळताङ पोल्लोनगा सीता कीसोर मन्ह्तोर.
6 मन्कना बुदि मीवाङ विचर्किन ताकिह कीतेके, मीक देवुळ ईयनद पिसमुळ दोर्को आयग़ा. मति देवुळता जीवा मीवाङ विचर्किन ताकिह कीतेक बार, मीट देवुळता संगे पिसकिर ओसो सुकमते मनदकिर.
7 बह इतेके मन्कना बुदते विचर केवालोर देवुळताङ अडोन केंजोर, केंज पग़वोर वने. अदिनेनाह्क अद्रम विचर केवालोर देवुळता विरुद मन्ह्तोर.
8 मन्कना बुदते ताकवालोर देवुळतुह्क विचर वातप मुर्तिय ताक पग़वोर.
9 मीवा जीवातगा मात्रम पवित्र जीवा जागा आताह्कु मीट मन्कना बुद मतप लेह्का पिसविर, मति पवित्र जीवा वेहतप लेह्का पिसिह्निर. (बोरगा किर्स्तुना जीवा इले, ओर ओना मन्कलोर आयोर, इदिन सीता कीम्ह्टु.)
10 किर्स्तु मीवाङ जीवानगा मतेक अचोन, मीवाङ मेंदुस्क पापमतुह्क डोलतेक तेला, देवुळि मीक सेतेमतोर कीताह्कु, ताना जीवा मीक अमेसाता पिसमुळ ईस्ता.
11 बेद देवुळि येसुन हामुरतग्डाहि तेग़्किह कीता, अदे देवुळता जीवा मीवा जीवातगा जागा आता. अदे जीवाता लावते, मीट डोलतापया वने, देवुळि येसु किर्स्तुन कीतप लेह्का मीवाङ मेंदुस्किह्क वने उंद दिया जीवा ईयग़ा.
12 अदिनेनाह्क मावोरिर! देवुळता जीवा वेहतपु माक ताक पोयह्ता. मन्कना बुद मतप ताकनदायो.
13 मन्कना बुदते माट ताकतेक अचोन अद अमेसाता हामुरतेकेन ओसीस्ता. मति देवुळता जीवाता तोळते, मावाङ मेंदुस्क विचर कीयनव कबस्किन विळ्सतेके माट देवुळता संगे पिसकल.
14 बाराह्क इतेके बोर मन्कलोरिन देवुळता जीवा ताकिह कीस्ता, ओरे देवुळताङ मग़्क-मयस्क मन्ह्तोर.
15 बहु साकुर केवाल तना माल्काह्क रेयिस मनदना लेह्का, माकु देवुळताहि रेय वसनद जीवा दोर्कताया? आयो! मावा जीवातगा मनदनद पवित्र जीवा माकु देवुळताङ मग़्क-मयस्क आनाह कीता. अदिनेनाह्क देवुळतुनु “ए नावा बाबानिन!” इनजोर केय पग़यह्नल.
16 इंगो देवुळता जीवा मावा जीवातुन, मीट निटमे देवुळताङ मग़्क-मयस्कनिर इनजोर साक्सि ईयलाह आता.
17 इद्रमि किर्स्तुना लेह्का माट वने देवुळताङ मग़्क-मयस्कनल आंदल, अहे ओना लेह्का माक वने देवुळबाबाल तनाङ मग़्क-मयस्किह्क तासतद बर्कत दोर्कग़ा. माट इद बूमते किर्स्तुना संगे तिपल आय्ह्नल इतेके, पया देवुळदीपते ओना संगे देवुळताहि मान वने दोर्किह कीकल.
वायनद कालमते विस्वसिरिह्क दोर्कनद गिर्दा
18 किर्स्तुनेनाह विस्वसिरिह्क इंजेक तिपल वास्ताये, मति वायनद कालमते देवुळि तना डीसा तोहचि बेचोन माक मान ईयग़ा, ताना सीता कीतेके मावा इंजेटा तिपल ओसोय अल्को मन्ह्ता इनजि नना पुह्नन.
19-21 आदम-अवाल बेस्के पापम कीतोर अस्के देवुळि ओरिन सरप ईता, ओसो पूरा बूमतगा पीळा अर्हता. मन्कलोरिह्क इतेके ओरा कसुरतेनाह्क सरप दल्गता, मति देवुळ पुटिह कीतव सबेटविस्किह्क बार कसुर केवाये पीळा दोर्कता. मति अविस्किह्क वने आसा मन्ह्ता. उंद दिया देवुळि तनाङ मग़्क-मयस्किन अद सरपताहि विळ्सिह कीसि, ओरिह्क मान ईयग़ा. अदे दिया देवुळि तना पुटिह कीतव सबेटविन वने विळ्सिह कीयग़ा. अद दियातुन अवु अग़ ऊळसोरेन मन्ह्ताङ.
22 आंचाळि रिकम आयह्पा नोयनद तेदतस्के बेद्रम ऊल्गिह्ता, अद्रमे अव सबेटव इंजेक एवनाह ऊल्गतप आंदुङ इनजोर पुतल.
23 अविस्कना संगे माटवने ऊल्गलाह आतले. ओसो पया दोर्कनद बर्कत बेद्रम मनदग़ा इनजोर तोहतलाहि, देवुळि इंजेकेन माक तना जीवातुन ईता. अद जीवा वेहतपु, उंद दिया मयगा देवुळताङ मग़्क-मयस्क आयनद पूरा अदिकर दिसग़ा. अस्के मावाङ मेंदुस्किन तिपल्कनाहि विळ्सिह कीसि, पूनाङ मेंदुस्क माक ईयग़ा. अद दियातेनाह्क माट पका ऊल्गसोर केपलाह आतल.
24 देवुळि माक पिसिह कीतस्के माक इद आसा दोर्कता. मति बातालतुनाय कोंडाने ऊळतेके, ताना पोग़ोन बोग़ाय बाराह्क आसा तासेग़?
25 माट इसि कोंडाने ऊळवद बर्कततुन आसा कीय्ह्नल, अदिह्क अद बर्कत माक दोर्कनाह्जोम माट आरेम आयवा केपसोर मह्नल.
26 अचोने आयो मति, मावा बुद कमजोर मनाह्कु, देवुळता जीवा माक तोळ मन्ह्ता. पार्तना कीयनस्के देवुळतुन माट बाताल ताल्ह्कना, बेद्रम ताल्ह्कना, इनजि पुनवल. मावा तोडटाहि माट देवुळतुन पोल्लोङ वळ्ह्क पुनवल, मति ताना जीवा मावा लोप्पाडाहि ऊल्गसोर केयिह्ता. केयिसि मावा पार्तनातुन देवुळतगा बराबर एवसिह कीसीस्ता.
27 देवुळता विचर मतपे पवित्र जीवा देवुळता लोकुरेनाह्क अर्ज कीस्ता. अदिनेनाह्क मावाङ पोटालोप्पाडाङ पोल्लोन पुनदनद देवुळि तना जीवाताङ विचर्किन पुन्ह्ता.
28 देवुळि मुनेन विचर कीस तासतपु बोन-बोन केयता, ओरे तान जीवा कीस्तोर. ओरिह्क बेवे आयिङ, देवुळि अव सबेटविना मेटे ओरेनाह्क बेसताङे पोल्लोन पुटिह कीसीस्ता इनजोर माट पुतल.
29 बाराह्क इतेके, बोर-बोर नयगा विस्वस तासनुर इनजोर देवुळि मुनेन पुन्ज मता. नावा मग़ि येसु ओर सबेटोरा दादाल आयेग़ इनजोर देवुळि ओरिन येसुना लेह्काडोर आयलाह मुनेन आचता.
30 बोर-बोरिन आचता, ओरिन तना अग़दे ताकलाह केयता वने. बोर-बोरिन केयता, ओरिन सेतेमतोर कीता वने. बोर-बोरिन सेतेमतोर कीता, ओरिह्क पका मान ईयग़ा वने.
देवुळता गूनमताहि माक बेदे एग़िह कीया पग़वो
31 इचानाह वेहचोर वातन अव सबे पोल्लोन ऊळिसि, इंजेके उंदिय पोल्लो पेसिह्ता: देवुळि मावा तोळ मतेके, मावा विरुदतोर बेच्वुर मतेकाय, माक बाताले आयो.
32 देवुळि किर्स्तुन मयेनाह्क डोललाह वने विळ्सिसीता, वेग़ नावा वग़ोग़े मग़ि इनजोर विचर वने केवो, अचोन ताना गूनमि! इतेके तना करल कीस मतपु इव सबेटविन चिव्टम आयवा माक निटमे ईयग़ा.
33 देवुळिये माक आचिसि सेतेमतोरिर इन्ह्ता. इतेके मन्कलोर मावा पोग़ोन कसुर वाटटेकाय बाताल आयो.
34 पया देवुळि माक सिक्सा ईया पग़यह्ताया? आयो, अद्रम बेस्केन केवो! येसु किर्स्तुये मयेनाह्क डोलिस मतोग़. अचोने आयो मति देवुळि ओन जीवा अर्हचि, तना तिनळ बाजे ओन उदिह कीता. ओग़ मावा तोळ मनजि अगा मयेनाह्क देवुळतुन वळ्ह्किह्तोग़.
35-36 मुनेन दाविद राजाल सास्त्रमतगा इद्रम रासतोग़:
ए देवुळि! माट नीवा मन्कलोरोम इनजोर लोकुर माक जर्मिने हव्कलाह ऊळिह्तोर.
एर्रेन अस्कलाह ओतप लेह्का माक ओयलाह ऊळिह्तोर.
इनजोर रासतोग़. माक तिपल वावलि, लोकुरा विरुद वावलि, दुकळ आवालि, गेंदेङ दोर्कोङ आवेस्कु, दोकाता जागातगा मनेलल, लोकुर माक कसेह्क-मग़्स्कने हव्केर. इद्रमताङ तिपल्क वातेके, किर्स्तु माक जीवा केवोग़ इनजोर इनदकला? आयो! ओग़ माक जीवा कीसोरेन मन्ह्तोग़.
37 इव तिपल्क माक वातेक तेला, माक जीवा कीतोग़ु किर्स्तु मावा तोळ मनाह्कु, माक आरे कीया पग़वोङ, माटे पूरा गेल्सिह्नल.
38-39 मावा सामि येसु किर्स्तुन मयेनाह्क डोललाह लोहचि, माक इचोन जीवा कीता इनजोर देवुळि तोहता. हामुर आयि, पिसमुळ आयि, पोग़ोटाङ देवतुल्क आयिङ, देयह्क-बूतह्क आयिङ, नेटा रेयि आयि, नाळता आल्सुळ आयि, पेन्ह्क-हानास्क आयिङ, पोग़ोटा बूमतगा ओसो इळ्ता बूमतगा देवुळि पुटिह कीतव बेवे आयिङ, मयगा मनदनद देवुळता गूनमताहि माक बेवे एग़िह कीया पग़वोङ, इनजोर नना बेस-नेह्ना पुतन.